សហរដ្ឋអាម៉េរិក សម្រេចបានកំណើនផលិតផលក្នុងស្រុកសរុប(GDP)ក្នុងរង្វង់១,៦% នៅត្រីមាសទី១ឆ្នាំ២០២៤នេះ ទាបជាងអ្វីដែលប្រទេសនេះបានរំពឹងទុក។ កំណើនត្រូវបានគាំទ្រ និងជំរុញដោយកំណើនចំណាយរបស់អ្នកប្រើប្រាស់។ នេះបើយោងតាមរបាយការប៉ាន់ស្មានរបស់ការិយាល័យវិភាគសេដ្ឋកិច្ចរបស់ក្រសួងពាណិជ្ជកម្មអាម៉េរិក។
ក្រុមសេដ្ឋវិទូបានព្យាករនៅក្នុងការស្ទង់មតិមួយកាលពីពេលកន្លងមកថា សហរដ្ឋអាម៉េរិកនឹងសម្រេចបានកំណើន GDP ក្នុងរង្វង់២,៤% នៅត្រីមាសទី១ឆ្នាំនេះ។ សេដ្ឋកិច្ចអាម៉េរិកសម្រេចបានកំណើនក្នុងរង្វង់៣,៤% នៅក្នុងត្រីមាសទី៤ចុងឆ្នាំ២០២៣ ខ្ពស់ជាងអ្វីដែលមន្ត្រីធនាគារកណ្តាលអាម៉េរិកបានរំពឹងទុកជាមួយអត្រា១,៨%។
មូលនិធិរូបិយវត្ថុអន្តរជាតិ កាលពីសប្តាហ៍មុនបានដំឡើងការព្យាកររបស់ខ្លួនដែលបានធ្វើកាលពីខែមករា សម្រាប់កំណើនសេដ្ឋកិច្ចរបស់សហរដ្ឋអាម៉េរិក នៅឆ្នាំ២០២៤ នេះ ពីអត្រា២,១% ទៅដល់២,៧%។ ការកែប្រែការព្យាករនេះ គឺដោយសារសន្ទុះការងារ និងការចំណាយរបស់អតិថិជនបានកើនឡើងខ្លាំងជាងការរំពឹកទុក។ ជាក់ស្ដែងការទទួលបានការងារធ្វើនៅក្នុងត្រីមាសទី១ មានជាមធ្យមជាង២៧ ម៉ឺនកន្លែងក្នុង១ខែ បើធៀបនឹងត្រីមាសទី៤កាលពីឆ្នាំ២០២៣ ដែលមានជាមធ្យមត្រឹមតែជាង ២១ម៉ឺនកន្លែងប៉ុណ្ណោះ។
សេដ្ឋកិច្ចអាម៉េរិក បានដើរផ្ទុយពីការព្យាករចាប់តាំងពីចុងឆ្នាំ២០២២ បន្ទាប់ពីមានយុទ្ធនាការដំឡើងអត្រាការប្រាក់ដ៏ខ្លាំងក្លារបស់ធនាគារកណ្ដាលអាម៉េរិក ដើម្បីទម្លាក់កម្រិតអតិផរណា តែយ៉ាងណាសេដ្ឋកិច្ចរបស់សហរដ្ឋអាម៉េរិកកំពុងដំណើរការល្អជាងបណ្ដាប្រទេស ដែលមានសេដ្ឋកិច្ចជឿនលឿនផ្សេងទៀត៕
អត្ថបទ៖ សុខ មង្គល
