អាជីវកម្មនៅអាម៉េរិក កំពុងរងផលប៉ះពាល់ពីបញ្ហាជាច្រើនក្នុងពេលតែមួយ។ ជាក់ស្ដែងក្រុមហ៊ុនចែកចាយកាហ្វេ Dilworth Coffee កំពុងប្រឈមតម្លៃកាហ្វេខ្ពស់ដោយសារការប្រមូលផលបានតិចនៅប្រេស៊ីល ពន្ធគយរបស់អាម៉េរិក តម្លៃជីកសិកម្មកើនឡើង និងការរាំងស្ទះការដឹកជញ្ជូនដែលពាក់ព័ន្ធជម្លោះនៅមជ្ឈិមបូព៌ា។ ថ្នាក់ដឹកនាំអាជីវកម្មដែលត្រូវបានស្ទង់មតិដោយវិទ្យាស្ថានគ្រប់គ្រងការផ្គត់ផ្គង់បានប្រៀបធៀបស្ថានភាពបច្ចុប្បន្នទៅនឹងវិបត្តិខ្សែច្រវាក់ផ្គត់ផ្គង់ក្នុងសម័យកាលកូវីដ-១៩ ហើយអាជីវកម្មខ្លះថែមទាំងនិយាយថា ស្ថានភាពពេលនេះកាន់តែពិបាក។
តម្លៃប្រេងម៉ាស៊ូត បានហក់ឡើងទ្វេដងចាប់តាំងពីខែមីនា ដើមឆ្នាំនេះ ខណៈថ្លៃដឹកជញ្ជូនក៏កើនឡើង ដោយសារជម្លោះ ការវាយប្រហារនៅសមុទ្រក្រហម និងបញ្ហាអាកាសធាតុ។ ក្រុមហ៊ុនដឹកជញ្ជូន
ជាច្រើនបានប្រើផ្លូវវៀងជុំវិញទ្វីបអាហ្វ្រិក ដែលលោក រ៉ាយអែន ភីតធើសេន (Ryan Petersen) នាយកប្រតិបត្តិក្រុមហ៊ុន Flexport អះអាងថា បានកាត់បន្ថយសមត្ថភាពដឹកជញ្ជូនសកលប្រហែល១៥%នៅឆ្នាំនេះ។ សម្រាប់អាជីវកម្មធុនតូចរងសម្ពាធកាន់តែខ្លាំង ព្រោះពួកគេត្រូវទទួលបន្ទុកថ្លៃដើមកើនឡើង ខណៈដែលអតិថិជនក៏កាន់តែក្បិតក្បៀតការចាយវាយ៕
