លោកស្រី Sarah Bianchi អនុតំណាងពាណិជ្ជកម្មរបស់សហរដ្ឋអាមេរិកប្រចាំតំបន់អាស៊ីបានកត់សម្គាល់ថា ក្នុងរយៈពេលប៉ុន្មានឆ្នាំមកនេះ ចិនមិនធ្លាប់បំពេញបានគ្រប់ជ្រុងជ្រោយ តាមការសន្យាស្របតាមកិច្ចព្រមព្រៀងអាមេរិក-ចិននោះទេ។ យ៉ាងណាមិញ លោកស្រី Sarah និយាយថា អាមេរិកនឹងបន្តយកបញ្ហានេះទៅជជែកជាមួយភាគីចិន ទោះបីក្រុងប៉េកាំងហាក់ចង់គេចវេសមិនគោរពតាមកិច្ចព្រមព្រៀងក៏ដោយ។
ជាកិច្ចព្រមព្រៀងដែលបន្សល់ទុកពីជំនាន់អតីតប្រធានាធិបតីអាមេរិក លោកដូណាល់ ត្រាំ ចុះហត្ថលេខាកាលពីខែមករាឆ្នាំ២០២០ ចិនមានតួនាទីបង្កើនការបញ្ជាទិញទំនិញពីរោងចក្រ ផលិតផលកសិកម្ម និងថាមពលពីសហរដ្ឋអាមេរិក ឲ្យបានក្នុងតម្លៃ ២០០ពាន់លានដុល្លារលើសពីការបញ្ជាទិញក្នុងឆ្នាំ២០១៧ សម្រាប់រយៈពេល២ឆ្នាំ ពោលគឺត្រូវអនុវត្តពីឆ្នាំ២០២០ ដល់២០២១។
ប៉ុន្តែគិតត្រឹមខែវិច្ឆិកាឆ្នាំ២០២១ទៅហើយ ប្រទេសចិនសំរេចបានតែប្រហែល ៦០%នៃគោលដៅប៉ុណ្ណោះ។ នេះបើយោងតាមទិន្នន័យពាណិជ្ជកម្មរបស់អាមេរិក។ មែនទែនទៅកិច្ចព្រមព្រៀងនេះ ត្រូវបានមហាអំណាចទាំងពីរព្រមព្រៀងគ្នាបង្កើតឡើង ដើម្បីដោះស្រាយភាពតានតឹងក្នុងសង្គ្រាមពាណិជ្ជកម្ម ដែលអូសបន្លាយអស់ពេលជិត៣ឆ្នាំរវាងប្រទេសដែលមានសេដ្ឋកិច្ចធំជាងគេបំផុតទាំងពីរនេះ។
អត្ថបទគួរអាន
នៅចំពោះមុខបញ្ហាដ៏រ៉ាំរ៉ៃនេះ ប្រធានាធិបតីអាមេរិកលោក ចូ បៃឌិន ធ្លាប់បានអះអាងហើយថា ក្រុងវ៉ាស៊ីនតោននឹងមិនដករនាំងពន្ធគយពីប្រទេសចិនលឿនពេកឡើយ ពិសេសគឺនៅក្រោយពេលដែលចិន មិនបានធ្វើតាមអ្វីដែលខ្លួនសន្យាថែមទៀត។ ក្រុមហ៊ុនបានស្នើទៅរដ្ឋបាលក្រុងវ៉ាស៊ីនតោន បច្ចុប្បន្ន ឲ្យទម្លាក់ចោលវិញនូវអត្រាពន្ធគយចំនួន ២៥% ដែលបានដាក់លើទំនិញរបស់ប្រទេសចិន កាលពីជំនាន់លោកដូណាល់ត្រាំនៅជាប្រធានាធិបតី។
គួរកត់សម្គាល់ថា ទោះបីជារនាំងពន្ធគយក្នុងការដោះដូរទំនិញរវាងមហាអំណាចទាំងពីរមិនទាន់ត្រូវបានដកចេញវិញក្តី ប៉ុន្តែទំហំពាណិជ្ជកម្មរវាងភាគីទាំងពីរបន្តកើនឡើងឥតឈប់ឈរ។ ជាក់ស្ដែង នៅពេញមួយឆ្នាំ២០២១ ទំហំពាណិជ្ជកម្មរវាងអាមេរិក និងចិនមានទឹកប្រាក់សរុបជាង ៧០០ពាន់លានដុល្លារអាមេរិក កើនឡើងជិត៣០% បើធៀបនឹងឆ្នាំ ២០២០។ នេះបើតាមរបាយការណ៍ដែលបង្ហាញដោយអាជ្ញាធរគយរបស់ចិន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
