នាយកប្រតិបត្តិ និងជាប្រធានក្រុមហ៊ុន Entergris លោក បឺត្រាន លូយ (Bertrand Loy) បានប្រាប់សារព័ត៌មាន Nikkei ក្នុងបទសម្ភាសន៍មួយកាលពីថ្ងៃពុធថា ក្រុមហ៊ុនលោកនឹងបណ្តាក់ទុនចំនួន ៥០០លានដុល្លារនៅកោះតៃវ៉ាន់សម្រាប់រយៈពេល ៣ឆ្នាំខាងមុខ ពោលគឺ កើនឡើងពីផែនការចាស់ចំនួន ២០០លានដុល្លារ។
ក្រុមហ៊ុនកំពុងសាងសង់រោងចក្រផលិតមួយនៅក្រុង កៅសឹង (Kaohsiung) ភាគខាងត្បូងតៃកោះវ៉ាន់ ដោយប្រតិបត្តិការផលិត គ្រោងនឹងចាប់ផ្តើមនៅចុងឆ្នាំក្រោយ ហើយការផលិតទ្រង់ទ្រាយធំនឹងចាប់ផ្តើមនៅពាក់កណ្តាលឆ្នាំ២០២៣។
គួរជម្រាបថា ការវិនិយោគបន្ថែមនេះ កើតឡើងចំពេលដែលមានការអំពាវនាវកាន់តែខ្លាំងឡើងពី រដ្ឋាភិបាលអាមេរិក និងប្រទេសសេដ្ឋកិច្ចធំៗផ្សេងទៀត ដើម្បីនាំយកការផ្គត់ផ្គង់បន្ទះឈីបកាន់តែច្រើនចូលទៅក្នុងប្រទេសរបស់ខ្លួន ដោយហេតុថា គេមិនចង់ប្រើប្រាស់បន្ទះឈីបផលិតនៅប្រទេសចិន ក្រោមហេតុផលថា ព្រួយបារម្ភអំពីសន្តិសុខជាតិ។
យ៉ាងណាមិញ ក្រុមហ៊ុន Entergris បានគូសបញ្ជាក់ហើយថា ទោះបីគេកំពុងបង្កើនការផលិតនៅក្រៅប្រទេសក្តី ប៉ុន្តែសង្វាក់ផលិតកម្មធំបំផុត គឺស្ថិតក្នុងសហរដ្ឋអាមេរិកដដែល ពោលបន្ទះឈីបជាង៦០%របស់ Entergris ត្រូវបានផលិតឡើងនៅសហរដ្ឋអាមេរិក។
អត្ថបទគួរអាន
ក្រុមហ៊ុនបច្ចេកវិទ្យាអាមេរិកដដែលនេះ អះអាងទៀតថា ការបង្កើនវិនិយោគនៅក្រៅប្រទេស គឺជាការបង្កើតផលិតកម្មឲ្យមានតុល្យភាពជាងមុន ស្របតាមតម្រូវការ។
សូមជម្រាបថា បច្ចុប្បន្នគឺជាពេលវេលាដែលក្រុមហ៊ុនផលិតឈីបធំៗ កំពុងបង្កើនការវិនិយោគរបស់គេរៀងៗខ្លួន។ ជាក់ស្តែងមិនត្រឹមតែ Entergris នោះទេ សូម្បីតែកំពូលអ្នកផលិតឈីបទាំងបី រួមមាន TSMC Intel និង Samsung សុទ្ធតែបានកំណត់គោលដៅវិនិយោគបន្ថែមក្នុងទំហំជាង ៣៥០ពាន់លានដុល្លារសម្រាប់ការចំណាយលើការការបង្កើនសមត្ថភាពផលិតបន្ទះឈីបរបស់ខ្លួននៅក្នុងពេលប៉ុន្មានឆ្នាំខាងមុខនេះ៕
None
