ស្របពេលដែលអ៊ីរ៉ង់ នៅតែបន្តបិទច្រកសមុទ្រ Hormuz សហរដ្ឋអាម៉េរិកបានដាក់ចេញនូវយុទ្ធសាស្ត្រហិរញ្ញវត្ថុថ្មី ដោយបង្កើនទំហំធានារ៉ាប់រងដល់៤០ពាន់លានដុល្លារ ដើម្បីលើកទឹកចិត្តឱ្យក្រុមហ៊ុនដឹកជញ្ជូនហ៊ានបញ្ជូននាវាឆ្លងកាត់ផ្លូវទឹកដ៏សំខាន់នេះឡើងវិញ។ កម្មវិធីនេះ ដើរតួជាខ្នងបង្អែកការពារហានិភ័យដល់ក្រុមហ៊ុនធានារ៉ាប់រងនានា ដែលហ៊ានចេញមុខធានាលើសុវត្ថិភាពនាវាក្នុងតំបន់ដែលកំពុងមានជម្លោះ។
គោលដៅចម្បងនៃយុទ្ធនាការនេះ គឺដើម្បីបញ្ឈប់វិបត្តិថាមពលសកល។ គួររំលឹកថា ច្រកសមុទ្រ Hormuz គឺជាសរសៃឈាមសេដ្ឋកិច្ចដ៏សំខាន់ ដោយផ្ទុកនូវការដឹកជញ្ជូនប្រេងឆៅប្រមាណ២០% និងឧស្ម័នធម្មជាតិរាវ (LNG) ដល់ទៅ៣០% នៃតម្រូវការពិភពលោក។ ការបិទច្រកនេះដោយអ៊ីរ៉ង់ដើម្បីជាការសងសឹកចំពោះការវាយប្រហារពីសំណាក់អាម៉េរិក និងអ៊ីស្រាអែលនេះ បានធ្វើឱ្យតម្លៃថាមពលហក់ឡើងខ្ពស់ និងបង្កក្ដីបារម្ភដល់ប្រទេសប្រើប្រាស់ប្រេងធំៗដូចជាឥណ្ឌាជាដើម។
ទោះបីជាមានការគាំទ្រផ្នែកហិរញ្ញវត្ថុយ៉ាងក្រាស់ក្រែលក៏ដោយ ក៏ក្រុមហ៊ុនដឹកជញ្ជូនជាច្រើននៅតែបង្ហាញភាពរារែក។ កង្វល់ដ៏ចម្បងមិនមែនត្រឹមតែរឿងលុយកាក់នោះទេ ប៉ុន្តែគឺសុវត្ថិភាពនាវិក និងនាវា។ នាវានៅតែប្រឈមមុខនឹងការវាយប្រហារពីដ្រូនអត្តឃាត មីស៊ីល និងមីនសមុទ្ររបស់អ៊ីរ៉ង់ ខណៈដែលការធានាលើការអមការពារដោយកងទ័ពជើងទឹកអាមេរិកនៅមិនទាន់មានភាពច្បាស់លាស់នៅឡើយ។
ជារួមបើទោះបីជាសហរដ្ឋអាម៉េរិកខំប្រឹងពង្រឹងខែលហិរញ្ញវត្ថុយ៉ាងណាក៏ដោយ ក៏វានៅមិនទាន់គ្រប់គ្រាន់ ដើម្បីឱ្យចរាចរណ៍នាវាត្រឡប់មកសភាពដើមវិញទាំងស្រុងនោះទេ លុះត្រាតែមានការធានាផ្នែកសន្តិសុខយោធាជាក់ស្ដែងនៅក្នុងតំបន់៕
ដោយ: តែម សុខុម
