លោក សាយ ពន្លឺចិត្តៈករុណា ម្ចាស់កសិដ្ឋាន និងសិប្បកម្ម ស្វីត រ៉ូយ៉ាល់ ផាយនេបផល ដែលមានទីតាំងនៅភូមិអូរឫស្សីកណ្តាល ឃុំអូរឫស្សីកណ្តាល ស្រុកសៀមបូក ខេត្តស្ទឹងត្រែង បានគូសបញ្ជាក់ថា ទីផ្សារម្នាស់ទឹកឃ្មុំ ក៏ដូចជាទឹកម្នាស់របស់លោកនាពេលបច្ចុប្បន្នមានភាពល្អប្រសើរខ្លាំងគួឲ្យកត់សម្គាល់ ដ្បិតមានការគាំទ្រច្រើនពីសំណាក់អតិថិជន។ ជាងនេះទៅទៀត ក្រោយពីទទួលបានដើមទុនសម្រាប់ពង្រីកកសិដ្ឋាន និងសិប្បកម្ម ពីធនាគារសហគ្រាសធនតូច និងមធ្យមកាលពីពេលថ្មីៗនេះរួចមក សិប្បកម្មរបស់លោកក៏កំពុងរៀបចំពង្រីករោងចក្រកែច្នៃទឹកម្នាស់ និងស្រាម្នាស់ឱ្យកាន់តែទំនើបផងដែរ ដែលនឹងអាចរៀបចំរួចរាល់នៅចុងខែឧសភាខាងមុននេះ។
បើតាម លោក ករុណា ក្រោយពីកន្លែងកែច្នៃស្រាម្នាស់នេះរួចរាល់ លោកនឹងផលិតស្រាម្នាស់ប្រមាណជាង ១ម៉ឺនដបសម្រាប់សាកល្បងលក់ក្នុងឆ្នាំដំបូងនេះ ហើយប្រសិនមានការគាំទ្រ និងតម្រូវការទីផ្សារច្រើនពីអតិថិជននោះ រោងចក្ររបស់លោកក៏មានលទ្ធភាពអាចផលិតបានចំនួនច្រើនដល់ជាងរាប់សែនដបក្នុងមួយឆ្នាំៗផងដែរ។ ខណៈការផលិតទឹកម្នាស់វិញ គឺអាចផលិតបានប្រមាណ ១ម៉ឺនដបក្នុងមួយថ្ងៃ។
អត្ថបទគួរអាន
ម្ចាស់កសិដ្ឋានដាំម្នាស់ទឹកឃ្មុំរូបនេះ បញ្ជាក់ឱ្យដឹងទៀតថា ក្នុងឆ្នាំ២០២៣នេះ លោកមានមហិច្ឆតា ពង្រីកផែនការដាំដុះម្នាស់ទឹកឃ្មុំបន្ថែមឱ្យបានចំនួន៣០ហិចតា បន្ថែមលើផ្ទៃដីចាស់ចំនួន១៨ ហិចតា ដែលនឹងអាចពង្រីកការដាំដុះឱ្យបានដល់ជាង១លានដើម ព្រមជាមួយនឹងការពង្រឹងគុណភាពកែច្នៃ និងវិចខ្ចប់ឲ្យកាន់តែល្អតាមស្តង់ដារផងដែរ។ យ៉ាងណាមិញ ម្នាស់ទឹកឃ្មុំ របស់លោក ករុណា គឺអាចលក់បានក្នុងតម្លៃចាប់ពី៥ពាន់រៀលឡើងទៅក្នុងមួយផ្លែទៅតាមទំហំ និងលក់បោះដុំចាប់ពី១០០គីឡូក្រាមឡើងទៅ ដោយក្នុង១គីឡូក្រាមមានតម្លៃប្រមាណ ៣ពាន់រៀល។ ហើយបច្ចុប្បន្នម្នាស់ទឹកឃ្មុំក្នុងកសិដ្ឋានរបស់លោក អាចលក់ចេញបានចន្លោះពី ៧០០គីឡូ ទៅ១តោនក្នុងមួយថ្ងៃៗ។
លោក សាយ ពន្លឺចិត្តៈករុណា បានបន្ថែមថា កន្លងមកម្នាស់ទឹកឃ្មុំរបស់លោក ក៏មានការចាប់អារម្មណ៍បញ្ជាទិញពីក្រៅប្រទេសផងដែរ ក៏ប៉ុន្តែរហូតមកទល់ពេលនេះនៅមានទាន់អាចនាំចេញទៅក្រៅប្រទេសបាននោះទេ ដោយលោកបានសង្កត់ធ្ងន់ថា ទាល់តែមានដៃគូសហការទើបអាចធ្វើការនាំចេញបាន ពីព្រោះថាដើមទុនសម្រាប់ធ្វើកិច្ចការងារនេះនៅមានកម្រិតនៅឡើយ។ លោក ករុណា បញ្ជាក់ទៀតថា រហូតមកទប់ពេលនេះ កសិដ្ឋាន និងសិប្បកម្ម ស្វីត រ៉ូយ៉ាល់ ផាយនេបផល បានចំណាយទុនអស់ប្រមាណជាង ៥៥ម៉ឺនដុល្លារហើយ ខណៈដែលលោកត្រូវការទុនប្រមាណ ២លានដុល្លារទៀត សម្រាប់ធ្វើការអភិវឌ្ឍសិប្បកម្មកែច្នៃទឹកម្នាស់ឱ្យមានលក្ខណៈបច្ចេកទេសទំនើប ដើម្បីទទួលបានទឹកម្នាស់ដែលមានស្តង់ដារ ទាំងការវេចខ្ចប់ ធានាបានទាំងគុណភាព និងរសជាតិជូនដល់អតិថិជន សម្រាប់លក់លើទីផ្សារក្នុងស្រុក និងអាចឈានដល់ការនាំចេញផងដែរ៕
