កិច្ចព្រមព្រៀងលើក្របខណ្ឌកំណែទម្រង់ផ្នែកពន្ធសកលនេះ ត្រូវបានប្រកាសឡើងដោយអង្គការកិច្ចសហប្រតិបត្តិការ និងការអភិវឌ្ឍសេដ្ឋកិច្ច (OECD) ដែលជាអ្នកដើរតួសម្របសម្រួលឲ្យមានកិច្ចព្រមព្រៀងនេះ។ កិច្ចព្រមព្រៀងនេះទៀតសោត គឺជាព្រឹត្តិការណ៍ដ៏សំខាន់មួយ ក្នុងកិច្ចខិតខំប្រឹងប្រែង ដើម្បីសម្របសម្រួលលើការប្រកួតប្រជែងជាសកល ដែលមិនមានភាពចុះសម្រុងគ្នាមកអស់រយៈពេលជាង ៣ទសវត្សរ៍មកហើយទាក់ទងការកំណត់យកពន្ធសាជីវកម្មលើក្រុមហ៊ុនអន្តរជាតិធំៗនេះ។
ការឈានដល់ការកំណត់យកពន្ធលើប្រាក់ចំណូលលើក្រុមហ៊ុនអន្តរជាតិធំៗនេះ គឺផ្អែកទៅលើតំបន់ប្រតិបត្តិការ ជាជាងហេដ្ឋារចនាសម្ព័ន្ធរូបវ័ន្ដសម្រាប់ក្រុមហ៊ុនទាំងនេះ ហើយវាគឺជាការឆ្លើយតបទៅនឹងការកើនឡើងនៃសេដ្ឋកិច្ចពិភពលោក និងសេដ្ឋកិច្ចឌីជីថលផងដែរ។ មិនតែប៉ុណ្ណោះ វាក៏ជាជំហរមួយនៃគោលគំនិតសម្រាប់ការពង្រឹងដល់ប្រព័ន្ធពន្ធអន្តរជាតិ ដែលមានអាយុកាលមកអស់រយៈពេលរាប់រយឆ្នាំមកហើយនោះ។
បើតាមអង្គការ កិច្ចសហប្រតិបត្តិការ និងការអភវិឌ្ឍសេដ្ឋកិច្ច (OECD) វិធានការកំណត់យកពន្ធសាជីវកម្មសកលអប្បបរមា ១៥%នេះ នឹងមានការបែងចែកឡើងវិញនូវប្រាក់ចំណេញប្រមាណ ១២៥ពាន់លានដុល្លារអាមេរិក ពីក្រុមហ៊ុនអន្តរជាតិធំៗដែលមានប្រាក់ចំណេញខ្ពស់បំផុតប្រមាណ ១០០ក្រុមហ៊ុន។
អត្ថបទគួរអាន
កិច្ចព្រមព្រៀងនេះ នឹងត្រូវបានដាក់ជូនបន្ដទៅកាន់កិច្ចប្រជុំថ្នាក់រដ្ឋមន្ត្រីក្រសួងហិរញ្ញវត្ថុ និងប្រធានធនាគារកណ្ដាល នៃក្រុមប្រទេសរីកចម្រើន G20 ដើម្បីពិនិត្យ នៅថ្ងៃពុធសប្ដាហ៍នេះ ហើយនឹងត្រូវបញ្ជូនបន្ដទៅកិច្ចប្រជុំកំពូលប្រទេស G20 នៅទីក្រុងរ៉ូម នៅខែក្រោយ។
កិច្ចព្រមព្រៀងពន្ធសាជីវកម្មសកលនេះ គឺមានបំណងបញ្ឈប់ក្រុមហ៊ុនសហគ្រាសអន្តរជាតិពីការបង្កើតក្រុមហ៊ុនបុត្រសម្ព័ន្ធនៅក្នុងដែនដីដែលមានការយកពន្ធទាប ដើម្បីកាត់បន្ថយបន្ទុកពន្ធរបស់ខ្លួន ហើយវិធានការពន្ធនេះ នឹងអនុវត្តទៅលើក្រុមហ៊ុនដែលមានប្រាក់ចំណូលប្រចាំឆ្នាំយ៉ាងហោចណាស់ប្រមាណ ៨៦៧លានដុល្លារអាមេរិក។ ក្រុមហ៊ុន ដែលត្រូវជាប់ពន្ធនេះ គឺមានប្រហែល១០០ ក្រុមហ៊ុននៅទូទាំងពិភពលោក រួមមាន ដូចជា Google, Amazon, Facebook, និង Apple ជាដើម៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
