នៅក្នុងរបាយការណ៍ថ្មីផ្តោតលើរយៈពេល១ឆ្នាំនៃការបង្ក្រាបរបស់របបសឹក និងប្រតិបត្តិការយោធាទៅលើក្រុមប្រឆាំងនៅភូមា អ្នកនាំពាក្យរបស់ឧត្តមស្នងការសិទ្ធិមនុស្សនៃអង្គការសហប្រជាជាតិលោកស្រី មីឆែល បាច់លេត(Michelle Bachelet) បានអះអាងថា គេរកឃើញមានតម្រុយ មួយចំនួនដែលបង្ហាញថា កងទ័ពភូមាអាចប្រព្រឹត្តឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មសង្គ្រាម។
លោកស្រីបន្ថែមថា កងកម្លាំងយោធាបានបង្ហាញពីការប្រមាថយ៉ាងខ្លាំង ចំពោះជីវិតមនុស្ស ដោយបានប្រើប្រាស់ការវាយប្រហារតាមអាកាស និងអាវុធធុនធ្ងន់លើតំបន់ដែលមានប្រជាជនរស់នៅ និងដោយចេតនាសំដៅលើជនស៊ីវិលតែម្តង។ ប្រជាជនស៊ីវិលមួយភាគធំ ដែលជាផ្ទាំងស៊ីបនៃការវាយប្រហាររបស់កងទ័ព បានស្លាប់ដោយសារការបាញ់ចំក្បាល ដុតទាំងរស់ ការធ្វើទារុណកម្ម ឬត្រូវចាប់ជំរិតជាដើម។
អត្ថបទគួរអាន
ការហ៊ានអះអាងនៅក្នុងរបាយការណ៍ដដែលនេះ ត្រូវបានគេយកករណីសម្លាប់រង្គាល នៅក្នុងតំបន់ សាហ្គាង(Sagaing) ជាការស្រាវជ្រាវគោល ពោលគឺតំបន់នោះជាកន្លែងដែលកងទ័ពភូមាសម្លាប់មនុស្សអស់៤០នាក់ នៅក្នុងប្រតិបត្តិការតាមចាប់ក្រុមប្រឆាំងប្រដាប់អាវុធ ហើយដែលសាកសពរបស់ពួកគេត្រូវបានគេប្រទះឃើញមានជាប់ចំណងទាំងដៃនិងជើង។
របាយការណ៍ក៏បានរកឃើញដែរថា អ្នកជាប់ឃុំត្រូវបានគេធ្វើទារុណកម្មអំឡុងពេលសួរចម្លើយ រួមមាន ការឆក់ខ្សែភ្លើង ការចាក់ថ្នាំញៀន និងខ្លះទទួលរងនូវអំពើហិង្សាផ្លូវភេទ រួមទាំងការចាប់រំលោភផងដែរ។
យ៉ាងណាមិញ គេមិនអាចសុំការឆ្លើយតបពីអ្នកនាំពាក្យរដ្ឋាភិបាលភូមាបានទេ ជុំវិញទៅនឹងរបាយការណ៍ថ្មីរបស់អង្គការសហប្រជាជាតិនេះ។
សូមជម្រាបថា អង្គការសហប្រជាជាតិធ្លាប់បានវាយតម្លៃថា ការបង្ក្រាបដ៏ហិង្សារបស់របបសឹកទៅលើបាតុកម្មប្រឆាំងរដ្ឋប្រហារបានសម្លាប់ប្រជាជនស៊ីវិលចំនួន ១៦០០នាក់ ចំណែកមនុស្សជាង ១២ម៉ឺននាក់ផ្សេងទៀតត្រូវបានចាប់ឃុំខ្លួន៕
None
