សហភាពអឺរុប នាដើមសប្ដាហ៍នេះ បាននិយាយថា ខ្លួននឹងដំឡើងពន្ធគយលើទំនិញអាមេរិកដែលមានតម្លៃសរុបប្រមាណ ៤ពាន់លានដុល្លារ ពិសេសលើផលិតផលយន្ដហោះអាមេរិក និងផលិតផលនាំចេញដទៃទៀត ដែលមានជាប់ទាក់ទងនឹងក្រុមហ៊ុនយន្ដហោះអាមេរិក Boeing។ ការសម្រេចនេះ បន្ទាប់ពីអឺរ៉ុបទទួលបានភ្លើងបៃតងបើកផ្លូវដោយអង្គការពាណិជ្ជកម្មពិភពលោក WTO កាលពីខែមុននេះ។
តំណាងពាណិជ្ជកម្មអាមេរិក លោក ឡាយធីហ្សឺ បាននិយាយកាលពីខែមុននេះថា សកម្មភាពដែលធ្វើឲ្យទីក្រុងព្រុចសែល ក្នុងការដំឡើងពន្ធលើមុខទំនិញអាមេរិកនេះ នឹងបង្ខំឲ្យអាមេរិកត្រូវតែមានការឆ្លើយតបត្រឡប់ទៅវិញ ប៉ុន្ដែ នៅក្នុងសេចក្ដីថ្លែងការណ៍ខ្លីមួយដែលបានចេញកាលពីថ្ងៃចន្ទទី០៩ ខែវិច្ឆិកា មិនមានបញ្ជាក់ពីការគំរាមកំហែងបែបនេះនោះទេ ហើយការិយាល័យរបស់លោក ក៏បានបញ្ជាក់ដែរថា ភាគីទាំងពីរកំពុងចរចាគ្នា ដើម្បីដោះស្រាយជម្លោះនេះ ដែលវាជាបញ្ហាមានជាយូរមកហើយ។
អត្ថបទទាក់ទង!
លោក ឡាយធីហ្សឺ បានលើកឡើងថា អាមេរិកមានការខកចិត្តណាស់ ចំពោះសកម្មភាពដែលសហភាពអឺរ៉ុបបានធ្វើនាពេលនេះ ហើយលោកក៏បានចោទដោយប្រយោលទៅលើអង្គការពាណិជ្ជកម្មពិភពលោកថា កំពុងជួយអឺរ៉ុបឲ្យដាក់បន្ទុកពន្ធគយលើទំនិញអាមេរិក ដោយលោកបាននិយាយយ៉ាងដូច្នេះថា «សហភាពអឺរ៉ុប បានប្រកាសជាយូរមកហើយនូវការប្ដេជ្ញាចិត្តរបស់ខ្លួនក្នុងការគោរពតាមច្បាប់របស់អង្គការពាណិជ្ជកម្មពិភពលោក ប៉ុន្ដែ ពួកគេអាចធ្វើបែបនេះទៅបាន លុះត្រាតែ វាមានភាពងាយស្រួលសម្រាប់ពួកគេ។»
ទោះយ៉ាងណា ទីក្រុងព្រុចសែល បានបញ្ជាក់ថា មានតែអង្គការពាណិជ្ជកម្មពិភពលោកតែមួយគត់ ដែលអាចកំណត់ថា តើសមាជិកមួយណាបានគោរពតាមសេចក្ដីច្បាប់របស់ខ្លួនដែរ ឬក៏អត់នោះ។
មន្ត្រីសហភាពអឺរ៉ុប បានគូសបញ្ជាក់ពីគោលបំណងរបស់ពួកគេ ក្នុងការដោះស្រាយជម្លោះរយៈពេល ១៦ឆ្នាំមកហើយនោះ ជាមួយសហរដ្ឋអាមេរិកឲ្យឆាប់ដាច់ស្រេច ដោយអឺរ៉ុបបានលើកហេតុផលថា បញ្ហាជម្លោះនេះ គឺធ្វើឲ្យប្រទេសចិន និងដៃគូប្រជែងដទៃទៀត គឺជាអ្នកទទួលបានផលប្រយោជន៍ធំ៕
None
