ធនាគារកណ្ដាលអាម៉េរិក និងធនាគារកណ្ដាលនៃប្រទេសធំៗជាច្រើនអាចនឹងបញ្ចុះអត្រាការប្រាក់ជាថ្មីនៅសប្ដាហ៍នេះ ក្រោយការបោះឆ្នោតនៅសហរដ្ឋអាម៉េរិក

ធនាគារកណ្តាលនៃប្រទេសមានសេដ្ឋកិច្ចធំៗជាច្រើនដែលមានទំហំគ្របដណ្ដប់រហូតដល់ទៅជាង១ភាគ៣នៃសេដ្ឋកិច្ចពិភពលោក នឹងបញ្ចុះអត្រាការប្រាក់ភ្លាមៗក្រោយពីការបោះឆ្នោតនៅសហរដ្ឋអាម៉េរិក ដោយផ្អែកទៅលើការតម្រង់ទិសគោលនយោបាយរបស់សហរដ្ឋអាម៉េរិក សម្រាប់រយៈពេល៤ឆ្នាំបន្ទាប់។

ស្របពេលដែលអនុប្រធានាធិបតីអាម៉េរិក លោកស្រី កាម៉ាឡា ហារីស (Kamala Harris) និងអតីតប្រធានាធិបតីលោក ដូណាល់ ត្រាំ កំពុងប្រកួតប្រជែងគ្នាយ៉ាងស្វិតស្វាញ និងយ៉ាងប្រកិតប្រកៀកគ្នានៅក្នុងយុទ្ធនាការឃោសនារកសំឡេងគាំទ្រនៅមុនថ្ងៃបោះឆ្នោតនៅថ្ងៃទី៥ ខែវិច្ឆិកា ដ៏ខ្លីខាងមុខនេះ ក្រុមមន្ត្រីរូបិយវត្ថុនៅទូទាំងពិភពលោករាប់ចាប់ពីក្រុងវ៉ាស៊ីនតោន រហូតដល់ក្រុងឡុងដ៍ ហាក់មិនទាន់ប្រាកដប្រជានៅឡើយទេថា តើលទ្ធផលនៃការបោះឆ្នោតរបស់សហរដ្ឋអាម៉េរិកនឹងអាចជះឥទ្ធិពលលើគោលនយោបាយថ្ងៃអនាគតយ៉ាងណានោះទេ។

ដោយទុកការបោះឆ្នោតមួយឡែក ក្រុមអ្នកបង្កើតគោលនយោបាយរបស់សហរដ្ឋអាម៉េរិក បានផ្ដល់សញ្ញាបង្អង់ល្បឿនបញ្ចុះអត្រាការប្រាក់រួចមកហើយ បន្ទាប់ពីបានបញ្ចុះអត្រាការយ៉ាងច្រើនរហូតដល់ទៅ០,៥០%កាលពីអំឡុងខែកញ្ញា កន្លងទៅថ្មីៗនេះ។

ក្រុមអ្នកជំនាញសេដ្ឋកិច្ចបានព្យាករយ៉ាងទូលំទូលាយថា ធនាគារកណ្ដាលអាម៉េរិក អាចនឹងបញ្ចុះអត្រាការប្រាក់ក្នុងរង្វង់០,២៥% នៅថ្ងៃព្រហស្បតិ៍ ទី៧ ខែវិច្ឆិកា ដ៏ខ្លីខាងមុខនេះ ហើយនឹងបញ្ចុះ០,២៥%បន្ថែមទៀតនៅខែធ្នូ មុនដាច់ឆ្នាំ២០២៤ ជាពិសេសបន្ទាប់ពីទិន្នន័យទីផ្សារការងារកាលពីថ្ងៃសុក្រ សប្ដាហ៍​មុន បានបង្ហាញពីកំណើនការងារខ្សោយបំផុតនៅសហរដ្ឋអាម៉េរិក ចាប់តាំងពីឆ្នាំ២០២០ មក។

ជាការពិតណាស់ ក្រុមមន្ត្រីធនាគារកណ្ដាលអាម៉េរិក មានបំណងបញ្ចៀសបញ្ហានយោបាយ ប៉ុន្តែពួកគេបែរជាចាប់ផ្តើមបញ្ចុះអត្រាការប្រាក់នៅកៀកថ្ងៃបោះឆ្នោតទៅវិញ ដែលកត្តានេះអាចជះឥទ្ធិពលលើទស្សនៈយល់ឃើញរបស់អ្នកបោះឆ្នោតមកលើសេដ្ឋកិច្ច។

សូមបញ្ជាក់ថា ធនាគារកណ្តាលនៅជុំវិញពិភពលោកកំពុងប្រឈមហានិភ័យផ្សេងៗរួមទាំងបញ្ហាកំណើនសេដ្ឋកិច្ចយឺត និងអតិផរណាដែលកំពុងបន្តហក់ឡើងផងដែរ ជាពិសេសការគំរាមកំហែងផ្នែកពន្ធគយពីសំណាក់លោក ដូណាល់ ត្រាំ ដែលអាចជះផលប៉ះពាល់ដល់ពាណិជ្ជកម្មពិភពលោក៕

ដោយ: តែម សុខុម