អាម៉េរិកប្រកាសដំឡើងពន្ធលើប្រទេស និងដែនដីសរុបជាង១៨០ទូទាំងពិភពលោករួមទាំងកម្ពុជា តើសង្គ្រាមពន្ធគយពិភពលោកចាប់ផ្ដើមហើយមែនទេ?

ពិភពលោកមានការភ្ញាក់ផ្អើលយ៉ាងខ្លាំង នៅពេលដែលប្រធានាធិបតីអាម៉េរិក លោក ដូណាល់ ត្រាំ និងសេតវិមានបានបង្ហោះចែករំលែកតារាងជាបន្តបន្ទាប់នៅលើបណ្ដាញទំនាក់ទំនងសង្គម ដែលរៀបរាប់លម្អិតអំពីអត្រាពន្ធដែលប្រទេសផ្សេងៗដាក់លើសហរដ្ឋអាម៉េរិក រួមទាំងការក្រឡុកតម្លៃរូបិយប័ណ្ណ និងរបាំងពាណិជ្ជកម្មនៃប្រទេសទាំងនោះផងដែរ។

តារាងដាច់ដោយឡែកផ្សេងៗទៀត ក៏បានបង្ហាពីអត្រាពន្ធថ្មីៗលើប្រទេសនីមួយៗផងដែរ រួមទាំងបណ្ដាប្រទេសក្នុងសហភាពអឺរ៉ុប។ សម្រាប់ប្រទេសភាគច្រើនអត្រាពន្ធទាំងនេះ គឺសហរដ្ឋអាម៉េរិកយកពន្ធពីប្រទេសទាំងនោះត្រឹមតែប្រមាណពាក់កណ្ដាលប៉ុណ្ណោះ បើធៀបនឹងពន្ធដែលប្រទេសទាំងនោះយកពីសហរដ្ឋអាម៉េរិក។

ហើយតាមការប៉ាន់ប្រមាណថា ប្រទេសនានាប្រហែលជាមិនត្រឹមតែប្រឈមនឹងការដាក់អត្រាពន្ធសងសឹកគ្នាទៅវិញទៅមករបស់សហរដ្ឋអាម៉េរិកនោះទេ ថែមទាំងអាចមានអ្វីផ្សេងទៀតលើសពីនេះ។

សេតវិមាន បានបញ្ជាប់ប្រាប់សារព័ត៌មាន CNBC ថា ពន្ធគយថ្មីលើប្រទេសចិន នឹងត្រូវបានបន្ថែម២០%ដែលធ្វើឱ្យពន្ធសរុបលើប្រទេសចិនកើនឡើងដល់៥៤%ក្រោមរដ្ឋបាលរបស់លោក ដូណាល់ ត្រាំ ប៉ុន្តែប្រទេសជាច្រើនផ្សេងទៀតនឹងប្រឈមអត្រាពន្ធខ្ពស់ជាងនេះខ្លាំង។

ជាការឆ្លើយតបប្រទេសចិន បានទទូចឱ្យសហរដ្ឋអាម៉េរិកដកចេញវិញជាបន្ទាន់នូវវិធានការពន្ធគយជាឯកតោភាគី ដែលទើបដាក់ចេញនៅថ្ងៃព្រហស្បតិ៍ ទី៣ ខែមេសា នេះ ហើយថា ក្រុងវ៉ាស៊ីនតោនត្រូវរកដំណោះស្រាយឱ្យបានសមស្របនៅក្នុងការធ្វើពាណិជ្ជកម្មជាមួយប្រទេសជាដៃគូតាមរយៈកិច្ចសន្ទនាស្មើភាព។ នេះបើតាមការអះអាងរបស់ក្រសួងពាណិជ្ជកម្មចិន៕

ដោយ: តែម សុខុម