លោក ត្រាំ និងលោក ស៊ី អាចនឹងជជែកគ្នាតាមទូរសព្ទ ដើម្បីដោះស្រាយជម្លោះពាណិជ្ជកម្ម

លោក ដូណាល់ ត្រាំ កាលពីថ្ងៃសុក្រ សប្តាហ៍មុន បានចោទប្រកាន់ប្រទេសចិនថា បានរំលោភលើកិច្ចព្រមព្រៀងជាមួយនឹងសហរដ្ឋអាម៉េរិក ដើម្បីដកពន្ធគ្នាទៅវិញទៅមក និងការរឹតបន្តឹងពាណិជ្ជកម្មសម្រាប់រ៉ែសំខាន់ៗ ខណៈលោក ត្រាំ គ្រោងនឹងជួបជជែកគ្នាជាមួយនឹងលោក ស៊ី នៅសប្ដាហ៍នេះ ដើម្បីដោះស្រាយជម្លោះពាណិជ្ជកម្ម និងកិច្ចព្រមព្រៀងនៅទីក្រុងហ្សឺណែវ ប្រទេស​ស្វីស កាលពីខែមុន។

លោក បេសេន បាននិយាយក្នុងបទសម្ភាសជាមួយនឹងទូរទស្សន៍ CBS កាលពីថ្ងៃអាទិត្យថា អ្វីដែលប្រទេសចិន កំពុងធ្វើនេះកំពុងរារាំងផលិតផល ដែលចាំបាច់សម្រាប់ខ្សែច្រវាក់ផ្គត់ផ្គង់ឧស្សាហកម្មរបស់ប្រទេសឥណ្ឌា និងទ្វីបអឺរ៉ុប ហើយនោះមិនសមជាដៃគូដែលអាចទុកចិត្តបានឡើយ។ លោក បេសេន ជឿជាក់ថា នៅពេលលោក ត្រាំ និងលោក ស៊ី ជួបជជែកគ្នាតាមទូរសព្ទហើយ បញ្ហានេះនឹងត្រូវបានដោះស្រាយ៕

ដោយ៖ សុខ មង្គល