សមាជិកសភាអាមេរិកស្នើបង្កើតច្បាប់កែប្រែឈ្មោះការិយាល័យតំណាងកោះតៃវ៉ាន់នៅអាមេរិក

បច្ចុប្បន្នការិយាល័យតំណាងកោះតៃវ៉ាន់នៅអាមរិក មានឈ្មោះថា ការិយាល័យតំណាងសេដ្ឋកិច្ច និងវប្បធម៌ក្រុងតៃប៉ិ ដែលជាឈ្មោះរបស់ទីក្រុងនៃកោះមួយនេះ។ ការស្នើចង់ផ្លាស់ប្តូរដូចនេះ រិតតែបង្ហាញពីចេតនារបស់អាមេរិក ពីការចង់បែងចែកឲ្យដាច់រវាង ចិន និងតៃវ៉ាន់ ហើយក៏ទំនងជាអាចបង្ហាញដោយប្រយោលបានថា តៃវ៉ាន់បច្ចុប្បន្នមិនស្ថិតក្រោមការគ្រប់គ្រងរបស់ចិនឡើយ ខណៈចិនតែងតែអះអាងគ្រប់ពេលវេលាថា កោះតៃវ៉ាន់ជាផ្នែកមួយនៃដីអាណាចក្រគ្រប់គ្រងរបស់ខ្លួន។

ក្រុមសមាជិកសភាអាមេរិក ចង់ប្រែក្លាយ ចង់បង្កើតជាច្បាប់ ពីព្រោះគេយល់ឃើញថា ការធ្វើដូចនេះ នឹងអនុញ្ញាតឲ្យប្រទេសតូចៗចាត់វិធានការស្រដៀងគ្នានេះ ដើម្បីបង្កើនទំនាក់ទំនងជាមួយតៃវ៉ាន់ដែរ។

យ៉ាងណាក៏ដោយ សកម្មភាពនេះនឹងបង្កើតភាពប្រេះឆាកាន់តែធំឡើងថែមទៀត នៅក្នុងទំនាក់ទំនងរវាងសហរដ្ឋអាមេរិក និងចិន ដែលកំពុងស្ថិតក្នុងស្ថានភាពអាក្រក់បំផុតរួចទៅហើយ ក្នុងប៉ុន្មានទសវត្សរ៍ចុងក្រោយមកនេះ ខណៈដែលទីក្រុងវ៉ាស៊ីនតោនព្យាយាមរុញច្រាន និងប្រឆាំងទៅនឹងអ្វីដែលខ្លួនមើលឃើញថា ជាការគំរាមកំហែងផ្នែកសេដ្ឋកិច្ច និងយោធាដែលកំពុងកើនឡើងជារៀងរាល់ថ្ងៃពីសំណាកទីក្រុងប៉េកាំង។

ជុំវិញការស្នើប្តូរឈ្មោះការិយាល័យតំណាងតៃវ៉ាន់នេះ សេតវិមាន និងក្រសួងការបរទេសសហរដ្ឋអាមេរិក ក៏ដូចជាស្ថានទូតចិនប្រចាំនៅទីក្រុងវ៉ាស៊ីនតោន មិនបានឆ្លើយតបភ្លាមៗចំពោះសំណើសុំការអត្ថាធិប្បាយពីអ្នកសារព័ត៌មានឡើយ។

គួរជម្រាបថា សហរដ្ឋអាមេរិកដូចទៅនឹងប្រទេសដទៃទៀតដែរ គ្មានឡើយទំនាក់ទំនងការទូតផ្លូវការជាមួយកោះតៃវ៉ាន់ ប៉ុន្តែដូចបានដឹងស្រាប់ហើយថាអាមេរិកជាខ្នងបង្អែកដ៏រឹងមាំរបស់ក្រុងតៃប៉ិ។

ប្រទេសចិនជារឿយៗតែងតែបង្ហើរសារនយោបាយឡកឡឺយទៅកាន់អាមេរិក និងប្រទេសលោកខាងលិចមួយចំនួនថា សូមចៀសវាងការបញ្ជូនសារគាំទ្រខុស ដែលជំរុញឲ្យកោះតៃវ៉ាន់ប្រកាសឯករាជ្យឲ្យសោះ។

សូមកត់សម្គាល់ថា ថ្មីៗចិន និង ប្រទេសលីទុយអានី ដែលជាប្រទេសតូចមួយក្នុងទ្វីបអឺរ៉ុប ប្រទេសនេះទើបបានប៉ះទង្គិចគ្នាទាំងផ្នែកការទូត និងសេដ្ឋកិច្ចផងដែរជាមួយក្រុងប៉េកាំង ក្រោយពេលប្រទេសលីទុយអានី បានអនុញ្ញាតឲ្យកោះតៃវ៉ាន់ បើកការិយាល័យតំណាងនៅក្នុងប្រទេសរបស់ខ្លួន ក្រោមឈ្មោះថា «តៃវ៉ាន់» ជាជាងការប្រើឈ្មោះថា «កោះតៃវ៉ាន់នៃប្រទេសចិន»។ ហេតុនេះហើយទើបមានការព្រួយបារម្ភថា ប្រសិនបើព្រឹទ្ធសភា និងរដ្ឋសភាអាមេរិកធ្វើការត្រួតពិនិត្យលើលទ្ធភាពបង្កើតច្បាប់មួយ ដែលនឹងតម្រូវឱ្យសហរដ្ឋអាមេរិកអាចប្តូរឈ្មោះការិយាល័យតំណាងកោះតៃវ៉ាន់នៅក្នុងទីក្រុងវ៉ាស៊ីនតោន ពីឈ្មោះដើមរបស់វា ពិតប្រាកដមែននោះ ភាពប្រេះឆារវាងចិន និងអាមេរិកអាចនឹងមានកាន់តែខ្លាំងបំផុតដែលពិបាកនឹងប៉ាន់ស្មានបានណាស់៕