លោក ដូណាល់ ត្រាំ ស្វាគមន៍ចំពោះឆន្ទៈរបស់លោក ហ្សេឡិនស្គី ដែលចង់ចុះកិច្ចព្រមព្រៀងរ៉ែ និងវិលចូលតុចរចាសន្តិភាពជាមួយអាម៉េរិក

លោក ដូណាល់ ត្រាំ កាលពីថ្ងៃទី៤ ខែមីនា បានបង្ហាញការស្វាគមន៍ និងអរគុណចំពោះឆន្ទៈរបស់លោក ហ្សេឡិនស្គី ក្នុងការចុះកិច្ចព្រមព្រៀងរ៉ែជាមួយសហរដ្ឋអាម៉េរិក និងវិលចូលតុចរចាសន្តិភាព។ នៅក្នុងអំឡុងពេលថ្លែងសុន្ទរកថា ទៅកាន់សភាសហរដ្ឋអាម៉េរិក កាលពីពេលថ្មីៗ លោក ដូណាល់ ត្រាំ បានអះអាងថា ប្រធានាធិបតីអ៊ុយក្រែន លោក ហ្សេឡិនស្គី បានប្រគល់លិខិតមួយច្បាប់ឱ្យលោក ដោយបានបញ្ជាក់ជំហរចុះកិច្ចព្រមព្រៀងរ៉ែជាមួយសហរដ្ឋអាម៉េរិក និងវិលចូលតុចរចាសន្តិភាព។

ទន្ទឹមនេះ លោក ហ្សេឡិនស្គី បានបង្ហោះលើគណនីបណ្ដាញទំនាក់ទំនងសង្គម X ក្នុងថ្ងៃដដែលថា ប្រទេសអ៊ុយក្រែន បានត្រៀមខ្លួនជាស្រេចដើម្បីចុះកិច្ចព្រមព្រៀងរ៉ែជាមួយសហរដ្ឋអាម៉េរិក និងវិលចូលតុចរចាសន្តិភាព ហើយបានចាត់ទុកការប៉ះទង្គិចពាក្សសម្ដីគ្នារវាងរូបលោក និងលោក ដូណាល់ ត្រាំ នៅសេតវិមានកាលពីសប្ដាហ៍មុនថា ជារឿងគួរឱ្យសោកស្តាយ។

លោក ដូណាល់ ត្រាំ បានប្រាប់ក្រុមទីប្រឹក្សារបស់លោកថា លោកមានបំណងប្រកាសកិច្ចព្រមព្រៀងមួយនៅក្នុងសុន្ទរកថា របស់លោកទៅកាន់សភា។ តែប្រភពដែលដឹងពីបញ្ហានេះ បានអះអាងថា កិច្ចព្រមព្រៀងរ៉ែខាងលើនេះ មិនទាន់ចុះហត្ថលេខានៅឡើយទេ ហើយស្ថានភាពអាចនឹងមានការប្រែប្រូល​។ ការលើកឡើងរបស់លោក ដូណាល់ ត្រាំ បង្ហាញពីការវិវត្ត ដែលអាចឈានទៅដល់ការចុះកិច្ចព្រមព្រៀងរ៉ែពិតប្រាកដរវាងសហរដ្ឋអាម៉េរិក និងអ៊ុយក្រែន។

បើតាមការអះអាងរបស់លោក ដូណាល់ ត្រាំ នៅក្នុងលិខិតដែលលោកទទួលបាន លោក ហ្សេឡិនស្គី បានបញ្ជាក់ជំហរថា លោកត្រៀមខ្លួនរួចជាស្រច ដើម្បីវិលចូលតុចរចាក្រោមការដឹកនាំរបស់លោក ដើម្បីនាំមកនូវសន្តិភាពយូរអង្វែង និងបានអរគុណចំពោះការជួយគាំទ្ររបស់សហរដ្ឋអាម៉េរិក ចំពោះអធិបតេយ្យភាពរបស់អ៊ុយក្រែន កន្លងមក។ លោកបានអះអាងថា លោក ហ្សេឡិនស្គី បានប្រាប់លោកថា អ៊ុយក្រែន ត្រៀមខ្លួនជាស្រេចក្នុងការចុះហត្ថលេខាលើកិច្ចព្រមព្រៀងរ៉ែ និងការពារសន្តិសុខគ្រប់ពេលវេលា។

ជាការពិតណាស់ លោក ដូណាល់ ត្រាំ ចង់បានរ៉ែកម្ររបស់អ៊ុយក្រែន ដើម្បីកាត់បន្ថយការពឹងផ្អែកលើប្រទេសចិន ប៉ុន្តែវាត្រូវការពេលវេលាទម្រាំអាម៉េរិក អាចសម្រេចបំណងនេះបាន។ យោងតាមការចុះផ្សាយរបស់សារព័ត៌មាន Euro News លោក ដូណាល់ ត្រាំ មានមហិច្ឆតាកើបលុយឱ្យបាន៥០០ពាន់លានដុល្លារពីរ៉ែកម្ររបស់អ៊ុយក្រែន ដែលជាផ្នែកមួយនៃកិច្ចព្រមព្រៀងសន្តិភាព ដើម្បីទូទាត់សងថ្លៃជំនួយយោធារបស់អាម៉េរិក ដែលបានផ្តល់ឱ្យអ៊ុយក្រែន៕

ដោយ: តែម សុខុម