បើតាមចម្លើយ ក្រសួងសេដ្ឋកិច្ច និងហិរញ្ញវត្ថុ បានព្យាករថា គិតចាប់ពីពេលនេះទៅ កម្ពុជាត្រូវការយ៉ាងហោចណាស់ជាង៣ឆ្នាំទៀត ទើបអាចទាញយកកំណើនសេដ្ឋកិច្ច៧% ត្រឡប់មកវិញបាន ក្រោមការដាក់ចេញនូវយុទ្ធសាស្ត្រ និងគោលនយោបាយដ៏ជាក់លាក់របស់រាជរដ្ឋាភិបាលកម្ពុជា រួមទាំងភាពអំណោយផលនៃកត្តាខាក្រៅផងដែរ។
ឯកឧត្តម ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការនៃអគ្គលេខាធិការដ្ឋាន គណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ បានអះអាងថា សេដ្ឋកិច្ចកម្ពុជានឹងអាចវិលត្រឡប់ទៅរកភាពប្រក្រតីជាមួយកំណើន៧% ក្នុង១ឆ្នាំឡើងវិញនៅត្រឹមឆ្នាំ២០២៤ ប្រសិនបើគ្មានការផ្ទុះការឆ្លងជំងឺកូវីដ-១៩កើតឡើង ហើយរក្សាស្ថានភាពសេដ្ឋកិច្ចដូចបច្ចុប្បន្ន។ ការព្យាករណ៍បែបនេះ ធ្វើឡើងក្រោយឯកឧត្តមមើលឃើញពីសន្ទុះនៃការនាំចេញទំនិញរបស់កម្ពុជានៅឆ្នាំ២០២១ នៅតែរក្សាបាននូវកំណើន ទោះបីពិភពលោក រួមទាំងកម្ពុជាស្ថិតក្នុងវិបត្តិកូវីដ-១៩ក៏ដោយ។ មួយវិញទៀត រាជរដ្ឋាភិបាល បានធ្វើកំណែទម្រង់លើវិស័យមួយចំនួន នឹងបានដាក់ចេញក្របខណ្ឌយុទ្ធសាស្ត្រថ្មីៗមួយចំនួន ដើម្បីរួមចំណែកជួយស្តារ និងជំរុញកំណើនសេដ្ឋកិច្ចជាដើម។ ទាំងអស់នេះគឺការលើកឡើងរបស់ឯកឧត្តម ផាន់ ផល្លា ធ្វើឡើងក្នុងសន្និសីទសារព័ត៌មានស្តីពីយុទ្ធសាស្ត្រស្តារ និងជំរុញកំណើនសេដ្ឋកិច្ចកម្ពុជាក្នុងការរស់នៅជាមួយជំងឺកូវីដ-១៩ តាមគន្លងប្រក្រតីភាពថ្មី នៅព្រឹកថ្ងៃទី១៤ ធ្នូ ឆ្នាំ២០២១។
អត្ថបទគួរអាន
ឯកឧត្តមផាន់ ផល្លាសង្កេតឃើញថា បច្ចុប្បន្នវិស័យសេដ្ឋកិច្ចកម្ពុជា បានវិលត្រឡប់មករកភាពល្អប្រសើរឡើងវិញជាបណ្តើរៗហើយ បន្ទាប់ពីរាជរដ្ឋាភិបាលបានបើកប្រទេសឡើងវិញ និងលើកលែងការធ្វើចត្តាឡីស័កចំពោះអ្នកដំណើរចូលមកកម្ពុជា ដែលបានចាក់វ៉ាក់សាំងកូវីដ-១៩ រួច។ មន្ត្រីជាន់ខ្ពស់ក្រសួងសេដ្ឋកិច្ចរូបនេះ មានសុទិដ្ឋិនិយមថា សេដ្ឋកិច្ចកម្ពុជានឹងកំណើនលើសពី ២,៥% នៅឆ្នាំ២០២១ និងបន្តកើនឡើងលើសនេះនៅឆ្នាំបន្តបន្ទាប់ទៀត។ ជាក់ស្តែងនៅក្នុងឆ្នាំ២០២១ ការនាំចេញផលិតកសិកម្ម ឧស្សាហកម្ម និងមិនមែនផលិតផលកាត់ដេររបស់កម្ពុជានៅតែរក្សាបាននូវកំណើន ទោះបីមានការរំខានពីជំងឺកូវីដ-១៩។
ទន្ទឹងនឹងនេះឯកឧត្តម ផាន់ ផល្លា ក៏បានបង្ហាញពីគម្រោងខ្ចីប្រាក់ពីបរទេស ដើម្បីបម្រើឲ្យការរួមចំណែកជួយស្តារ និងជំរុញកំណើនវិស័យសេដ្ឋកិច្ចកម្ពុជាផងដែរ។ ក្នុងនោះកម្ពុជាគ្រោងខ្ចីថវិកាពីបរទេសចំនួន១ពាន់៦រយលានដុល្លារអាមេរិកបន្ថែមទៀតនៅឆ្នាំ២០២២ ខាងមុខ ដើម្បីយកមកប្រើប្រាស់ក្នុងការកសាងហេដ្ឋារចនាសម្ព័ន្ធសំខាន់ៗ ដើម្បីលើកកម្ពស់គុណភាពការប្រកួតប្រជែង និងទាក់ទាញការវិនិយោគជាដើម។ បន្ថែមលើនេះកម្ពុជាក៏នឹងពង្រឹងយន្តការ និងប្រព័ន្ធប្រមូលពន្ធក្នុងស្រុក ដើម្បីកៀរគរទុនបន្ថែម សម្រាប់ប្រើប្រាស់ក្នុងការអភិវឌ្ឍន៍លើវិស័យផ្សេងៗផងដែរ។
រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុរូបនេះបានគូសបញ្ជាក់ថា គិតមកទល់បច្ចុប្បន្នកម្ពុជានៅជំពាក់បំណុលបរទេសជាង៩ពាន់លានដុល្លារអាមេរិក ប៉ុន្ដែ ឯកឧត្តម ផាន់ ផល្លា អះអាងថា វាមានចំនួនតិចតួចនៅឡើយ បើធៀបនឹងបំណុលរបស់ប្រទេសមួយចំនួន។ ទោះយ៉ាងណា ឯកឧត្តម បញ្ជាក់ថា បំណុលបរទេសនេះមិនដល់ថ្នាក់ធ្វើឲ្យកម្ពុជាវណ្ឌកនោះទេ ហើយកម្ពុជាមានលទ្ធភាពគ្រប់គ្រាន់ក្នុងការសងបំណុលទាំងនេះ។
ជុំវិញកំណើនសេដ្ឋកិច្ចកម្ពុជានេះដែរ ស្ថាប័នអន្តរជាតិ Fitch Solutions បានព្យាករណ៍ថា សេដ្ឋកិច្ចកម្ពុជានឹងមានកំណើន២,៥% នៅឆ្នាំនេះ បន្ទាប់ពីមានការធ្លាក់ចុះ៣,១% កាលពីឆ្នាំ២០២០ ហើយនឹងបន្តកើនឡើង៤,៥% នៅឆ្នាំ២០២២។ ដោយឡែក ការព្យាកររបស់ធនាគារពិភពលោកវិញ នៅឆ្នាំ២០២១ កំណើនសេ្ឋកិច្ចកម្ពុជានឹង ២,២% ហើយបន្តកើនឡើង៤,៥% នៅឆ្នាំ២០២២៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
