ក្រៅពីតែបានថ្លែងអំពីការតាំងចិត្តក្នុងការឈានទៅផលិតវ៉ាក់សាំងឲ្យបាន៥ពាន់លានដូសនៅឆ្នាំ២០២២ នៅក្នុងកិច្ចប្រជុំ G20 លោកនាយករដ្ឋមន្ត្រីឥណ្ឌា ណារិនដ្រា ម៉ូឌី ក៏បានលើកឡើងអំពីបញ្ហានៃការសម្រួលដល់ការធ្វើដំណើរអន្តរជាតិ និងបានជជែកអំពីយន្ដការយោគយល់គ្នាទៅវិញទៅមកនៃការទទួលស្គាល់លិខិតបញ្ជាក់វ៉ាក់សាំងជាដើម។
ឥណ្ឌាចាត់ទុកថា ការប្តេជ្ញាចិត្តក្នុងការផលិតវ៉ាក់សាំងឲ្យបានជាង៥ពាន់លានដូសនៅឆ្នាំក្រោយនេះ នឹងចូលរួមក្នុងការការពារការឆ្លងរីករាលដាលនៃមេរោគកូវីដ១៩ ប៉ុន្ដែ វាក៏ត្រូវការឲ្យអង្គការសុខភាពពិភពលោកអនុម័តវ៉ាក់សាំងកូវីដ១៩ ដែលផលិតនៅក្នុងប្រទេសឥណ្ឌាឲ្យបានលឿនបំផុតផងដែរ។
ក្រុមផ្ដល់យោបល់ផ្នែកបច្ចេកទេស នៃអង្គការសុខភាពពិភពលោក នឹងជួបប្រជុំពិភាក្សាគ្នានៅថ្ងៃទី ៣ ខែវិច្ឆិកានេះ ដើម្បីប្រជុំសម្រេចចុងក្រោយ អំពីការវាយតម្លៃអំពីអត្ថប្រយោជន៍ និងហានិភ័យនៃការប្រើប្រាស់បន្ទាន់វ៉ាក់សាំងរបស់ឥណ្ឌាមួយប្រភេទដែលមានឈ្មោះថា Covaxin។អត្ថបទគួរអាន
វ៉ាក់សាំង Covaxin គឺវ៉ាក់សាំងកូវីដ១៩មួយប្រភេទ ដែលផលិតដោយ ស្ថាប័ន Bharat Biotech របស់ឥណ្ឌា ហើយវ៉ាក់សាំងនេះ ក៏មានការប្រើប្រាស់យ៉ាងទូលំទូលាយនៅក្នុងប្រទេសឥណ្ឌា ដូចទៅនឹងវ៉ាក់សាំង Covishield ដែលទទួលបានរូបមន្ដផលិតពីក្រុមហ៊ុន AstraZeneca និងសាកលវិទ្យាល័យ Oxfordដែរ។ កន្លងមក វ៉ាក់សាំងប្រភេទ Covishield នេះត្រូវបានអង្គការសុខភាពពិភពលោកអនុម័តឲ្យមានការប្រើប្រាស់បន្ទាន់រួចហើយដែរ ហើយវាក៏ត្រូវបានបែងចែកមួយចំនួនតាមរយៈយន្ដការកូវ៉ាក់ផងដែរ។
រដ្ឋមន្ត្រីការបរទេសឥណ្ឌា លោក ហាស់ វ៉ាដាន ស្រ៊ីងក្លា (Harsh Vardhan Shringla) បានអះអាងថា ឥណ្ឌាមិនត្រឹមតែជាប្រទេសនឹងផលិតវ៉ាក់សាំងឲ្យបានជាង៥ពាន់លានដូសនៅឆ្នាំក្រោយប៉ុណ្ណោះ ប៉ុន្ដែឥណ្ឌាថ្មីៗ ក៏ទើបតែបានចាក់វ៉ាក់សាំងជូនពលរដ្ឋរបស់ខ្លួនដល់ចំនួនជាង ១ពាន់លានដូសរួចហើយដែរ ហើយផែនការបង្កើនការផលិតវ៉ាក់សាំងនេះ ឥណ្ឌារំពឹងថា នឹងអាចជួយកាត់បន្ថយនូវវិសមភាពវ៉ាក់សាំង ពិសេសនៅក្នុងបណ្ដាប្រទេសកំពុងអភិវឌ្ឍន៍ទូទាំងពិភពលោកផងដែរ៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
