កំណើនចលនាដើរលេងកម្សាន្តរបស់ភ្ញៀវទេសចរផ្ទៃក្នុង ត្រូវបានអ្នកជំនាញក្នុងវិស័យទេសចរណ៍ ចាត់ទុកជាសញ្ញាបង្ហាញពីការកម្រើកឡើងវិញនៃវិស័យទេសចរណ៍ បន្ទាប់ពីវិស័យនេះបានរងឥទ្ធិពលពីវិបត្តិជំងឺកូវីដ-១៩ និងវិបត្តិសកលមួយចំនួន។
លោក ធួន ស៊ីណាន ប្រធានសមាគមន៍ទេសចរណ៍អាស៊ីប៉ាស៊ីហ្វិកកម្ពុជា យល់ឃើញថា ការធ្វើដំណើរកម្សាន្តក្នុងពិធីបុណ្យចូលឆ្នាំខ្មែរ ឬមហាសង្រ្កាន្ត នឹងចូលរួមចំណែកដល់ការអភិវឌ្ឍចរន្តសេដ្ឋកិច្ចជាតិបានមួយរយៈពេលខ្លី តាមរយៈការផ្លាស់ប្ដូរភ្ញៀវទេសចរពីតំបន់មួយទៅតំបន់មួយ។ សម្រាប់អ្នកជំនាញរូបនេះ កម្ពុជាត្រូវតែធ្វើឱ្យវិស័យទេសចរណ៍មានសកម្មភាពជារៀងរាល់ថ្ងៃ តាមរយៈការត្រួតពិនិត្យឡើងវិញក្នុងការបង្កើតកន្លែងកម្សាន្តថ្មីៗបន្ថែមទៀត និងមិនត្រូវផ្ដោតតែលើតំបន់ទេសចរណ៍បែបសម្បត្តិវប្បធម៌មួយមុខនោះទេ។ អ្នកជំនាញរូបនេះ យល់ឃើញថា នៅតាមបណ្ដាខេត្តនីមួយៗគួរតែបង្កើតអត្តសញ្ញាណរបស់ខ្លួន តាមរយៈការបង្កើតផលិតផលទេសចរណ៍ថ្មីៗ ដើម្បីប្រគួតប្រជែងទាក់ទាញចំណាប់អារម្មណ៍របស់ភ្ញៀវទេសចរក្នុងរង្វង់ខេត្តទៅវិញទៅមក។
អត្ថបទគួរអាន
ជាមួយគ្នានេះ លោក ហូ វណ្ឌី ទីប្រឹក្សាសមាគមទេសចរណ៍កម្ពុជា យល់ឃើញថា ទោះបីឆ្នាំនេះ កម្ពុជា មិនបានរៀបចំព្រឹត្តិការណ៍អង្គរសង្រ្កាន្ត នៅខេត្តសៀមរាប ក៏ដោយ តែនៅតាមបណ្ដាខេត្តនានា នឹងរៀបចំធ្វើរៀងៗខ្លួន ដែលវានឹងក្លាយជាមហាសង្រ្កាន្តខ្មែរ។ អ្នកជំនាញរូបនេះ ជឿជាក់ថា តាមរយៈមហាសង្រ្កាន្តខ្មែរនឹងជួយជំរុញឱ្យអ្នកទេសចរដើរកម្សាន្តនៅតាមតំបន់ខេត្តគោលដៅទេសចរណ៍នានា ដែលវានឹងក្លាយជាផ្នែកមួយក្នុងការជួយលើកកម្ពស់ និងធ្វើឱ្យចរន្តសេដ្ឋកិច្ចទាំងមូលមានដំណើរការល្អ។ បើតាមអ្នកជំនាញរូបនេះ នៅក្នុងពិធីបុណ្យចូលឆ្នាំខ្មែរ អ្នកដើរកម្សាន្តម្នាក់អាចនឹងចំណាយថវិកាយ៉ាងតិចចំនួន៤០ដុល្លារ ដែលនេះ គឺជាផ្នែកមួយជួយដល់អាជីវកម្មទេសចរណ៍ រួមមាន អាជីវកម្មស្នាក់នៅ និងអាហារដ្ឋានជាដើម។
កំណើនចលនាដើរលេងកម្សាន្តរបស់ភ្ញៀវទេសចរផ្ទៃក្នុង ត្រូវបានអ្នកជំនាញក្នុងវិស័យទេសចរណ៍ចាត់ទុកជាសញ្ញាបង្ហាញពីការកម្រើកឡើងវិញនៃវិស័យទេសចរណ៍ បន្ទាប់ពីវិស័យនេះ បានរងឥទ្ធិពលពីវិបត្តិជំងឺកូវីដ-១៩ និងវិបត្តិសកលមួយចំនួន។ អ្នកជំនាញរំពឹងថា កំណើនចលនាដើរលេងកម្សាន្តរបស់ទេសចរផ្ទៃក្នុងនេះ វានឹងក្លាយជាជំហានមួយឈានទៅសម្រេចនូវគោលនយោបាយរបស់រាជរដ្ឋាភិបាលកម្ពុជាក្នុងការស្ដារវិស័យទេសចរណ៍ឡើងវិញនៅឆ្នាំ២០២៤ នេះ ផងដែរ៕
អត្ថបទ៖ បូ ដូឡា
None
