បើតាមតារាងវាយតម្លៃប្រទេស និងតំបន់លើការគ្រប់គ្រងការឆ្លងមេរោគកូវីដ១៩ ការចាក់វ៉ាក់សាំង និងសកម្មភាពសង្គមនានា បានបង្ហាញថា សម្រាប់ខែមិថុនា ប្រទេសកម្ពុជាបានឡើងមកឈរនៅលំដាប់លេខរៀងទី១ បន្ទាប់ពីឈរនៅលេខ២ និងលេខ៣ តាំងពីខែមីនាមក។ ហើយកម្ពុជាបានកត់ត្រាគ្មានករណីឆ្លងថ្មីទៀតទេក្នុងរយៈពេល ៥២ ថ្ងៃជាប់ៗគ្នា ពោលគឺទើបតែមកដល់ថ្ងៃទី ២៨ ខែមិថុនា ទើបមានការរាយការណ៍ថា មានអ្នកឆ្លងថ្មី បន្ដរកឃើញឡើងវិញ។
បើទោះជា ករណីឆ្លងរកឃើញថ្មី មានចំនួនតិចតួចក៏ដោយ ប៉ុន្ដែ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានព្រមានពីការផ្ទុះឡើងសារជាថ្មីនៃការឆ្លងរាតត្បាតកូវីដ១៩ ហើយបានអំពាវនាវដល់សាធារណជន ឱ្យមានការប្រុងប្រយ័ត្ន និងពាក់ម៉ាស់ផងដែរ។
ដោយឡែក សម្រាប់ប្រទេសវៀតណាមវិញ តាមតារាងវាយតម្លៃអំពីការងើបឡើងវិញពីវិបត្តិជំងឺកូវីដ១៩ របស់សារព័ត៌មាន Nikkei បានបង្ហាញថា វៀតណាមបានហក់ឡើងដល់ចំណាត់ថ្នាក់លេខ ២ បន្ទាប់ពីប្រទេសកម្ពុជា ដោយចាប់ពីថ្ងៃទី១៤ ខែមិថុនាមក ប្រទេសជិតខាងកម្ពុជាមួយនេះ មានសារការធ្លាក់ចុះ ករណីឆ្លង និងករណីស្លាប់ដោយសារកូវីដ១៩ជាបន្តបន្ទាប់ ។
អត្ថបទគួរអាន
យោងតាមរដ្ឋាភិបាលវៀតណាម ជាមធ្យមមានពី ៦០០ ទៅ ៧០០ ករណីត្រូវបានកត់ត្រាជារៀងរាល់ថ្ងៃក្នុងខែមិថុនា ហើយអត្រាមរណភាពវិញមានត្រឹមតែ ០.០២% ដែលជាការប្រសើរឡើងគួរឱ្យកត់សម្គាល់ធៀបនឹងខែមុន។
ដោយឡែក សមាជិកផ្សេងទៀត នៃប្រទេសអាស៊ាន ក៏មានការជាសះស្បើយគួរគត់សម្គាល់ណាស់ដែរ។ ប្រទេសថៃបានទម្លាក់ចោលនូវវិធានការកូវីដ១៩ស្ទើរតែទាំងអស់ហើយគិតមកទល់ពេលនេះ ខណៈ ប្រទេសថៃ បានឈរនៅលេខរៀងពី៣៦ ក្នុងចំណោមប្រទេសតំបន់អាស៊ី ដែលមានការងើបឡើងវិញពីកូវីដ១៩បានប្រសើរជាងគេ។
ប្រទេសឥណ្ឌូណេស៊ីទទួលបានចំណាត់ថ្នាក់ក្បែរគ្នា បើធៀបនឹងប្រទេសថៃគឺលេខរៀងទី ៤៣។ ទោះយ៉ាងណា ប្រធានាធិបតីឥណ្ឌូណេស៊ី លោកចូកូ វីដូដូ បានព្យាករណ៍ថា ប្រទេសឥណ្ឌូណេស៊ីនឹងត្រូវប្រឈមមុខនឹងការកើនឡើងនៃការឆ្លងកូវីដ១៩រលកថ្មី នៅចុងខែនេះ។
រីឯប្រទេសចិនវិញក៏មានភាពល្អប្រសើរគួរឲ្យកត់សម្គាល់ដែរ ដោយបានជាប់ចំណាត់ថ្នាក់លេខ ៣៨។ ថ្មីៗនេះ ចិនបានកាត់បន្ថយរយៈពេលធ្វើចត្តាឡីស័កសម្រាប់អ្នកធ្វើដំណើរចូលក្នុងប្រទេសខ្លួនពី ២១ ថ្ងែមកត្រឹម១០ ថ្ងែ។ ទោះយ៉ាងណា ទីក្រុងប៉េកាំងនៅតែមានការបិទខ្ទប់នៅផ្នែកខ្លះនៃប្រទេស និងការធ្វើតេស្តជាទ្រង់ទ្រាយនៅតែបន្តត្រូវបានអនុវត្តនៅទូទាំងប្រទេសនៅឡើយទេ៕
