នៅពិធីបើកកិច្ចប្រជុំ លោក ហ្គូតឺរេស អគ្គលេខាធិការអង្គការសហប្រជាជាតិ បាននិយាយថា វាជារឿងដែលមិនអាចលើកលែងឱ្យបានឡើយ សម្រាប់អំពើហិង្សាដ៏គួរឱ្យរន្ធត់ដោយពួកសកម្មប្រយុទ្ធហាម៉ាស កាលពីថ្ងៃទី៧ ខែតុលា ប៉ុន្តែក៏មិនអាចឈរឱបដៃមើលការដាក់ទោសរួមគ្នាទៅលើប្រជាជននៅហ្កាហ្សាដែរ។
លោកបានសង្កត់ធ្ងន់ថា លោកមើលឃើញពីការរំលោភច្បាប់មនុស្សធម៌អន្តរជាតិ យ៉ាងច្បាស់នៅក្នុងតំបន់ហ្កាហ្សា តែមិនបានរំលេចឈ្មោះថា អ៊ីស្រាអែលនោះទេ។ លោក ហ្គូតឺរេស បានគូសបញ្ជាក់ថា គ្មានភាគីណា ឬប្រទេសណាមួយក្នុងជម្លោះអាចអង្គុយលើច្បាប់មនុស្សធម៌អន្តរជាតិ បានឡើយ។
លោកបាននប្រាប់ក្រុមប្រឹក្សាសន្តិសុខថា ប្រជាជនប៉ាឡេស្ទីន បានស្ថិតនៅក្រោមការគ្រប់គ្រងកាន់កាប់សឹងតែដកដង្ហើមពុំរួចក្នុងរយៈពេល៥៦ឆ្នាំមកនេះ ហើយវាពិតជាសំខាន់ណាស់ ដែលត្រូវដឹងថា ការវាយប្រហារដោយហាម៉ាស មិនមែនកើតឡើងដោយគ្មានមូលហេតុនោះទេ។
ភ្លាមៗក្រោយការលើកឡើងបែបនេះពីសំណាក់ប្រមុខ UN រដ្ឋមន្ត្រីការបរទេសអ៊ីស្រាអែល លោក Eli Cohen ដែលមានវត្តមានក្នុងអង្គប្រជុំនោះបានបង្ហាញការខឹងសម្បារយ៉ាងខ្លាំង និងចង្អុលមុខលោក ហ្គូតឺរេស ដោយនិយាយថា «លោកអគ្គលេខាធិការ តើលោកកំពុងរស់នៅក្នុងពិភពលោកអ្វី?»។
លោក ខូហេន បានរំលេចឡើងវិញពីការស្លាប់ដ៏រន្ធត់មិនធ្លាប់មានក្នុងប្រវត្តិសាស្ត្រអ៊ីស្រាអែល ក្រោមស្នាដៃរបស់ពួកហាម៉ាសកាលពីថ្ងៃទី ៧តុលា។ ជាមួយគ្នានេះ ឯកអគ្គរដ្ឋទូតរបស់អ៊ីស្រាអែលប្រចាំនៅអង្គការសហប្រជាជាតិលោក Gilad Erdan បានពណ៌នាសុន្ទរកថា របស់លោក Guterres ថា«ជារឿងដ៏ភ្ញាក់ផ្អើល»។ លោកបានសរសេរសារនៅលើបណ្តាញសង្គម Twitter ឱ្យលោក Guterres លាលែងពីតំណែងទៅ។
អត្ថបទគួរអាន
ទន្ទឹមគ្នានេះ លោក អាន់តូនី ប្លីនខេន រដ្ឋមន្ត្រីការបរទេសអាម៉េរិក បានប្រាប់អង្គប្រជុំកាលពីថ្ងៃអង្គារ នោះដែរថា ខ្លួនមិនចង់ស្វែងរកជម្លោះជាមួយអ៊ីរ៉ង់ឡើយ ប៉ុន្តែលោកថា អាម៉េរិកនឹងឆ្លើយតបវិញឱ្យស័ក្តិសម និងម៉ឺងម៉ាត់បំផុត ប្រសិនបើអ៊ីរ៉ង់ ឬក្រុមប្រយុទ្ធផ្សេងទៀតនៅមជ្ឈិមបូព៌ា វាយប្រហារលើកងទ័ពអាម៉េរិក។
ការលើកឡើងបែបនេះរបស់ លោក ប្លីនខេន មិនមែនជារឿងចៃដន្យឡើយ ព្រោះកាលពីពេលថ្មីៗនេះមានការរាយការណ៍មកថា មូលដ្ឋានទ័ពអាម៉េរិកនៅស៊ីរី និងអ៊ីរ៉ាក់បានរងការវាយប្រហារផ្ទួនៗដោយរ៉ុក្កែត និងដ្រូន។ មន្ទីរបញ្ចកោណអាម៉េរិក បានចោទការវាយប្រហារទាំងនោះថា គឺជាស្នាដៃរបស់ក្រុមសកម្មប្រយុទ្ធ ដែលមានអ៊ីរ៉ង់គាំទ្រពីក្រោយ។
ទោះជាយ៉ាងណាក៏ដោយ ឯកអគ្គរដ្ឋទូតអ៊ីរ៉ង់ ប្រចាំនៅអង្គការសហប្រជាជាតិ លោក អាមែ សៀដ អាយរ៉ាវ៉ានី (Amir Saeid Iravani) បានប្រាប់អង្គប្រជុំកាលពីថ្ងៃអង្គារ ថា ការលើកឡើងរបស់លោក ប្លីនខេន គឺមានបំណងទម្លាក់កំហុសមកលើអ៊ីរ៉ង់ ក្នុងសង្គ្រាមអ៊ីស្រាអែល-ហាម៉ាស។ លោកថា អ៊ីរ៉ង់នៅតែបន្តការប្តេជ្ញាការពារសន្តិភាព និងស្ថិរភាពតំបន់ ផ្ទុយពីអាម៉េរិកដែលរឹតតែធ្វើឱ្យជម្លោះកើនឡើងបន្ថែមទៀត ដោយឈរជាមួយពួកឈ្លានពានប្រឆាំនឹងជនស៊ីវិលស្លូតត្រង់ប៉ាឡេស្ទីន នៅហ្កាហ្សា។
នៅអង្គការសហប្រជាជាតិ សហរដ្ឋអាម៉េរិក និងរុស្ស៊ី បានដាក់ចេញផែនការរួមគ្នាមួយ ឱ្យមានជំនួយមនុស្សធម៌សម្រាប់ជនស៊ីវិលប៉ាឡេស្ទីន និងផ្អាកឱ្យមានបទឈប់បាញ់។ សម្រាប់ទីក្រុងវ៉ាស៊ីនតោនបានអំពាវនាវឱ្យផ្អាក ខណៈរុស្ស៊ីចង់បានបទឈប់បាញ់មនុស្សធម៌តែម្តង។
ក្នុងន័យនេះ អាម៉េរិកចង់ឱ្យមានបទឈប់បាញ់ក្នុងរយៈពេលខ្លីប៉ុណ្ណោះ ដើម្បីទុកពេលឱ្យខ្លួនចរចារដោះលែងចំណាប់ខ្មាំងបន្ថែមទៀតពីក្រុមហាម៉ាស ដែលផ្ទុយពីការចង់បានរបស់ប្រទេសជាច្រើនផ្សេងទៀត ឱ្យមានបទឈប់បាញ់ជាបន្ទាន់ និងឥតលក្ខខណ្ឌ៕
None
