គេនៅចាំបានដែរថាកាលនោះ ភ្លាមៗក្រោយលោកត្រាំដាក់ពន្ធលើទំនិញរបស់អឺរ៉ុប, អឺរ៉ុបបានឆ្លើយតបភ្លាមៗដោយបានដាក់ពន្ធលើផលិតផលកសិកម្មនាំចូលពីអាមេរិកវិញ។ នេះបើតាមការចុះផ្សាយដោយទីភ្នាក់ងារសារព័ត៌មានបារាំងAFP។
ការយោគយល់គ្នានេះ ត្រូវបានប្រកាសដោយ រដ្ឋមន្ត្រីពាណិជ្ជកម្មរបស់សហរដ្ឋអាមេរិក គឺលោកស្រី ជីណា រ៉ៃម៉ុនដូ ដែលបានអះអាងថា សហរដ្ឋអាមេរិកនឹងអនុញ្ញាត ឲ្យនាំចូលដែក និងអាលុយមីញ៉ូម ពីអឺរ៉ុប ក្នុងចំនួនកំណត់ណាមួយ ដោយមិនមានការគិតពន្ធឡើយ។
ទោះយ៉ាងណា លោកស្រីមិនបានបញ្ជាក់ឡើយថា ការនាំចូលដែក និងអាលុយមីញ៉ូមក្នុងចំនួនប៉ុន្មានដែលនឹងត្រូវកំណត់ថា មិនគិតពន្ធនោះទេ។ កិច្ចយោគយល់គ្នាថ្មីនេះ គ្រាន់តែបានបញ្ជាក់ថា ផលិតផលដែក និងអាលុយមីញ៉ូមដែលផលិតនៅក្នុងតំបន់អឺរ៉ុបផ្ទាល់ ទើបអាចនាំចូលទៅអាមេរិកដោយមិនគិតពន្ធបាន ខណៈផលិតផលិតអឺរ៉ុប ដែលផលិតក្រៅតំបន់ នៅតែបន្តគិតពន្ធធម្មតាដដែល។
ថ្លែងចេញពីទីក្រុងរ៉ូម ប្រទេសអ៊ីតាលីក្នុងឱកាសកិច្ចប្រជុំប្រទេសសេដ្ឋកិច្ចរីកចម្រើនទាំង២០ ឬហៅថា G20 លោកស្រី ជីណា បានសង្កត់ធ្ងន់ថា៖ មិនត្រឹមតែពន្ធលើដែក និងអាលុយមីញ៉ូមដែលអាមេរិកនាំចូលនោះទេ ដែលត្រូវលើកលែងពន្ធវិញ សូម្បីតែផលិតផលសំខាន់របស់អាមេរិកដែលនាំចេញទៅ អឺរ៉ុប ក៏ត្រូវបានអឺរ៉ុបបន្ធូរបន្ថយពន្ធវិញដែរ។ ក្នុងនោះរួមមាន ម៉ូតូម៉ូឌែល ហាក់ឡី (Harley-Davidson motorcycles) និង ខោខូវប៊យម៉ាក លីវ៉ាយ (Levi) ជាដើម។អត្ថបទគួរអាន
គួររំឭកថា សហរដ្ឋអាមេរិកនៅឆ្នាំ២០១៨ ក្រោមរដ្ឋបាលលោកដូណាល់ ត្រាំ បានដំឡើងរនាំងពន្ធគយ ២៥% លើដែក និង១០%លើអាលុយមីញ៉ូម ដែលនាំចូលពីប្រទេសជាច្រើនមកក្នុងសហរដ្ឋអាមេរិក ដោយក្នុងនោះ ក៏មានសភាពអឺរ៉ុបមួយដែរ។ ទង្វើនេះធ្លាប់ត្រូវបានលោក ដូណាល់ ត្រាំ អះអាងជាការការពារផលប្រយោជន៍ និងសន្តិសុខជាតិអាមេរិក។
ហើយគេនៅចាំបានដែរថា ភ្លាមៗក្រោយលោកត្រាំដាក់ពន្ធលើទំនិញរបស់អឺរ៉ុប, អឺរ៉ុបបានឆ្លើយតបភ្លាមៗដោយបានដាក់ពន្ធលើផលិតផលកសិកម្មនាំចូលពីអាមេរិកវិញ។
សូមជម្រាបថា កិច្ចប្រជុំកំពូល G20 ដែលប្រទេសអ៊ីតាលីធ្វើជាម្ចាស់ផ្ទះនៅឆ្នាំនេះ ត្រូវបានគេមើលឃើញថា នឹងក្លាយជាវេទិកាផ្សះផ្សាភាពល្អក់កកររវាងអាមេរិក និងអឺរ៉ុបឡើងវិញ ក្រោយមើលមុខគ្នាមិនសូវចំនោះទេ ក្នុងរដ្ឋបាលរបស់បុរសជាតិនិយមដូណាល់ត្រាំ៕
None
