ប្រទេសលីទុយអានី ដែលជាប្រទេសតូចមួយនៅអឺរ៉ុប បច្ចុប្បន្នកំពុងមានការប្រទាំងប្រទើសគ្នាជាមួយចិនកាន់តែខ្លាំង និងត្រូវបានចិនដាក់សម្ពាធលើការនាំចេញទំនិញទៅកាន់ប្រទេសចិនផងដែរ។ បញ្ហាប៉ះពារពាក្យសម្ដីគ្នា និងឈានដល់ការចាត់វិធានការធ្ងន់ធ្ងរពីសំណាក់រដ្ឋាភិបាលក្រុងប៉េកាំងទៅលើប្រទេសលីទុយអានីនេះ គឺធ្វើឡើងនៅក្រោយដែលប្រទេសអឺរ៉ុបមួយនេះ បានអនុញ្ញាតកោះតៃវ៉ាន់តាំងការិយាល័យនៅក្នុងទីក្រុងវីលនីសរបស់ខ្លួន ដោយបានដាក់ឈ្មោះចំៗថា តៃវ៉ាន់ ជំនួសឲ្យឈ្មោះ ទីក្រុងតៃប៉ិនៃប្រទេសចិន។
ដូចយើងបានដឹងហើយថា ប្រទេសចិនតែងតែប្រកាសយ៉ាងដាច់ខាតថា កោះតៃវ៉ាន់គឺជាផ្នែកមួយនៃដែនដីរបស់ចិន ដោយដែនកោះមួយនេះគ្មានសិទ្ធិទទួលបានការទទួលស្គាល់ការទូតពីប្រទេសណានោះឡើយ។ ដូច្នេះហើយ ទង្វើរបស់ប្រទេសលីទុយអានីចំពោះការអនុញ្ញាតឲ្យតៃវ៉ាន់បើកការិយាល័យតំណាងនៅលើទឹកដីរបស់ខ្លួន និងប្រើឈ្មោះតៃវ៉ាន់ចំៗយ៉ាងដូច្នេះ បើចិនមិនធ្វើការឆ្លើយតបខ្លាំងៗទើបជារឿងចម្លែក។ ជាក់ស្ដែង ប្រទេសចិន បានដកឯកអគ្គរដ្ឋទូតរបស់ខ្លួនប្រចាំប្រទេសលីទុយអានីមកវិញ ហើយក៏បានបណ្ដេញឯកអគ្គរដ្ឋទូតលីទុយអានីចេញពីទីក្រុងប៉េកាំងផងដែរ។
អត្ថបទគួរអាន
ជុំវិញនឹងជម្លោះរវាងចិន និងលីទុយអានីនេះដែរ រដ្ឋមន្ត្រីការបរទេសអាមេរិក លោក Antony Blinken បាននិយាយនៅក្នុងកិច្ចប្រជុំមួយនៅក្នុងទីក្រុងវ៉ាស៊ិនតោន ជាមួយនឹងសមភាគីរបស់ខ្លួន គឺប្រទេសអាល្លឺម៉ង់នៅសប្ដាហ៍យ៉ាងដូច្នេះថា «យើងមានការព្រួយបារម្ភមែនទែន អំពីការប៉ុនប៉ងរបស់រដ្ឋាភិបាលចិនក្នុងការសម្លុតបំភិតបំភ័យប្រទេសលីទុយអានី ដែលជាប្រទេសមានប្រជាជនតិជាង៣លាននាក់ប៉ុណ្ណោះ។»
លោក Blinken បន្ថែមថា ប្រទេសចិនបាននិងកំពុងជំរុញក្រុមហ៊ុនអឺរ៉ុប និងអាមេរិកឲ្យបញ្ឈប់ការផលិតផលិតផលជាមួយនឹងសមាសធាតុដែលផលិតនៅក្នុងប្រទេសលីទុយអានី បើមិនដូច្នេះ នឹងត្រូវបាត់បង់សិទ្ធិនាំចូលទៅកាន់ទីផ្សារចិន។ លោកបន្ថែមថា ប្រទេសទាំងអស់ រួមទាំងលីទុយអានី គួរតែអាចកំណត់គោលនយោបាយការបរទេសរបស់ខ្លួន ដោយមិនមានការបង្ខិតបង្ខំនោះទេ។
រដ្ឋមន្ត្រីក្រសួងការបរទេសអាមេរិករូបនេះ ក៏បានបញ្ជាក់ទៀតថា អាមេរិក នឹងធ្វើការជាមួយនឹងសម្ព័ន្ធមិត្តរបស់ខ្លួន ដើម្បីធ្វើពិពិធកម្មខ្សែចង្វាក់ផ្គត់ផ្គង់ និងប្រឆាំងទៅនឹងទម្រង់នៃការគំរាមកំហែងសេដ្ឋកិច្ច។
រដ្ឋមន្ត្រីការប្រទេសអាល្លឺម៉ង់ លោកស្រី អាណាលីណា បៀរប័ក (Annalena Baerbock) បាននិយាយដែរថា អាល្លឺម៉ង់ក្នុងនាមជាប្រជាជាតិអឺរ៉ុប គឺឈរក្នុងស្មារតីសាមគ្គីភាពនៅខាងប្រទេសលីទុយអានី។
ជុំវិញនឹងការលើកឡើងរបស់រដ្ឋមន្ត្រីការប្រទេសអាមេរិក និងអាល្លឺម៉ង់នេះ គេមិនទាន់ឃើញមានការឆ្លើយតបណាមួយពីភាគីចិននៅឡើយទេគិតត្រឹមថ្ងៃពុធទី៦មករានេះ។
សូមបញ្ជាក់ថា មន្ត្រីពាណិជ្ជកម្មកំពូលរបស់សហភាពអឺរ៉ុបបាននិយាយកាលពីខែមុនថា អឺរ៉ុបនឹងតតាំងចំពោះវិធានការបង្ខិតបង្ខំរបស់ចិន ដែលដាក់លើប្រទេសលីទុយអានី ដែលជារដ្ឋសមាជិករបស់ខ្លួន។ មន្ត្រីជាន់ខ្ពស់សហភាពអឺរ៉ុប បាននិយាយទៀតថាប្រសិនបើចាំបាច់ អឺរ៉ុប នឹងលើកយកបញ្ហានេះទៅអង្គការពាណិជ្ជកម្មពិភពលោកផងដែរ៕
None
