លោកស្រីរដ្ឋមន្ត្រីក្រសួងហិរញ្ញវត្ថុសហរដ្ឋអាមេរិក Yellen បាននិយាយថា នៅមុនពេលមានសង្គ្រាមកើតឡើង មនុស្សជាង ៨០០ លាននាក់ ដែលស្មើនឹង ១០% នៃចំនួនប្រជាជនពិភពលោកបានទទួលរងផលប៉ះពាល់ពីបញ្ហាអសន្តិសុខស្បៀងអាហារដ៏រ៉ាំរ៉ៃ ហើយការប៉ាន់ប្រមាណនៅពេលមានសង្គ្រាមកើតឡើងនេះ បានបង្ហាញថាតម្លៃម្ហូបអាហារកើនឡើងខ្ពស់ អាចជំរុញឱ្យមនុស្សយ៉ាងហោចណាស់ ១០ លាននាក់បន្ថែមទៀតធ្លាក់ចូលទៅក្នុងភាពក្រីក្រ។
រដ្ឋមន្ត្រីក្រសួងហិរញ្ញវត្ថុរបស់អាមេរិករូបនេះ បានប្រាប់បណ្តាប្រទេសដែលមានសេដ្ឋកិច្ចជឿនលឿនគួរតែជៀសវាងការហាមឃាត់ការនាំចេញ ដែលអាចបង្កើនតម្លៃបន្ថែមទៀត ហើយត្រូវបង្កើនការគាំទ្រសម្រាប់ប្រជាជនដែលងាយរងគ្រោះ និងកសិករខ្នាតតូច។
ទន្ទឹមនឹងនេះ រដ្ឋមន្ត្រីហិរញ្ញវត្ថុអាល្លឺម៉ង់លោក Christian Lindner ដែលជាប្រទេសស្ថិតនៅក្នុងក្រុមប្រទេសមានសេដ្ឋកិច្ចជឿនលឿនទាំងប្រាំពីរ ដែលហៅថា G7 បាននិយាយថា សកម្មភាពគោលដៅ និង ការសម្របសម្រួល គឺចាំបាច់ណាស់ ក៏ប៉ុន្តែលោកបានអំពាវនាវឱ្យប្រទេសទាំងអស់ រក្សាទីផ្សារកសិកម្មបើកចំហ មិនបង្កើនការស្តុកទុក និង មិនដាក់កំហិតការនាំចេញ ដែលមិនសមហេតុផលលើវិស័យកសិកម្ម ផលិតផល ឬ សារធាតុចិញ្ចឹមផ្សេងៗ។
អត្ថបទគួរអាន
បន្ថែមពីលើបញ្ហាវិបត្តិសង្គ្រាមរវាងរុស្ស៊ី និង អ៊ុយក្រែន របាយការណ៍ថ្មីចុងក្រោយមួយរបស់អង្គការសហប្រជាជាតិឯណោះវិញ ក៏បានព្រមានដែរថា យ៉ាងហោចណាស់មានមនុស្សចំនួន ២០ លាននាក់កំពុងប្រឈមមុខនឹងហានិភ័យនៃភាពអត់ឃ្លាននៅឆ្នាំនេះ ខណៈដែលប្រទេសអាហ្វ្រិកខាងលិចកំពុងប្រឈមមុខនឹងវិបត្តិស្បៀងអាហារដ៏អាក្រក់បំផុតមិនធ្លាប់មាន ដែលបណ្តាលមកពីជម្លោះតានតឹង គ្រោះរាំងស្ងួតនៅក្នុងប្រទេសកេនយ៉ា សូម៉ាលី និង អេត្យូពី និង ផលប៉ះពាល់នៃសង្គ្រាមនៅក្នុងប្រទេសអ៊ុយក្រែនលើតម្លៃស្បៀងអាហារ និងលទ្ធភាពទទួលបានស្បៀងអាហារមិនគ្រប់គ្រាន់ជាដើម។
ស្របពេលជាមួយគ្នានោះ អង្គការមូលនិធិរូបិយវត្ថុអន្តរជាតិ កាលពីថ្ងៃទី ១៩ ខែមេសា ក៏បានកាត់បន្ថយការព្យាករណ៍របស់ខ្លួនសម្រាប់កំណើនសេដ្ឋកិច្ចពិភពលោកនៅឆ្នាំនេះ ជិតមួយភាគរយផងដែរ ដោយបានលើកហេតុផលឡើង មកពីការឈ្លានពានរបស់រុស្ស៊ីនៅអ៊ុយក្រែន និង បានព្រមានថា អតិផរណាកើនឡើង គឺកំពុងបង្កការគ្រោះថ្នាក់ជាខ្លាំងនាពេលបច្ចុប្បន្នសម្រាប់ប្រទេសជាច្រើន។
គួរជម្រាបថា អង្គការមូលនិធិរូបិយវត្ថុអន្តរជាតិបានបន្ទាបការព្យាករណ៍ជាលើកទីពីរហើយ នៅក្នុងឆ្នាំនេះ ដោយការព្យាករណ៍កំណើនសេដ្ឋកិច្ចសកលលោកមកនៅត្រឹម ៣,៦% ប៉ុណ្ណោះទាំងនៅក្នុងឆ្នាំ ២០២២ និងឆ្នាំ ២០២៣ ដោយសារតែបញ្ហាដែលបណ្តាលមកពីផលប៉ះពាល់លើសង្គ្រាមរុស្ស៊ី និង អ៊ុយក្រែន និងការរីករាលដាលជំងឺកូវីត ១៩ ជាសកល។
IMF ក៏បានប៉ាន់ប្រមាណដែរថា GDP របស់ប្រទេសអ៊ុយក្រែន អាចនឹងដាំក្បាលចុះ ដល់ទៅ ៣៥% នៅក្នុងឆ្នាំ២០២២នេះ ខណៈដែលសេដ្ឋកិច្ចរុស្ស៊ីវិញ ក៏អាចនឹងដាំក្បាលចុះ ៨,៥%ផងដែរ៕
អត្ថបទ៖ វ៉ាន់ ស្រីរ័ត្ន
None
