ក្រុមអ្នកជំនាញ និងអ្នកជំនួញក្នុងវិស័យសេដ្ឋកិច្ច ក៏បានលើកឡើងថា កូវីដ-១៩ ក្រៅតែពីនាំមកនូវវិបត្តិ វាក៏បង្រៀនធ្វើឲ្យម្ចាស់ក្រុមហ៊ុន ក៏ដូចជាអាជីវកម្មចេះបត់បែនតាមកាលៈទេស និងមិនត្រូវផ្តេកផ្តួលជាមួយស្ថានការណ៍នៃការឆ្លងជំងឺកូវីដ-១៩នោះទេ។
ការឆ្លងរាលដាលនៃជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈបានបង្កផលប៉ះពាល់យ៉ាងខ្លាំងដល់ជីវភាពពលរដ្ឋ និងសេដ្ឋកិច្ចជាតិ។ ក្រុមហ៊ុនអាជីវកម្ម និងសហគ្រាសមួយចំនួន ត្រូវបង្ខំចិត្តផ្អាកដំណើរ និងបិទទ្វារជាបណ្តោះអាសន្នដោយសារក្ស័យធននិងគ្មានភ្ញៀវមកទទួលសេវាកម្មរបស់ពួកគេ។ ចំណែកអាជីវកម្មមួយចំនួនទៀត បានបន្តបើកដំណើរការទាំងខាត និងរស់យ៉ាងលំបាកលំបិន។ ប៉ុន្តែក៏មានអាជីវកម្មមួយចំនួន ក៏មិនរងផលប៉ះពាល់ផងដែរ ពិសេសពាក់ព័ន្ធសេវាកម្មដឹកជញ្ជូន និងលក់ម្ហូបអាហារ។
អ្នកវិនិយោគ និងជាអ្នកជំនួយដ៏ល្បីឈ្មោះនៅកម្ពុជា អ្នកឧកញ៉ា សៀ ឫទ្ធី ប្រធានក្រុមប្រឹក្សាភិបាលក្រុមហ៊ុន WorldBridge Group ធ្លាប់បានលើកឡើងថា នៅក្នុងអំឡុងពេលកូវីដ-១៩នេះ ពិតណាស់វាជាវិបត្តិមួយសម្រាប់កម្ពុជាក៏ដូចជាពិភពលោក ប៉ុន្ដែក្នុងនាមជាអ្នកវិនិយោគ ក៏ដូចជាអ្នកជំនួញ យើងក៏មិនត្រូវផ្ដេតផ្ដួលរមួលផ្សំគ្រិចទៅតាមស្ថានភាពនេះនោះទេ។ អ្នកវិនិយោគ ក៏ដូចជាអ្នកជំនួញត្រូវមានភាពច្នៃប្រឌិត ភាពបន់បែនក្នុងការប្រតិបត្តិការអាជីវកម្មរបស់ខ្លួន ដើម្បីសម្របខ្លួនរស់នៅក្នុងវិបត្តិនាពេលនេះ។អ្នកឧកញ៉ា សៀ ឫទ្ធី គូសបញ្ជាក់ទៀតថា បើសិនជាអ្នកវិនិយោគ ឬអ្នកជំនួញយកកូវីដ១៩ គឺជាលេស នោះច្បាស់ណាស់មុខជំនួញ ក៏ដូចជាការវិនិយោគនោះ ពិតជាបរាជ័យជាក់ជាពុំខានឡើយ។
ជាមួយគ្នានេះ អ្នកឧកញ៉ា លី ហួរ ប្រធានក្រុមប្រឹក្សាភិបាលនៃក្រុមហ៊ុន លី ហួរ គ្រុប ដែលទើបតែបានសម្ពោធបើការដ្ឋានសាងសង់គម្រោងបុរីដ៏ធំមួយទៀតនៅអំឡុងពេលកូវីដ-១៩រាតត្បាតនេះ បានលើកឡើងដែរថា អ្នកវិនិយោគ ឬម្ចាស់ក្រុមហ៊ុនត្រូវហ៊ានបោះទុន ឬវិនិយោគ ជាមួយភាពបទបែនដើម្បីរៀនរស់នៅក្នុងក្នុងអំឡុងវិបត្តិកូវីដ-១៩ ព្រោះវាក៏ជាការជួយផ្តល់ការងារជូនពលរដ្ឋ ក៏ដូចជាលើកកម្ពស់ និងស្តារសេដ្ឋកិច្ចជាតិផងដែរ។ បើតាមមហាសេដ្ឋីដែលក្ដោបក្ដាប់មុខជំនួញពហុវិស័យនៅកម្ពុជារូបនេះ បានគូសបញ្ជាក់ទៀតថា អ្នកជំនួញ និងពលរដ្ឋទាំងអស់ថា ត្រូវតែចេះរៀនរស់ជាមួយកូវីដ-១៩ បើពុំដូចនោះទេ អត្រាអ្នកអត់ការងារធ្វើរបស់ប្រជាជនកម្ពុជានឹងអាចកើនឡើងកាន់តែខ្ពស់។
តួយ៉ាង គម្រោងវិមានភ្នំពេញទី១២ ដែលទើបសម្ពោធបុកគ្រឹះសាងសង់នៅដំណាច់ខែមិថុនាកន្លងទៅនេះ របស់អ្នកឧកញ៉ា អាចផ្តល់ការងារដល់បុគ្គលិក និងកម្មកររាប់ពាន់នាក់ ហើយវាជាប្រភពចំណូលដល់ពួកគេក្នុងការទ្រទ្រង់ និងដោះស្រាយជីវភាពគ្រួសារបានមួយកម្រិតនៅក្នុងវិបត្តិកូវីដ-១៩ នេះ។
ឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមជំរុញឲ្យម្ចាស់សហគ្រាសធុនតូច និងមធ្យមទាំងអស់ត្រូវចេះរៀនរស់ក្នុងវិបត្តិកូវីដ-១៩ កុំរង់ចាំរហូតចប់កូវីដ-១៩ ទើបចាប់ផ្តើមដំណើរការអាជីវកម្ម នោះវានឹងយឺតពេល។ ទន្ទឹមនឹងនេះ លោកឧកញ៉ា បានផ្តល់ជាគំនិតថា ម្ចាស់អាជីវកម្មត្រូវចេះរិះរកវិធី និងបត់បែនតាមកាលៈទេសៈ តាមរយៈការផ្លាស់ប្តូរមុខទំនិញ ឬសេវាកម្ម ដែលអាចឆ្លើយតបនឹងបរិបទកូវីដ-១៩។
ប្រធានសម្ព័ន្ធសមាគមសហគ្រាសធុនតូច និងមធ្យមរូបនេះកត់សម្គាល់ឃើញថា ការឆ្លងរាលដាលជំងឺកូវីដ-១៩ បានបង្កផលប៉ះពាល់ភាគច្រើនចំពោះសហគ្រាស ដែលរកស៊ីពាក់ព័ន្ធវិស័យទេសចរណ៍ ខណៈសហគ្រាសដែលរកស៊ីលើវិស័យកែច្នៃ និងម្ហូបអាហារមិនសូវរងផលប៉ះពាល់នោះទេ។
ឧកញ៉ា កែវ មុំ អគ្គនាយិកាក្រុមហ៊ុន លីលី គ្រុប បានលើកឡើងថា នៅក្នុងវិបត្តិកូវីដ-១៩នេះ អាជីវកម្មភាគច្រើនគឺរងផលប៉ះពាល់ ប៉ុន្ដែក៏មានអាជីវកម្មមួយចំនួនតូច ក៏បានទទួលប្រាក់ចំណូលកើនឡើងអំឡុងពេលនេះដែរ ពិសេសអាជីវកម្មដែលទាក់ទងនឹងការផ្គត់ផ្គង់សម្ភារសម្រាប់ការពារការឆ្លងកូវីដ-១៩ និងការសេវាដឹកជញ្ជូនអាហារជាដើម។
ឧកញ៉ា កែវ មុំបន្ថែមថា ក្នុងកាលៈទេសៈពេលនេះ អាជីវកម្មរបស់លោកស្រីមិនទាន់មានការពង្រីកប្រតិបត្តិការបន្ថែមទេ ពោលគឺនៅផលិតតាមតម្រូវការទីផ្សារជាក់ស្ដែងនាពេលបច្ចុប្បន្ននេះសិន។ ទោះយ៉ាងណា អ្នកជំនួញនៅក្នុងវិស័យឧស្សហកម្មចំណីអាហាររូបនេះ លើកឡើងថា កាលៈទេសៈកូវីដ-១៩ វាក៏បានផ្ដល់ពេលវេលាសម្រាប់ឲ្យក្រុមហ៊ុនក៏ដូចជាអាជីវកម្មនីមួយៗ ក្នុងការពង្រឹងប្រព័ន្ធគ្រប់គ្រងអាជីវកម្មឡើងវិញ ដើម្បីឲ្យកាន់តែប្រសើរឡើងខិតទៅរកស្ដង់ដារអាជីវកម្ម ដើម្បីពង្រឹងសមត្ថភាពកាន់តែខ្លាំងនៅក្រោយកូវីដ-១៩។
គួររំឭកថា សម្តេចនាយករដ្ឋមន្ត្រី ហ៊ុន សែន បាន បានថ្លែងនៅក្នុងកិច្ចប្រជុំពិសេសតាមប្រព័ន្ធវីដេអូ ដើម្បីពិភាក្សា និងដោះស្រាយទៅលើបញ្ហាជំងឺកូវីដ-១៩នៅព្រឹកថ្ងៃទី១ កក្កដា ឆ្នាំ២០២១ បញ្ជាក់អះអាងថា កម្ពុជាមិនទាន់អាចបញ្ចប់ការឆ្លងរាលដាលនៃជំងឺកូវីដ-១៩ ក្នុងព្រឹត្តិការណ៍សហគមន៍ ២០កុម្ភៈ បាននោះទេ។ បើតាម សម្តេចតេជោ ព្រឹត្តិការណ៍នេះ នឹងបន្តអូសបន្លាយយូរបន្ថែមទៀត ដែលទាមទារឲ្យពលរដ្ឋ និងអាជ្ញាធរត្រូវបង្កើនការប្រុងប្រយ័ត្ន និងចាត់វិធានការទប់ស្កាត់ឲ្យបានម៉ឺងម៉ាត់បំផុត។
នៅរយៈពេលប៉ុន្មានថ្ងៃចុងក្រោយនេះ ចំនួនអ្នកឆ្លងកូវីដ-១៩ករណីថ្មីនៅកម្ពុជាបានហក់ឡើងខ្ពស់ដល់រង្វង់ ១ពាន់នាក់ក្នុងថ្ងៃ ដែលជាតួលេខខ្ពស់បំផុតតាំងពីមានផ្ទុះរាតត្បាតកូវីដ-១៩លើកដំបូងមក។ គិតមកទល់ពេលនេះ កម្ពុជាមានអ្នកឆ្លងកូវីដ-១៩សរុប កើនដល់ ជាង៥ម៉ឺននាក់ហើយ និងអ្នកស្លាប់វិញកើនដល់ជាង៦០០នាក់។
ប្រមុខរាជរដ្ឋាភិបាលកម្ពុជា ក៏បានបង្ហាញក្តីបារម្ភចំពោះមេរោគបំប្លែងខ្លួនថ្មី(ឌែលតា) ដែលកំពុងមានវត្តមាននៅកម្ពុជាផងដែរ ដ្បិតមេរោគបំប្លែងខ្លួនថ្មីនេះ មានកម្រិតនៃការឆ្លងខ្ពស់ និងកាចសាហាវជាងមុនដែលអាចបង្កគ្រោះថ្នាក់ដល់អាយុជីវិតអ្នកជំងឺគ្រប់ពេលវេលា។ ទន្ទឹមនឹងនេះ សម្តេចតេជោ ហ៊ុន សែន ក៏បញ្ជាឲ្យអាជ្ញាធរត្រូវបង្កើនការរឹតបន្តឹងការចេញចូលតាមផ្លូវអាកាស ព្រំដែនគោក និងព្រំដែនទឹកឲ្យហ្មត់ចត់បំផុត៕
