សហរដ្ឋអាម៉េរិក ប្រឈមកង្វះរ៉ែលោហៈកម្រធ្ងន់ធ្ងរ ខណៈមហាយក្សចិនកាន់កាប់៨០%នៃខ្សែច្រវាក់ផ្គត់ផ្គង់រ៉ែកម្រនេះ

មហាយក្សចិន មានចំណែកគ្របដណ្ដប់លើលប់លើខ្សែច្រវាក់ផ្គត់ផ្គង់រ៉ែសំខាន់ៗជាច្រើនប្រភេទរបស់ពិភពលោក ប៉ុន្តែរហូតមកទល់ពេលនេះ ប្រទេសដែលមានសេដ្ឋកិច្ចធំបំផុតទី២របស់ពិភពលោកមួយនេះនៅមិនទាន់បានអនុម័តវិធានដ៏ទូលំទូលាយ ដើម្បីគ្រប់គ្រងរ៉ែលោហៈដ៏កម្រ និងដ៏មានសារសំខាន់មានឈ្មោះថា ថាំងស្ទេន (Tungsten) នៅឡើយទេ។

យោងតាមអ្នកជំនាញបានឱ្យដឹងថា រ៉ែលោហៈដ៏កម្រ ថាំងស្ទេន មានសភាពរឹងខ្លាំងស្ទើរតែដូចត្បូងពេជ្រ និងមានដង់ស៊ីតេថាមពលខ្ពស់ដែលធ្វើឱ្យវាក្លាយជាធាតុផ្សំដ៏សំខាន់មួយដែលត្រូវបានគេប្រើប្រាស់នៅក្នុងការផលិតអាវុធ រថយន្ត អាគុយរថយន្តអគ្គិសនី បន្ទះឈីប និងគ្រឿងចក្រសម្រាប់កាត់ជាដើម។

សូមបញ្ជាក់ថា បណ្ដាក្រុមហ៊ុនផលិតបន្ទះឈីបធំៗដូចជាក្រុមហ៊ុនផលិតបន្ទះឈីបខ្នាតយក្សរបស់តៃវ៉ាន់ TSMC និងក្រុមហ៊ុនបច្ចេកវិទ្យាខ្នាតយក្សរបស់សហរដ្ឋអាម៉េរិក Nvidia ជាដើម ក៏កំពុងប្រើប្រាស់រ៉ែលោហៈដ៏កម្រ ថាំងស្ទេន នេះដែរ។

ហើយបើទោះបីជារដ្ឋបាលរបស់ប្រធានាធិបតីអាម៉េរិកលោក ចូ បៃឌិន បានដំឡើងពន្ធនាំចូលលើរ៉ែលោហៈដ៏កម្រ ថាំងស្ទេន កាលពីអំឡុងខែឧសភា ឆ្នាំ២០២៤ នេះយ៉ាងណាក្ដី ក៏ប្រទេសចិន មិនទាន់បានដាក់បញ្ចូលរ៉ែលោហៈដ៏កម្រនេះចូលទៅក្នុងវិធានថ្មីៗ របស់ខ្លួន ក្នុងគោលបំណងពង្រឹងការគ្រប់គ្រងលើការចម្រាញ់រ៉ែកម្រប្រភេទនេះនៅឡើយទេ៕

ដោយ: តែម សុខុម