រដ្ឋាភិបាលឡាវបានសម្រេចបង្រួមក្រសួងពី១៧មកនៅត្រឹម១៣ ដែលជាកិច្ចខិតខំប្រឹងប្រែងមួយ ដើម្បីបង្កើនប្រសិទ្ធភាពការងារ កាត់បន្ថយការចំណាយ និងប្រយុទ្ធប្រឆាំងអំពើពុករលួយ។ ផែនការកាត់បន្ថយចំនួនក្រសួងនេះទទួលបានការបោះឆ្នោតគាំទ្រទាំងស្រុងពីសមាជិកសភាឡាវទាំង១៥៦រូបកាលពីថ្ងៃទី២០ ខែមីនា ឆ្នាំ២០២៥ នៅក្នុងសម័យប្រជុំវិសាមញ្ញលើកទី២ នៃនីតិកាលទី៩របស់រដ្ឋសភា។ ជាមួយគ្នានេះរដ្ឋាភិបាលឡាវ ក៏បានធ្វើកំណែទម្រង់ដោយផ្តល់អំណាចដល់រដ្ឋបាលមូលដ្ឋាន ពង្រីកអាយុចូលនិវត្តន៍សម្រាប់មន្ត្រីរាជការ និងអនុម័តការលើកលែងពន្ធសម្រាប់អ្នកវិនិយោគក្នុងតំបន់អភិវឌ្ឍន៍ទីក្រុងឆ្លាតវៃផងដែរ។
ក្រោមរចនាសម្ព័ន្ធថ្មី ក្រសួងផែនការ និងវិនិយោគត្រូវបានបញ្ចូលគ្នាជាមួយក្រសួងហិរញ្ញវត្ថុ ខណៈក្រសួងថាមពល និងរ៉ែត្រូវបានរួមបញ្ចូលគ្នាជាមួយក្រសួងឧស្សាហកម្ម និងពាណិជ្ជកម្ម រីឯក្រសួងធនធានធម្មជាតិ និងបរិស្ថានត្រូវបានបញ្ចូលគ្នាជាមួយក្រសួងកសិកម្ម និងរុក្ខាប្រមាញ់។ ដោយឡែក ក្រសួងមហាផ្ទៃត្រូវបានរំលាយ ហើយអង្គភាពនានានៅក្នុងក្រសួងនេះត្រូវបានបែងចែកទៅតាមអង្គភាពផ្សេងៗ ដោយអង្គភាពដែលនៅសល់ខ្លះ ត្រូវបានដាក់នៅក្រោមគណៈកម្មាធិការបុគ្គលិក និងអង្គការនៃគណៈកម្មាធិការមជ្ឈិមបក្ស ខណៈមុខងារអភិបាលកិច្ច និងរដ្ឋបាលដែនដី ត្រូវបានផ្ទេរទៅនៅក្រោមការិយាល័យនាយករដ្ឋមន្ត្រី និងក្រសួងពាក់ព័ន្ធផ្សេងទៀត។
ជាមួយគ្នានេះ ក្រសួងព័ត៌មាន វប្បធម៌ និងទេសចរណ៍ត្រូវបានរៀបចំឡើងវិញ ដោយវិស័យព័ត៌មានត្រូវបានគ្រប់គ្រងដោយក្រុមប្រឹក្សាឃោសនា និងបណ្តុះបណ្តាលរបស់គណៈកម្មាធិការមជ្ឈិមបក្ស ហើយ ក្រសួងត្រូវប្តូរឈ្មោះជាក្រសួងវប្បធម៌ និងទេសចរណ៍។
ដោយៈ សរ សុជាតិ
