គណៈប្រតិភូនៃក្រុមហ៊ុនអាម៉េរិក ប្រហែល៦០ រួមទាំងក្រុមហ៊ុនធំៗដូចជា ប៊ូអ៊ីង និង ក្រុមហ៊ុន Meta ដែលកំពុងតែគ្រប់គ្រង Facebook បានចាប់ផ្តើមដំណើរទស្សនកិច្ចនៅក្នុង ប្រទេសវៀតណាម នៅសប្តាហ៍នេះ ក្នុងគោលបំណងស្វែងរកឱកាសវិនិយោគក្នុងវិស័យជាច្រើន រួមទាំងឧស្សាហកម្មបន្ទះឈីប និងឧស្សាហកម្មពាក់ព័ន្ធនឹងបញ្ញាសិប្បនិម្មិត។ សមាសសភាពគណៈប្រតិភូ ដែលចុះមកស្វែងយល់ពីសក្តានុពលសេដ្ឋកិច្ចវៀតណាមនៅឆ្នាំនេះ ត្រូវបានគេជឿថា សុទ្ធតែជាមន្រ្តីសំខាន់ៗ ដែលមិនធ្លាប់មានពីមុនមក។
គួរបញ្ជាក់ថា សហរដ្ឋអាម៉េរិក និងវៀតណាម កាលពីឆ្នាំ២០២៣ កន្លងទៅ បានលើកកម្ពស់ទំនាក់ទំនងទ្វេភាគីទៅជាភាពជាដៃគូយុទ្ធសាស្ត្រគ្រប់ជ្រុងជ្រោយ ហើយតាមរយៈគោលនយោបាយ និងកិច្ចសហប្រតិបត្តិការនេះ ក្រុមហ៊ុនអាម៉េរិកត្រូវបានគេមើលឃើញថា កំពុងថ្លឹងថ្លែងនូវឱកាសវិនិយោគបន្ថែមនៅក្នុងប្រទេសមួយនេះ។
អត្តបទគួរអាន
គណៈប្រតិភូនេះដឹកនាំដោយលោក ថេត អូស៊ូស ( Ted Osius) ប្រធានក្រុមប្រឹក្សាធុរកិច្ចអាម៉េរិក-អាស៊ាន និងជាអតីតឯកអគ្គរដ្ឋទូតសហរដ្ឋអាម៉េរិក ប្រចាំនៅវៀតណាម។ លោកអតីតឯកអគ្គរដ្ឋទូតអាម៉េរិករូបនេះ បានគូសបញ្ជាក់ពីការធ្វើឱ្យប្រសើរឡើងនូវទំនាក់ទំនងការទូតទ្វេភាគីរវាងប្រទេសទាំងពីរនៅក្នុងសន្និសីទសារព័ត៌មានមួយកាលពីថ្ងៃចន្ទ ដោយលើកឡើងថា ប្រទេសទាំងពីរមានការងារច្រើន ដែលត្រូវធ្វើរួមគ្នា ហើយក្រុមហ៊ុនឯកជននឹងទទួលបានឱកាសទាំងនោះ។
កាលពីឆ្នាំ២០២៣ ទីភ្នាក់ងារវិនិយោគបរទេសរបស់វៀតណាមរាយការណ៍ថា ការវិនិយោគផ្ទាល់ពីបរទេសនៅក្នុងប្រទេសវៀតណាម ជាពិសេសពីសហរដ្ឋអាម៉េរិក មានតម្លៃសរុបចំនួន៦២៦លានដុល្លារ ពោលគឺតិចជាងមួយភាគដប់ នៃចំនួនដែលបានវិនិយោគដោយប្រទេសដូចជាសិង្ហបុរី ជប៉ុន ហុងកុង និងចិនជាដើម៕
ដោយៈ សរ សុជាតិ
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
