ចាប់ពីថ្ងៃទី១៣មីនា រុស្ស៊ីបានបាញ់មីស៊ីលបំផ្លាញមូលដ្ឋានទ័ពដ៏សំខាន់មួយស្ថិតនៅភាគខាងលិចអ៊ុយក្រែន កៀកនឹងព្រំដែនប្រទេសប៉ូឡូញ។ បើតាមអាជ្ញាធរអ៊ុយក្រែន យ៉ាងហោចមនុស្ស៩នាក់ស្លាប់ ខណៈអ្នករបួសមានជាង៥០នាក់។ គិតចាប់តាំងពីចូលធ្វើសង្គ្រាមឈ្លានពានអ៊ុយក្រែន នៅថ្ងៃទី ២៤កុម្ភៈ នេះជាលើកទី១ ដែលកងទ័ពរុស្ស៊ី បាញ់មីស៊ីល ក្នុងចម្ងាយដ៏ឆ្ងាយស្ទើរតែចូលទៅដល់ប្រទេសប៉ូឡូញទៅហើយ។
ប៉ូឡូញដែលមានព្រំដែនជាប់អ៊ុយក្រែន បានប្រតិកម្មថ្កោលទោសមុនគេ ពីការវាយប្រហារមីស៊ីលរបស់រុស្ស៊ី។ ទន្ទឹមនេះ ប៉ូឡូញក៏ជាសមាជិកមួយដែររបស់អង្គការណាតូ ហេតុនេះហើយទើប សហរដ្ឋអាមេរិក ដែលជាបងធំ បានចេញមុខមកប្រតិកម្មដែរថា ការបាញ់មីស៊ីលលើកនេះ កំពុងដុតកំដៅនៃសង្គ្រាមឲ្យកើនឡើងគួរឱ្យកត់សម្គាល់។ អាមេរិកបានព្រមានដែរថា បើរុស្ស៊ីហ៊ានតែវាយប្រហារធ្លោយហួសចូលដល់ទឹកដីរបស់សមាជិកណាតូ នោះនឹងមានការឆ្លើយតបយ៉ាងពេញទំហឹងដោយសម្ព័ន្ធមិត្តណាតូ។
គួរជម្រាបដែរថា ការវាយប្រហារលើកនេះជាលើកទីមួយហើយ ដែលរុស្ស៊ីបានបាញ់ផ្លោងគ្រាប់មីស៊ីលទៅដល់ទឹកដីភាគខាងលិច នៃប្រទេសអ៊ុយក្រែន។ គិតចាប់តាំងពីការផ្តើមធ្វើសង្គ្រាមនៅអ៊ុយក្រែនមក កងទ័ពរុស្ស៊ី បានចូលវាយប្រហារ និងខ្លះកាន់កាប់ ក៏ដូចជាបើកសមរភូមិប្រយុទ្ធនៅតែភាគខាងកើត ភាគខាងជើង និងភាគខាងត្បូងរបស់អ៊ុយក្រែនប៉ុណ្ណោះ ដែលមានជាប់ព្រំដែនជាមួយរុស្ស៊ី និងប្រទេសបេឡារុសដែលជាប្រទេសរណបរុស្ស៊ី។
អត្ថបទគួរអាន
យ៉ាងណាក៏ដោយ ក្តីសង្ឃឹមក្នុងការបន្ធូរបន្ថយស្ថានការណ៍អ៊ុយក្រែន នៅតែមានក្រោយជំនួបចរចាកាលពីចុងសប្តាហ៍មុននេះ ហាក់បង្ហាញពន្លឺនៃផ្លែផ្កាខ្លះ។ នេះបើតាមការអះអាងពីប្រតិភូនៃភាគីទាំងពីរ។
ប្រតិភូពីភាគីអ៊ុយក្រែនបានឲ្យដឹងថា ប្រទេសរុស្ស៊ីកំពុងចាប់ផ្តើមពិភាក្សាក្នុងន័យស្ថាបនាបណ្តើរៗហើយ ហើយភាគីអ៊ុយក្រែនគិតថា កិច្ចចរចានឹងសម្រេចបាននូវលទ្ធផលជាក់ស្តែងក្នុងរយៈពេលប៉ុន្មានថ្ងៃខាងមុខ។ ដោយឡែក ការសែតរុស្ស៊ីបានចុះផ្សាយដោយស្រង់ប្រភពពីប្រតិភូរុស្ស៊ីថា ជំនួបចរចាមានការរីកចម្រើនគួរឱ្យកត់សម្គាល់ ហើយវាអាចទៅរួចដែលគណៈប្រតិភូទាំងពីរ អាចឈានដល់សេចក្តីព្រាងកិច្ចព្រមព្រៀងមួយគ្នាមួយនាពេលឆាប់ៗនេះ។
យ៉ាងណាក៏ដោយ ប្រភពពីភាគីទាំងសងខាងមិនបានបញ្ជាក់ឲ្យច្បាស់ថា ការព្រមព្រៀងគ្នាទាំងនេះនឹងគ្របដណ្តប់លើអ្វីខ្លះនោះទេ។ ប៉ុន្តែកិច្ចចរចាទាំងបីជុំរវាងភាគីទាំងពីរ ក្នុងប្រទេសបេឡារុស្សកាលពីពេលកន្លងមកនេះ សង្កេតឃើញថា ភាគច្រើនបានផ្តោតសំខាន់លើបញ្ហាមនុស្សធម៌ ដូចជាការបើកផ្លូវឲ្យមានការជម្លៀសជនភៀសខ្លួនចេញជាដើម និងមានការទាមទារឲ្យមានបទឈប់បាញ់ជាដើម។
សូមជម្រាបជូនដែរថា គណៈប្រតិភូរុស្ស៊ីនិងអ៊ុយក្រែន បានបន្តកិច្ចចរចាឡើងវិញនៅថ្ងៃចន្ទទី១៤មីនានេះផងដែរ ដោយបានប្តូរពីការជួបគ្នាដោយផ្ទាល់ មកធ្វើតាមរយៈប្រព័ន្ធវីដេអូអនឡាញវិញម្តង៕
None
