សមាគមអ្នកផលិតសូឡាអាម៉េរិកស្នើឱ្យរដ្ឋាភិបាលអាម៉េរិកដំឡើងពន្ធលើសូឡា ខណៈការនាំចូលសូឡាពី៤ប្រទេសក្នុងអាស៊ានរូមទាំងកម្ពុជាកើនឡើងយ៉ាងគំហុក

ការស្នើនេះ ធ្វើឡើងស្របពេលប្រទេសទាំង៤នេះ កំពុងប្រឈមការស៊ើបអង្កេតក្នុងករណីចោទប្រកាន់ថា ប្រទេសទាំងនេះអនុវត្តការធ្វើពាណិជ្ជកម្មដោយមិនត្រឹមត្រូវនៅក្នុងវិស័យសូឡាដែលមានទំហំច្រើនពាន់លានដុល្លារនេះ។

សូមបញ្ជាក់ថា កាលពីខែឧសភា ដើមឆ្នាំ២០២៤ នេះ ក្រសួងពាណិជ្ជកម្មអាម៉េរិកបានចាប់ផ្តើមបើកការស៊ើបអង្កេតលើផលិតផលបន្ទះសូឡាផលិតនៅប្រទេសវៀតណាម ថៃ ម៉ាឡេស៊ី និងកម្ពុជា។ បណ្ដាក្រុមហ៊ុនផលិតបន្ទះសូឡាអាម៉េរិក បានចោទប្រកាន់ថា ផលិតផលបន្ទះសូឡាដែលនាំចូលពីប្រទេសទាំង៤នេះត្រូវបានលក់នៅសហរដ្ឋអាម៉េរិកក្នុងតម្លៃទាបខ្លាំងដោយសារបន្ទះសូឡាដែលផលិតនៅប្រទេសទាំងនេះ ទទួលបានការឧបត្ថម្ភធនពីប្រទេសចិន។

យោងតាមទិន្នន័យពាណិជ្ជកម្មអាម៉េរិកបានបង្ហាញថា ប្រទេសទាំង៤នេះមានចំណែកគ្រប់ដណ្ដប់រហូតដល់ទៅជិត៨០%ឯណោះនៃបន្ទះសូឡាដែលនាំចូលទៅកាន់សហរដ្ឋអាម៉េរិក ទាំងអស់កាលពីឆ្នាំមុន៕

ដោយ: តែម សុខុម