នាយករដ្ឋមន្ត្រីស្ដីទីថៃ ដាក់ញត្តិសុំរំលាយសភា ក្រោយគូប្រជែងទទួលបានការគាំទ្រពីគណបក្សប្រឆាំងដ៏ធំមួយ

អគ្គលេខាធិការគណបក្សភឿថៃលោក សូរ៉ាវង់ ធៀនថុង (Sorawong Thienthong) បានអះអាងថា នាយករដ្ឋមន្ត្រីស្ដីទីថៃលោក ភូមថាម វីឆាយ៉ាឆៃ បានសម្រេចដាក់ញត្តិសុំរំលាយសភានៅថ្ងៃពុធ សប្តាហ៍នេះ ខណៈពេលនេះគណបក្ស ដែលកំពុងកាន់អំណាចនេះកំពុងរង់ចាំការយល់ព្រមពីព្រះមហាក្សត្រ។ ការដាក់ញត្តិសុំរំលាយសភានេះ បានកើតឡើងភ្លាមៗក្រោយគណបក្សប្រជាជនថៃ ដែលជាបក្សប្រឆាំងដ៏ធំមួយនៅក្នុងសភាបានគាំទ្រគណបក្សភូមចៃថៃ (Bhumjaithai) ដែលជាគូប្រជែងនឹងគណបក្សភឿថៃ ដើម្បីបង្កើតរដ្ឋាភិបាលបន្ទាប់។

លោក ណាថាពុង រឿងផាន់យ៉ាវុត (Natthaphong Ruengpanyawut) មេដឹកនាំគណបក្សប្រជាជនថៃបានប្រាប់អ្នកសារព័ត៌មាននៅថ្ងៃពុធ សប្តាហ៍នេះថា សមាជិកសភាចំនួន១៤៣រូបរបស់លោកបានយល់ព្រមគាំទ្រមេដឹកនាំគណបក្សភូមចៃថៃ គឺលោក អានុទីន ឆានវីរ៉ាគុល (Anutin Charnvirakul) ដែលជាមហាសេដ្ឋីជំនួញមួយរូប ឱ្យធ្វើជានាយករដ្ឋមន្ត្រីថៃទី៣២ ដែលទំនងជាផ្តល់ឱ្យលោកនូវការគាំទ្រភាគច្រើននៅក្នុងសភា។

លោក ណាថាពុង បន្តថា ការសម្រេចគាំទ្រលោក អានុទីន ឱ្យធ្វើជានាយករដ្ឋមន្ត្រីនេះធ្វើឡើងក្រោយគណបក្សនេះព្រមទទួលយកលក្ខខណ្ឌរំលាយសភា ហើយរៀបចំការបោះឆ្នោតថ្មីឡើងវិញក្នុងរយៈពេល៤ខែ ដើម្បីឱ្យអំណាចអាចប្រគល់ទៅប្រជាជនវិញបានឆាប់តាមដែលអាចធ្វើទៅបាន។

លោកបានបន្ថែមថា ម្យ៉ាងទៀត ការណ៍ដែលគណបក្សរបស់លោកគាំទ្រគណបក្សភូមចៃថៃ គឺដើម្បីទប់ស្កាត់ការវិលត្រឡប់មកវិញនូវរដ្ឋាភិបាលចម្រុះដឹកនាំដោយគណបក្សភឿថៃ ដែលលោកអះអាងថា វាមិនសមនឹងគ្រប់គ្រងម្តងទៀតឡើយ។ ការបោះឆ្នោតសភាជ្រើសរើសសនាយករដ្ឋមន្ត្រីថៃថ្មី អាចនឹងធ្វើឡើងភ្លាមៗនៅថ្ងៃសុក្រ សប្ដាហ៍នេះ។ជុំវិញនឹងរឿងរ៉ាវពាក់ព័ន្ធនឹងនាយករដ្ឋមន្ត្រីស្ដីទីថៃ ដាក់ញត្តិសុំរំលាយសភានេះ ត្រូវបានតំណាងគណបក្ស ភូមចៃថៃ នៅថ្ងៃទី ៣ ខែកញ្ញានេះ បានដាក់ពាក្យបណ្តឹងប្រឆាំងនឹងនាយករដ្ឋមន្រ្តីចាំផ្ទះ លោក ផុមថាម វិឆាយ៉ាឆៃ ពីបទបំពានអំណាចរបស់គាត់ ពាក់ព័ន្ធនឹងការដាក់សំណើព្រះរាជក្រឹត្យថ្វាយទៅកាន់ព្រះមហាក្សត្រ ដើម្បីរំលាយសភា។ គណបក្សភូមចៃថៃ ក៏បានស្នើឲ្យមានការពង្រីកការស៊ើបអង្កេត ដើម្បីកាត់ទោសអ្នកពាក់ព័ន្ធទាំងអស់ក្នុងបទល្មើសនេះផងដែរ។ នេះបើតាមការរាយការណ៍ដោយកាសែតថៃ Khaosod នៅថ្ងៃទី ៣ ខែកញ្ញា ឆ្នាំ២០២៥៕

ដោយ៖ សុខ មង្គល