លោក ត្រាំ គំរាមដំឡើងពន្ធ១០០% លើកាណាដា បើហ៊ានចុះកិច្ចព្រមព្រៀងពាណិជ្ជកម្មជាមួយចិន

លោក ដូណាល់ ត្រាំ បានលើកឡើងថា នាយករដ្ឋមន្ត្រីកាណាដា លោក ម៉ាក ខានី (Mark Carney) ពិតជាយល់ខុសធំហើយចំពោះការអនុញ្ញាតឱ្យប្រទេសចិន បង្កើនការនាំចេញរថយន្តអគ្គិសនីរបស់ខ្លួនទៅកាន់ប្រទេសកាណាដា។ ជាមួយគ្នានេះ លោក ត្រាំ ថែមទាំងបានចំអកដាក់កាណាដា អំពីបំណងប្រាថ្នារបស់លោកក្នុងការប្រែក្លាយកាណាដាជារដ្ឋទី៥១ របស់សហរដ្ឋអាម៉េរិក ទៀតផង។

លោក ត្រាំ បានសរសេរបង្ហោះលើបណ្ដាញទំនាក់ទំនងសង្គមថា ប្រទេសចិននឹងលេបត្របាក់ប្រទេសកាណាដា ទាំងមូលរួមទាំងការបំផ្លាញអាជីវកម្ម រចនាសម្ព័ន្ធសង្គម និងរបៀបរស់នៅទូទៅរបស់ពលរដ្ឋកាណាដាផងដែរ។ ប្រសិនបើកាណាដា ចុះកិច្ចព្រមព្រៀងជាមួយប្រទេសចិន នោះសហរដ្ឋអាម៉េរិកនឹងដាក់ពន្ធ១០០% លើប្រទេសកាណាដាភ្លាមៗទៅលើទំនិញ និងផលិតផលកាណាដាទាំងអស់ដែលនាំចូលមកសហរដ្ឋអាម៉េរិក។

ទោះជាយ៉ាងណាទាក់ទិនបញ្ហានេះ អ្នកនាំពាក្យនាយករដ្ឋមន្ត្រីកាណាដា មិនបានឆ្លើយតបនោះទេ ចំពោះការស្នើសុំការអត្ថាធិប្បាយកាលពីថ្ងៃសៅរ៍ កន្លងទៅ។ ហើយជាការឆ្លើយតបទៅនឹងការគំរាមកំហែងរបស់លោក ត្រាំ នាយករដ្ឋមន្ត្រីកាណាដា លោក Mark Carney កាលពីថ្ងៃសៅរ៍ កន្លងទៅបានអំពាវនាវឱ្យរួបរួមសាមគ្គីពង្រឹងសេដ្ឋកិច្ចកាណាដាឱ្យរឹងមាំ ពោលគឺជួយគាំទ្រទិញផលិតផលកាណាដា និងកសាងប្រទេសកាណាដាឱ្យរឹងមាំឡើង៕

ដោយ: តែម សុខុម