ធ្វើឡើងនៅក្នុងទីក្រុងបាកកនៅថ្ងៃទី ០៩ ខែវិច្ឆិកា ឆ្នាំ២០២០ តាមវីដេអូអនឡាញ សន្និសីទអំពីសេដ្ឋកិច្ចវិលជុំ នៅឆ្នាំ២០២០នេះ គឺធ្វើឡើងក្នុងបំណងបំផុសគំនិតនៅក្នុងការដោះស្រាយភាពប្រឈមចំពោះជាតិ និងប្រជាជន ដែលកំពុងកើតមាន ដូចជា របៀបកាត់បន្ថយផលប៉ះពាល់ពីបញ្ហាអាកាសធាតុ ធូលីបំពុលខ្យល់ គ្រោះរាំងស្ងួត ទឹកជំនន់ កង្វះធនធានធម្មជាតិ ការកើនឡើងនូវសំណល់ផ្លាស្ទិកក្នុងអំឡុងវិបត្តិកូវីដ-១៩ ។
លោក រ៉ុងរ៉ូត រង្ស៊ីយ៉ូផាស ប្រធាននិងអគ្គនាយក SCG និងលោក Tanawong Areeratchaku ប្រធានគណៈកម្មាធិការអភិវឌ្ឍន៍ដោយចិរភាពរបស់ SCG រួមគ្នាជាមួយនឹងដៃគូ ១៨០ស្ថាប័ន-ក្រុមហ៊ុនផ្សេងទៀត បានប្រកាសរួមគ្នាអំពីវឌ្ឍនភាពនៃការជំរុញគោលការណ៍សេដ្ឋកិច្ចវិលជុំ “circular economy” ទៅក្នុងសង្គម ដោយប្រធានបទសំខាន់នៅឆ្នាំនេះ គឺទាក់ទងនឹង សកម្មភាពដើម្បីអនាគតប្រកបដោយចីរភាព ។”
ក្រុមហ៊ុន និងស្ថាប័នចំនួន១៨០ ចូលរួមជំរុញគាំទ្រដល់គំរូសេដ្ឋកិច្ចវិលជុំនៅឆ្នាំ២០២០ ទោះកំពុងមានកូវីដ-១៩មករំខាន!
សម្រាប់សន្និសីទនៅឆ្នាំ២០២០នេះ កត្តាមូលដ្ឋានសំខាន់ៗចំនួន៤ ដែលត្រូវបានលើកយកមកពិភាក្សា និងដាក់បញ្ចូលក្នុងកិច្ចសហប្រតិបត្តិការ ដើម្បីធ្វើឲ្យជីវភាពរស់នៅកាន់តែប្រសើរឡើង ជាមួយនឹងគោលការណ៍សេដ្ឋកិច្ចវិលជុំ រួមមាន៖
១. កសាងប្រព័ន្ធទឹកវិលជុំ ៖ ជាការត្រៀមលក្ខណៈដើម្បីទប់ទល់នឹងគ្រោះរាំងស្ងួតធ្ងន់ធ្ងរនៅឆ្នាំខាងមុខ កិច្ចសហប្រតិបត្តិការនេះ មានគោលដៅជំរុញកសិករឲ្យមានភាពស៊ាំក្នុងការរៀនសូត្រអំពីវិធីសាស្ត្រកែសម្រួលដី រួមជាមួយនឹងការប្រើប្រាស់បច្ចេកវិទ្យា ។ លើសពីនេះទៀត ដើម្បីអប់រំកសិករនិងកសិករថ្មីដែលវិលត្រឡប់ទៅស្រុកកំណើតវិញដោយសារផលប៉ះពាល់សេដ្ឋកិច្ចពីកូវីដ-១៩ និងពង្រីកគំនិតទាំងនេះទៅទូទាំងប្រទេស យើងបានស្នើសុំឲ្យរដ្ឋាភិបាលចូលរួមនៅក្នុងគម្រោងនេះ ។ គោលបំណងនៃគម្រោងនេះ គឺដើម្បីកាត់បន្ថយវិសមភាពសង្គម ស្ដារសេដ្ឋកិច្ចសហគមន៍ និងបង្កើនផលដំណាំកសិកម្មរបស់ប្រទេស ដើម្បីឲ្យប្រទេសថៃក្លាយជាផ្ទះបាយរបស់ពិភពលោក ។
ក្រុមហ៊ុន និងស្ថាប័នចំនួន១៨០ ចូលរួមជំរុញគាំទ្រដល់គំរូសេដ្ឋកិច្ចវិលជុំនៅឆ្នាំ២០២០ ទោះកំពុងមានកូវីដ-១៩មករំខាន!
២. ជំរុញកសិកម្មដែលគ្មានការដុតភ្លើង ១០០% នៅក្នុងឆ្នាំ២០២២ ដោយអនុវត្តគោលការណ៍សេដ្ឋកិច្ចវិលជុំ ដោយច្នៃប្រើប្រាស់ឡើងវិញនូវសម្ភារសំណល់ ដូចជា គល់កញ្ជ្រាំង ស្លឹកអំពៅ ចំបើង ដោយបំប្លែងវាទៅជាថាមពលជំនួស ជីវម៉ាស ចំណីសត្វ ជាដើម ហើយការវេចខ្ចប់ដោយប្រើរុក្ខជាតិ នឹងកាត់បន្ថយធូលី PM 2.5 និងបង្កើតចំណូលបាន ២៥.០០០លានបាត ក្នុងមួយឆ្នាំ ។ បន្ថែមលើនេះ គឺការណែនាំអំពីគោលគំនិតសេដ្ឋកិច្ចចែករំលែក (sharing economy) នៅក្នុងការបង្កើតមូលនិធិគ្រឿងចក្រសហគមន៍ ដែលអនុញ្ញាតឲ្យកសិករប្រើប្រាស់គ្រឿងចក្រកសិកម្មសម្រាប់ការកែលម្អការដាំដុះ និងការប្រមូលផល ព្រមទាំងបង្កើនទិន្នផលរបស់ពួកគាត់ ដោយមិនចាំបាច់វិនិយោគទៅលើគ្រឿងចក្រដោយខ្លួនឯងឡើយ ។
អត្ថបទទាក់ទង!
៣. ជំរុញឲ្យរដ្ឋាភិបាលដាក់ការគ្រប់គ្រងសំណល់ផ្លាស្ទិកជារបៀបវារៈជាតិ ។ ប្រទេសថៃត្រូវតែអនុវត្តច្បាប់គ្រប់គ្រងសំណល់ឲ្យបានហ្មត់ចត់ ។ រដ្ឋាភិបាលក៏ត្រូវបានជំរុញផងដែរ ឲ្យជួយសម្របសម្រួលនិងដាក់ចេញនូវបទប្បញ្ញត្តិនានា ដើម្បីអាចធ្វើការរួមគ្នានៅលើបញ្ហានេះបាន ។ ផែនទីបង្ហាញផ្លូវសម្រាប់ការគ្រប់គ្រងសំណល់ផ្លាស្ទិក ត្រូវការចាំបាច់នូវក្របខ័ណ្ឌរឹងមាំ និងដំណើរការការងារច្បាស់លាស់ ។ ស្ថាប័ននិយ័តកម្ម ត្រូវដឹកនាំភាពម្ចាស់ការនៅក្នុងការដោះស្រាយបញ្ហានេះ នៅក្នុងខ្សែចង្វាក់តម្លៃទាំងអស់ ដោយរាប់ចាប់តាំងពីការកែសម្រួលរចនាសម្ព័ន្ធពន្ធ និងការផ្ដល់បុព្វសិទ្ធិពន្ធដល់ធុរកិច្ចគ្រប់គ្រងនិងកែច្នៃសំណល់ ។
៤. ជំរុញសេដ្ឋកិច្ចវិលជុំនៅក្នុងវិស័យសំណង់ ។ នៅក្នុងការប្រែក្លាយវិស័យសំណង់ឲ្យទៅជាវិស័យបៃតងនិងបរិស្ថានមេត្រី រដ្ឋាភិបាលចាំបាច់ត្រូវតែដើរតួនាទីដឹកនាំ ។ រដ្ឋាភិបាលត្រូវដាក់ចេញនូវគោលការណ៍ណែនាំលទ្ធកម្មថ្មីសម្រាប់គម្រោងហេដ្ឋារចនាសម្ព័ន្ធធំៗ ។ ការប្រើប្រាស់បច្ចេកវិទ្យាដើម្បីគ្រប់គ្រងធនធានឲ្យមានប្រសិទ្ធផលអតិបរមា និងកាត់បន្ថយសំណល់គ្រឿងសំណង់ ក៏ចាំបាច់ត្រូវដាក់បញ្ចូលនៅក្នុងគោលការណ៍ណែនាំនេះផងដែរ ឬម្យ៉ាងទៀត ត្រូវផ្ដល់ការលើកទឹកចិត្តផ្នែកពន្ធដល់អ្នកម៉ៅការគម្រោងសាងសង់ ដើម្បីលើកទឹកចិត្តពួកគេឲ្យងាកទៅប្រើប្រាស់វត្ថុធាតុដើមបរិស្ថានមេត្រី ឬច្នៃប្រើប្រាស់វត្ថុធាតុដើមឡើងវិញ នៅក្នុងការសាងសង់៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
