យោងតាមរបាយការណ៍ស៊ើបអង្កេតមួយចេញផ្សាយកាលពីសប្តាហ៍មុនបានបង្ហាញថា ប្រទេសដែលជាប់ឈ្មោះក្នុងចំណោមប្រទេសកំពូលទាំង៥ ដែលផលិតប្រេងច្រើនជាងគេបំផុតក្នុងពិភពលោករួមមាន អ៊ីរ៉ាក់ កាណាដា រុស្ស៊ី អារ៉ាបីសាអូឌីត និងសហរដ្ឋអាម៉េរិក ខណៈមហាយក្សចិនជាប់លេខ៦ឯណោះ។
ក្នុងនោះចំណាត់ថ្នាក់លេខ៥ បានទៅលើប្រទេសអ៊ីរ៉ាក់ ដែលជាមធ្យមផលិតប្រេងបានជាង៤លាន៥សែនបារ៉ែល ក្នុងមួយថ្ងៃ និងមានចំណែកគ្របដណ្ដប់ក្នុងរង្វង់៤៨% នៃទីផ្សារផលិតប្រេងទូទាំងពិភពលោក ហើយប្រទេសនេះពឹងផ្អែកខ្លាំងលើការផលិត និងនាំចេញប្រេង។ រីឯចំណាត់ថ្នាក់លេខ៤ បានទៅលើប្រទេសកាណាដា ដែលផលិតប្រេងជាមធ្យមបានប្រមាណជិត៥លាន៦សែនបារ៉ែលក្នុងមួយថ្ងៃ និងមានចំណែកគ្របដណ្ដប់៥,៩%នៃទីផ្សារផលិតប្រេងទូទាំងពិភពលោក។
ចំណែកចំណាត់ថ្នាក់លេខ៣ បានទៅលើប្រទេសរុស្ស៊ី ដែលមានផ្ទៃដីធំបំផុតរបស់ពិភពលោក ដោយប្រទេសនេះផលិតប្រេងជាមធ្យមបានជាង១១លាន២សែនលានបារ៉ែលក្នុងមួយថ្ងៃ និងមានចំណែកគ្របដណ្ដប់១១,៩%នៃទីផ្សារផលិតប្រេងទូទាំងពិភពលោក។
អត្ថបទគួរអាន
ចំណាត់ថ្នាក់លេខ២ បានទៅលើប្រទេសអារ៉ាប៊ីសាអូឌីត ដែលផលិតប្រេងជាមធ្យមជាង១២លានបារ៉ែលក្នុងមួយថ្ងៃ និងមានចំណែកគ្របដណ្ដប់១២,៩%នៃទីផ្សារផលិតប្រេងទូទាំងពិភពលោក។
អារ៉ាប៊ីសាអូឌីត គឺជាប្រទេសធំបំផុតនៅតំបន់មជ្ឈិមបូព៌ាបើគិតពីផ្ទៃដី ហើយវាក៏ជាប្រទេសនាំចេញប្រេងធំបំផុតមួយផងដែរ។ហើយចុងក្រោយគឺចំណាត់ថ្នាក់លេខ១ បានទៅលើសហរដ្ឋអាម៉េរិក ដែលផលិតប្រេងជាមធ្យមបានជិត១៨លានបារ៉ែលក្នុងមួយថ្ងៃ និងមានចំណែកគ្របដណ្ដប់ដល់ទៅ១៨,៩%នៃទីផ្សារផលិតប្រេងទូទាំងពិភពលោក។
ឧស្សាហកម្មប្រេងនៅក្នុងសហរដ្ឋអាម៉េរិក សម្រេចបានកំណើនរឹងមាំគួរឱ្យកត់សម្គាល់ ហើយឧស្សាហកម្មនេះ ក៏ផ្ដល់ការងារដល់មនុស្សរាប់លាននាក់នៅទូទាំងប្រទេសមហាអំណាចធំបំផុតមួយនេះផងដែរ។
ដោយឡែក មហាយក្សចិន មិនស្ថិតក្នុងចំណាត់ថ្នាក់កំពូលទាំង៥ទេ ដោយជាប់ចំណាត់ថ្នាក់លេខ៦ ជាមួយនឹងការផលិតប្រេងជាមធ្យមជាង៤លាន១សែនបារ៉ែលក្នុងមួយថ្ងៃ និងមានចំណែកគ្របដណ្ដប់៤,៤% នៃទីផ្សារផលិតប្រេងទូទាំងពិភពលោក៕
ដោយ: តែម សុខុម
None
