សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាគាំទ្រ និងជំរុញឱ្យមានការថតភាពយន្ត និងស្ប៉តពាណិជ្ជកម្មលក្ខណៈជាតិ និងអន្តរជាតិនៅតាមតំបន់ទេសចរណ៍នានា ជាពិសេសនៅតំបន់អង្គរក្នុងខេត្តសៀមរាប ដើម្បីជំរុញការផ្សព្វផ្សាយ និងទាក់ទាញភ្ញៀវទេសចរអន្តរជាតិ។ ទន្តឹមនឹងនេះប្រមុខរាជរដ្ឋាភិបាលជំរុញឱ្យក្រសួង និងស្ថាប័នពាក់ព័ន្ធផ្តល់កិច្ចសហការលើបញ្ហានេះ ពោលគឺត្រូវរៀបចំឱ្យមានកញ្ចប់លើកទឹកចិត្ត និងសម្រួលនីតិវិធីផ្សេងៗចំពោះក្រុមហ៊ុនភាពយន្តបរទេស ដែលមានបំណងចង់ថតភាពយន្តនៅកម្ពុជាឱ្យបានកាន់តែងាយស្រួលបន្ថែមទៀត។ សម្រាប់សម្តេចធិបតី ការថតភាពយន្តបរទេសលើទឹកដីកម្ពុជាមិនត្រឹមតែជួយផ្សព្វផ្សាយពីវិស័យទេសចរណ៍កម្ពុជានោះទេ ថែមទាំងជួយបង្កើនកិត្តិនាមកម្ពុជាលើឆាកអន្តរជាតិ និងលុបបំបាត់ព័ត៌មានអវិជ្ជមានអំពីកម្ពុជាផងដែរ។
ជាមួយគ្នានេះ លោក ហូ វណ្ឌី ទីប្រឹក្សាសមាគមទេសចរណ៍កម្ពុជាយល់ឃើញថា តាមរយៈការជំរុញឱ្យមានការថតភាពយន្តបរទេសនៅក្នុងតំបន់ទេសចរណ៍កម្ពុជានេះ ពិតជាបានផ្តល់ផលចំណេញយ៉ាងច្រើនក្នុងការជួយផ្សព្វផ្សាយអំពីវិស័យទេសចណ៍កម្ពុជាទៅកាន់បណ្តាប្រទេសលើពិភពលោក ខណៈកន្លងមកកម្ពុជាត្រូវចំណាយថវិការច្រើនលើការផ្សព្វផ្សាយនេះ។ ទន្ទឹមនឹងជួយផ្សព្វផ្សាយពីវិស័យទេសចរណ៍ ការថតភាពយន្តនេះ ក៏ជាផ្នែកមួយជួយផ្សព្វផ្សាយពីវប្បធម៌ ប្រពៃណី និងសិល្បៈរបស់កម្ពុជាទៅកាន់ពិភពលោកផងដែរ។ អ្នកជំនាញរូបនេះជឿជាក់ថា តាមរយៈកិច្ចសម្របសម្រួលរបស់រាជរដ្ឋាភិបាលកម្ពុជាចំពោះក្រុមហ៊ុនភាពយន្តនេះ នឹងជួយទាក់ទាញក្រុមហ៊ុនបរទេសជាច្រើនឱ្យចូលមកថតភាពយន្តនៅកម្ពុជា។
គួរជម្រាបថា ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍បានស្នើសុំឱ្យរាជរដ្ឋាភិបាលពិចារណាជំរុញការផ្សព្វផ្សាយទេសចរណ៍ និងបង្កើនកិត្តិនាមកម្ពុជាតាមរយៈការទាក់ទាញក្រុមហ៊ុនផលិតភាពយន្តល្បីៗមកថតនៅកម្ពុជា តាមរយៈការផ្តល់ជាគោលនយោបាយលើកទឹកចិត្ត និងការសម្រួលនីតិវិធីក្នុងការស្នើសុំការអនុញ្ញាតថតជាដើម។ ឯកឧត្តម បានបន្តថា កន្លងមកក្រសួងទេសចរណ៍បានសហការជាមួយក្រសួងស្ថាប័នពាក់ព័ន្ធ និងរដ្ឋបាលរាជធានីខេត្តជួយសម្របសម្រួលការថតភាពយន្តរបស់ក្រុមហ៊ុនផលិតភាពយន្តរបស់ចិន កាហ្សាក់ស្ថាន និងកំពុងទាក់ទាញក្រុមហ៊ុនផលិតភាពយន្ត សិល្បករ និងតន្ត្រីករល្បីៗពីប្រទេសចិន សាធារណរដ្ឋកូរ៉េ (K-pop), សហរដ្ឋអាម៉េរិក, អ៊ីតាលី, ឥណ្ឌ ជប៉ុន និងតួគីបន្ថែមទៀតផងដែរ៕
អត្ថបទ សោម ស្រីពេជ្រ និងរូបភាពឯកសារ
