បើតាមរបាយការណ៍ដែលបង្ហាញដោយនាយកដ្ឋានចរចាពាណិជ្ជកម្មនៃក្រសួងពាណិជ្ជកម្មថៃ នៅឆ្នាំ២០២១ ការដោះដូរពាណិជ្ជកម្មទ្វេភាគីរវាងកម្ពុជា និងប្រទេសថៃ មានទំហំទឹកប្រាក់សរុបប្រមាណ ៨ពាន់លានដុល្លារ ប្រៀបទៅនឹងឆ្នាំ២០២០ មានការកើនឡើង១០%។ របាយការណ៍ដដែលបង្ហាញទៀតថា ការនាំចេញទំនិញកម្ពុជា ទៅកាន់ប្រទេសថៃ នៅឆ្នាំ២០២១ មានតម្លៃត្រឹមតែជិត៩០០លានដុល្លារប៉ុណ្ណោះ ដែលមានការធ្លាក់ចុះ២២% ខណៈការនាំចូលទំនិញពីថៃមកកម្ពុជា មានដល់ប្រមាណជាង៧ ពាន់លានដុល្លារ បានកើនឡើងរហូត១៦% ដែលធ្វើឱ្យកម្ពុជាមានឱនភាពពាណិជ្ជកម្មជាមួយថៃដល់ទៅជាង៦ពាន់លានដុល្លារ។
យ៉ាងណាក៏ដោយ ឯកឧត្តម ស៊ាង ថៃ អ្នកនាំពាក្យនៃក្រសួងពាណិជ្ជកម្ម កម្ពុជា បានគូសបញ្ជាក់ថា សកម្មភាពនៃការដោះដូរទំនិញរវាងកម្ពុជា និងថៃ នៅតែដំណើរការជាធម្មតា បើទោះជាកន្លងមក មានការរំខានពីជំងឺកូវីដ១៩ ក៏ដោយចុះ។ ឯកឧត្តមគូសបញ្ជាក់ទៀតថា ស្ថិតក្នុងបរិបទកូវីដ១៩ ការនាំចេញចូល-ទំនិញ រវាងប្រទេសទាំងពីរមានវិសមភាពបន្តិចបន្តួចគឺជារឿងធម្មតា។
អត្ថបទគួរអាន
សូមបញ្ជាក់ថា កន្លងមក ទំនិញដែលកម្ពុជា បាននាំចេញទៅប្រទេសថៃ មានដូចជា ផលិតផលវាយនភណ្ឌ កសិផលត្បូងថ្មមានតម្លៃ វត្ថុធាតុដើម និងទំនិញពាក់កណ្តាលសម្រេច។ ខណៈប្រភេទមុខទំនិញដែលកម្ពុជា បាននាំមកពីថៃវិញ មានដូចជា ថាមពល ត្រី សាច់ បន្លែ និងផលិតផលសម្រេច ដូចជា រថយន្ត ជីសរីរាង្គ ស៊ីម៉ង់ ម្ហូបអាហារ ភេសជ្ជៈ គ្រឿងសំអាង និងសម្ភារសំណង់ ជាដើម។
សូមបញ្ជាក់ថា នៅក្នុងឆ្នាំ២០២២ ថៃរំពឹងថា នឹងបើកច្រកព្រំដែនដែលបានបិទក្នុងអំឡុងពេលផ្ទុះកូវីដ១៩ ចំនួន ១២ បន្ថែមទៀត។ ពោលគឺក្នុងចំណោមប៉ុស្តិ៍ត្រួតពិនិត្យចំនួនជិត ១០០កន្លែង ដែលប្រទេសថៃបានដាក់សម្រាប់ត្រួតពិនិត្យជាមួយប្រទេសម៉ាឡេស៊ី មីយ៉ាន់ម៉ា ឡាវ និងកម្ពុជា គឺទើបតែមាន ៤៨ កន្លែងប៉ុណ្ណោះ ដែលត្រូវបានបើកឡើងវិញសម្រាប់ពាណិជ្ជកម្មឆ្លងព្រំដែន។ ដូច្នេះ ក្រោយពេលដែលថៃបើកច្រកព្រំដែនកាន់តែច្រើន នោះនឹងធ្វើឲ្យការដោះដូរពាណិជ្ជកម្មរវាងថៃ ជាមួយប្រទេសជិតខាងរួមទាំងកម្ពុជានឹងកើនឡើងកាន់តែច្រើនថែមទៀតដែរ៕
None
