រដ្ឋាភិបាលឡាវ កាលពីថ្ងៃទី១៩ ខែមីនា ឆ្នាំ២០២៤ បានចេញក្រឹត្យមួយ ដោយប្រកាសថា រដ្ឋាភិបាលនឹងដំឡើងពន្ធលើតម្លៃបន្ថែមឱ្យដល់១០% ពីកម្រិត៧% ដែលកំពុងអនុវត្តបច្ចុប្បន្ន។ ប៉ុន្តែក្រឹត្យនេះមិនបានផ្ដល់ព័ត៌មានលម្អិតជាក់លាក់ទាក់ទងនឹងកាលបរិច្ឆេទ នៃការអនុវត្តផែនការនេះនោះទេ។ បើតាមការចុះផ្សាយរបស់សារព័ត៌មាន Laotian Time បច្ចុប្បន្នក្រឹត្យនេះ កំពុងរង់ចាំការអនុម័តយល់ព្រមពីស្ថាប័នមួយចំនួនដូចជាសភាជាតិ នាយកដ្ឋានពន្ធដារ និងក្រសួងយុត្តិធម៌ជាដើម។ ក្រឹត្យនេះនឹងចូលជាធរមានក្នុងរយៈពេល១៥ថ្ងៃ បន្ទាប់ពីស្ថាប័នទាំងនេះអនុម័តយល់ព្រម។
បើតាមផែនការថ្មីនេះបានកំណត់ថា អត្រាពន្ធលើតម្លៃបន្ថែម១០% នឹងអាចអនុវត្តបានចំពោះប្រតិបត្តិការជាច្រើនរួមទាំងការនាំចូលទំនិញ សេវាកម្មទូទៅ ការនាំចូលរ៉ែ និងការផ្គត់ផ្គង់ក៏ដូចជាការប្រើប្រាស់អគ្គិសនីផងដែរ។ ផែនការដំឡើងពន្ធអាករលើតម្លៃបន្ថែមនេះបានធ្វើឱ្យ ប្រជាពលរដ្ឋឡាវកំពុងមានការព្រួយបារម្ភពីការឡើងថ្លៃទំនិញ និងសេវាកម្មផ្សេងៗ និងការកើនឡើងអត្រាអតិផរណាដែលកំពុងកើនឡើងស្រាប់ហើយនោះ។
អត្តបទគួរអាន
ពលរដ្ឋឡាវបានលើកឡើងថា តម្លៃទំនិញប្រើប្រាស់គ្រប់យ៉ាងកំពុងកើនឡើង រួមទាំងទំនិញសំខាន់ៗ សេវាទឹកភ្លើង និងអាករលើតម្លៃបន្ថែមផងដែរ ខណៈដែលប្រាក់ឈ្នួលនៅមិនទាន់ប្រែប្រួលនៅឡើយទេ។ ពួកគេបានលើកជាសំណួរដោយបង្ហាញក្ដីបារម្ភថា តើគ្រួសាររបស់ពួកគេនឹងអាចមានលទ្ធភាពទិញផ្ទះបានដែរឬទេ នៅចំពេលមានបញ្ហាប្រឈមផ្នែកហិរញ្ញវត្ថុបែបនេះ?
ពាក់ព័ន្ធបញ្ហាប្រាក់ឈ្នួលនៅប្រទេសឡាវ ត្រូវបានគេរាយការណ៍ថា ក្រុមហ៊ុនជាច្រើននៅទីក្រុងវៀងចន្ទន៍ មិនទាន់ដំឡើងប្រាក់ឈ្នួលអប្បបរមារនៅឡើយទេ ទោះជាមានការអនុញ្ញាតពីរដ្ឋាភិបាលនៅឆ្នាំ២០២៣ ក៏ដោយ។ ហើយមកដល់ពេលនេះ មានតែក្រុមហ៊ុនចំនួន១០% នៅក្នុងរាជធានីនេះប៉ុណ្ណោះ ដែលបានគោរពតាមគោលការណ៍ណែនាំអំពីប្រាក់ឈ្នួលតាមការកំណត់របស់រដ្ឋាភិបាល៕
អត្ថបទ៖ សុខ ជា
None
