ក្រុមហ៊ុនអាកាសយានដ្ឋានថៃ បានព្យាករទុកថា ភ្ញៀវទេសចរអន្តរជាតិ និងប្រាក់ចំណូលនឹងបាត់បង់ជាង ៥០% ក្នុងឆ្នាំ ២០២០នេះ ហើយបន្តធ្លាក់ចុះដល់ ៤២% ទៀត ក្នុងឆ្នាំ ២០២១ខាងមុខ រហូតដល់ឆ្នាំ ២០២៣ វិស័យទេសចរណ៍ថៃ នឹងវិលមករកសភាពប្រសើរឡើងដូចធម្មតាបាន។
អាកាសយានដ្ឋានថៃ ដែលគ្រប់គ្រងលើ អាកាសយានដ្ឋានធំៗ ទាំង ៦ របស់ប្រទេសថៃ រួមមានទាំង អាកាសយានដ្ឋានសុវណ្ណភូមិ បានធ្វើការប៉ាន់ប្រមាណថា ភាពស្ទុះងើបឡើងវិញនៃវិស័យទេសចរណ៍នៅក្នុងឆ្នាំ ២០២៣ខាងមុខ គេរំពឹងថាអាចទទួលបានអ្នកដំណើរជាង ១៤៤លាននាក់ និងមានជើងហោះហើរជាង ៩សែនជើង។
អត្ថបទទាក់ទង!
យ៉ាងណាក៏ដោយចុះ ការវាយតម្លៃនេះ គឺយោងទៅតាមសេចក្តីសន្និដ្ឋានថា រលកទី ២ នៃមេរោគកូវីដ-១៩ កំពុងវាយប្រហារបណ្តាប្រទេសជាច្រើនលើសកលលោក ដែលប្រទេសថៃ គ្រោងនឹងចាប់ជាដៃគូលើ កិច្ចព្រមព្រៀងបើកដំណើរការជើងហោះហើររវាងគ្នាឡើងវិញ។
អាកាសយានដ្ឋានថៃ បានបន្តទៀតថា បើសិនជា វ៉ាក់សាំងប្រឆាំងមេរោគកូវីដ-១៩ ត្រូវបានបង្កើតឡើង និងចែកចាយនៅក្នុងខែកក្កដា ឆ្នាំ ២០២១ខាងមុខ នោះសេដ្ឋកិច្ចប្រទេសថៃ នឹងអាចងើបឡើងវិញ នៅដើមឆ្នាំ ២០២២ខាងមុខ ដូចនេះហើយ វិស័យអាកាសចរណ៍ អាចនឹងត្រលប់មករកសភាពដើមនៅខែតុលា ឆ្នាំ ២០២២ដូចគ្នា។
គួរជម្រាបដែរថា និយ័តករអាកាសចរណ៍ប្រទេសថៃ បានផ្អាកជើងហោះហើរពាណិជ្ជកម្មទាំងអស់ មិនឲ្យហោះចូលក្នុងប្រទេសថៃ ចាប់តាំងពីខែមេសាមកម្ល៉េះ ហើយមកទល់ពេលនេះ ពុំទាន់មានការចុះហត្ថលេខាលើ កិច្ចព្រមព្រៀងបើកដំណើរការជើងហោះហើរជាមួយ ប្រទេសដទៃនោះទេ។
ចំពោះបញ្ហានេះ នាយករដ្ឋមន្រ្តីថៃ ប្រាយុទ្ធ ច័ន្ទអូចា ធ្លាក់បានបង្ហាញពីក្តីព្រួយបារម្ភចំពោះ ផលប៉ះពាល់ ដែលអាចកើតមាន ទៅលើសុខភាពប្រជាជន ច្រើនជាង វិស័យទេសចរណ៍ បើទោះបីជា មានបណ្តាប្រទេសជាច្រើន ចូលមកចរចាជាមួយថៃក៏ដោយ ថៃ នឹងតែផ្តល់អាទិភាពលើ សុខភាពសាធារណៈ ហើយការចរចាផ្សេងៗ អាចនឹងពិភាក្សាគ្នានៅពេលក្រោយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
