ខណៈដែលបច្ចុប្បន្ននេះប្រទេសអ្នកមានជាច្រើននៅលើពិភពលោក កំពុងជួបប្រទះបញ្ហាខ្វះវ៉ាក់សាំងកូវីដ-១៩ មានប្រទេសក្រីក្រខ្លះទៀតបារម្ភខ្លាចថា ខ្លួននឹងមិនអាចទទួលបានវ៉ាក់សាំងកូវីដ-១៩ ទាល់តែសោះ។ ព្រោះអ្វី? ព្រោះការផលិតវ៉ាក់សាំង និងការផ្គត់ផ្គង់ កំពុងក្លាយជាចំណោទបញ្ហាមួយ។
វ៉ាក់សាំងរបស់ចិន និងរុស្ស៊ី នៅគ្រាដំបូងត្រូវបានមើលរំលងដោយប្រទេសលោកខាងលិច និងសារព័ត៌មានសកលលោកផ្សេងទៀត ដោយសារតែមានការយល់ឃើញមួយផ្នែកថា វ៉ាក់សាំងដែលផលិតដោយប្រទេសទាំងនេះ អន់ជាងវ៉ាក់សាំងដែលផលិតដោយក្រុមហ៊ុនអាមេរិក Moderna, Pfizer-BioNtech ឬ AstraZeneca ផលិតដោយក្រុមហ៊ុនអង់គ្លេសជាដើម។ ការយល់ឃើញបែនេះ ហាក់ដូចជាកើនឡើងដោយសារតែចិន និងរុស្ស៊ីជាប្រទេសមានការដឹកនាំបែបផ្ដាច់ការ។ ក៏ប៉ុន្ដែបើមើលទៅភស្ដុតាងដែលប្រមូលបានមួយរយៈមកនេះ ឃើញថាវ៉ាក់សាំងពីប្រទេសទាំងនេះ ក៏មានដំណើរការល្អដែរ។ ជាក់ស្ដែង តាមការចុះផ្សាយដោយ ស្ថាប័នព័ត៌មានស្រាវជ្រាវផ្នែកសុខាភិបាល The Lancet បានឲ្យដឹងថា វ៉ាក់សាំង Sputnik V របស់រុស្ស៊ី គឺនប្រសិទ្ធភាពដល់ទៅជាង៩១%។
ចំពោះវ៉ាក់សាំងចិនវិញ ប្រទេសធំៗដូចជា អេមីរ៉ាតអារ៉ាប់រួម, បារ៉ែន, អេហ្ស៊ីប, និងប្រទេសផ្សេងៗទៀត រួមទាំងកម្ពុជាផងដែរនោះ បានអនុញ្ញាតឲ្យប្រើប្រាស់វ៉ាក់សាំងចិនប្រភេទ Sinopharm ខណៈដែលវ៉ាក់សាំងរបស់ចិនមួយទៀត គឺ Sinovac និង វ៉ាក់សាំង ស្ពាត់និច (Sputnik V) របស់រុស្ស៊ីក៏ត្រូវបានអនុញ្ញាតឲ្យប្រើប្រាស់នៅប្រទេសជាច្រើនក្នុងតំបន់អឺរ៉ុប អាស៊ីកណ្ដាល អាហ្វ្រិក និងអាមេរិកឡាទីនផងដែរ។
ឥឡូវនេះ ការផ្គត់ផ្គត់វ៉ាក់សាំងទៅកាន់ប្រទេសមួយចំនួនហាក់មានភាពយឺតយ៉ាវដោយសារតែការផលិត មិនគ្រប់គ្រាន់តាមតម្រូវការ។ ជាក់ស្ដែង នៅប្រទេសបារាំង អេស្ប៉ាញ និងអាល្លឺម៉ង់ កំពុងប្រឈមនឹងការខ្វះវ៉ាក់សាំង ហើយក៏កំពុងចាប់ផ្ដើមចរចាដើម្បីអាចផ្លាស់ប្ដូរការបញ្ជាទិញទៅរកការទិញវ៉ាក់សាំងពីចិន និងរុស្ស៊ីដែរ ។
អត្ថបទទាក់ទង
បែបនេះក្ដី ការសង្ស័យពីប្រសិទ្ធភាពវ៉ាក់សាំងចិន និងរុស្ស៊ីនៅតែមាន។ មានការសិក្សាមួយដោយស្ថាប័ន YouGov បានធ្វើការសាកសួរទៅកាន់មនុស្សជិត២ម៉ឺននាក់ នៅក្នុងប្រទេសចំនួន១៧ អំពីទស្សនៈចំពោះភាពវិជ្ជមាន និងអវិជ្ជមាននៃគុណភាពវ៉ាក់សាំង ជាលទ្ធផលឃើញថា វ៉ាក់សាំងរបស់រុស្ស៊ី ចិន និងឥណ្ឌាគឺត្រូវបានចាត់ចំណាត់ថ្នាក់ទាបបំផុត។
ទោះជាបែបនេះក្ដី ជាលទ្ធផលសម្រាប់សាកល្បងចាក់នៅប្រទេសអារ៉ាប់រួម កាលពីដើមខែធ្នូបានបង្ហាញថា វ៉ាក់សាំង Sinopharm របស់ចិនមានប្រសិទ្ធភាព៨៨% ខណៈនៅប្រទេសផ្សេងទៀត រួមទាំងចិនផងបង្ហាញថាមានប្រសិទ្ធភាព៧៩%។
ចំពោះវ៉ាក់សាំង Sinovac របស់ចិនវិញ លទ្ធផលសាកល្បងនៅតួកគី បង្ហាញថាមានប្រសិទ្ធភាព ៩១%, នៅឥណ្ឌូនេស៊ីមាន៦៥% និងនៅប្រេស៊ីលមានប្រមាណ៥០%។
សម្រាប់វ៉ាក់សាំងចិន និងរុស្ស៊ី ហាក់ដូចជាមិនមានព័ត៌មានអ្វីត្រូវសង្ស័យទេ ប៉ុន្ដែសម្រាប់វ៉ាក់សាំងដែលត្រូវបានផលិតនៅបណ្ដាប្រទេសលោកខាងលិចខ្លះ នៅមិនទាន់បង្ហាញព័ត៌មានលម្អិត ឬទិន្នន័យដើម ចំពោះការសាកល្បងនោះទេ ដូចជាវ៉ាក់សាំង Pfizer-BioNTech និង Moderna ជាដើមគឺមិនមានទិន្នលម្អិតបង្ហាញទេ សូម្បីតែផ្ដល់ទៅឲ្យអ្នកស្រាវជ្រាវ។
តាមរយៈការវិភាគលើទិន្នន័យចុងក្រោយរបស់អ្នកជំនាញពីក្រុមហ៊ុន Airfinity បានឲ្យដឹងថា វ៉ាក់សាំង Sinovac នៅឆ្នាំនេះ បានចុះហត្ថលេខាដើម្បីនាំចេញទៅកាន់ប្រទេសចំនួន១២ ក្នុងចំនួនលើស ៣៥០លានដូស ខណៈដែលវ៉ាក់សាំង Sinopharm មានកិច្ចសន្យាលក់ទៅឲ្យប្រទេសចំនួន១១ ក្នុងចំនួន១៩៤លានដូស។ រីឯ វ៉ាក់សាំង Sputnik V របស់រុស្ស៊ីវិញ មានចុះហត្ថលេខាលក់ទៅឲ្យប្រទេសចំនួន១៧ ក្នុងចំនួនប្រហែល៤០០លានដូស។
ក្រុមហ៊ុនផលិតវ៉ាក់សាំងទាំងបី របស់ចិន និងរុស្ស៊ីខាងលើនេះ ត្រូវបានគេដឹងថា ក្រុមហ៊ុននីមួយៗ មានសមត្ថភាពផលិតវ៉ាក់សាំងប្រមាណ១ពាន់លានដូសនៅឆ្នាំ ២០២១នេះ៕
None
