ប្រធានាធិបតីអាម៉េរិក លោក ដូណាល់ ត្រាំ បានកំណត់ពន្ធបដិការថ្មីជាផ្លូវការលើប្រទេសជាដៃគូពាណិជ្ជកម្មចំនួន១៤ រួមទាំងជប៉ុន កូរ៉េខាងត្បូង និងកម្ពុជា ផងដែរ ប៉ុន្ដែមិនទាន់មានឈ្មោះសហភាពអឺរ៉ុបនៅឡើយទេ។ ទាក់ទិននឹងបញ្ហានេះ ប្រភពច្បាស់ការចេញពីសហភាពអឺរ៉ុប បានទម្លាយឱ្យដឹងថា សហភាពអឺរ៉ុប មិនទាន់ទទួលបានលិខិតផ្លូវការពីសហរដ្ឋអាម៉េរិក នៅឡើយទេ ទាក់ទិនការដំឡើងពន្ធគយ ហើយមូលហេតុ គឺដោយសារសហភាពអឺរ៉ុប កំពុងចរចាយ៉ាងសកម្មជាមួយសហរដ្ឋអាម៉េរិក ដោយសង្ឃឹមថានឹងអាចឈានដល់កិច្ចព្រមព្រៀងឱ្យបានមុនថ្ងៃទី៩ ខែកក្កដា ដោយសហភាពអឺរ៉ុប សង្ឃឹមថា ខ្លួននឹងទទួលបានការលើកលែងមួយផ្នែកពីពន្ធគយបដិការថ្មី១០% របស់សហរដ្ឋអាម៉េរិក។
ទន្ទឹមនេះ លោក ដូណាល់ ត្រាំ បានចាប់ផ្ដើមចេញលិខិតជូនដំណឹងជាផ្លូវការដល់ប្រទេសជាដៃគូពាណិជ្ជកម្មចំនួន១៤ អំពីការកំណត់ពន្ធបដិការថ្មីលើទំនិញដែលប្រទេសទាំងនោះនាំចូលទៅកាន់សហរដ្ឋអាម៉េរិក ដែលពន្ធគយថ្មីនេះនឹងចូលជាធរមានចាប់ពីថ្ងៃទី១ ខែសីហា តទៅ។ លោក ដូណាល់ ត្រាំ បានសម្រេចកំណត់ពន្ធគយថ្មីជាផ្លូវការលើប្រទេសចំនួន១៤ ក្នុងនោះមីយ៉ាន់ម៉ា និងឡាវរងគំនាបពន្ធ៤០%, កម្ពុជា និងថៃ៣៦%, បង់ក្លាដែស៣៥%, ឥណ្ឌូនេស៊ី៣២%, អាហ្វ្រិកខាងត្បូង៣០%, ម៉ាឡេស៊ី២៥%, កូរ៉េខាងត្បូង២៥% និងជប៉ុន២៥%។
ដោយឡែក សម្រាប់ប្រទេសវៀតណាម ដ្បិតមិនមានក្នុងបញ្ជីថ្មីនេះយ៉ាងណាក្ដី ក៏កាលពីពេលថ្មីៗនេះ សហរដ្ឋអាម៉េរិក បានយល់ព្រមបញ្ចុះពន្ធលើទំនិញវៀតណាមពី៤៦% មកត្រឹម២០% ប៉ុណ្ណោះ ដែលជាជោគជ័យដ៏ធំមួយសម្រាប់ប្រទេសក្បែរខាងកម្ពុជា មួយនេះ៕
ដោយ: តែម សុខុម
