លោក Abednedju ប្រធានក្រុមហ៊ុនផលិតដែកថែប GRP របស់ឥណ្ឌូនេស៊ី បាននិយាយនៅក្នុងបទសម្ភាសន៍ជាមួយសារព័ត៌មានជប៉ុន Nikkei ថ្មីៗនេះថា ក្រុមហ៊ុនលោករំពឹងថា នឹងមានតម្រូវការដែកកាន់តែច្រើន ពីការផ្លាស់ប្តូរទីតាំងរដ្ឋធានីរបស់ប្រទេសឥណ្ឌូនេស៊ីទៅកាន់ទីក្រុង Nusantara ហើយក្រុមហ៊ុននេះបានសម្លឹងឃើញ ឱកាសពីការសាងសង់ហេដ្ឋារចនាសម្ព័ន្ធជាច្រើននៅទីនោះផងដែរ។
ទោះបីជាក្រុមហ៊ុន GRP មិនទាន់ទទួលបានកិច្ចសន្យាណាមួយសម្រាប់គម្រោងនេះក៏ដោយ ប៉ុន្តែប្រធានក្រុមហ៊ុននេះ រំពឹងថាការផ្លាស់ប្តូររដ្ឋធានី Jakarta ទៅកាន់ទីក្រុង Nusantara នេះនឹងរួមចំណែកដល់ការកើនឡើងនៃតម្រូវការក្នុងស្រុកទាំងមូល។
ក្រុមហ៊ុន GRP ដែលក្លាយជាក្រុមហ៊ុនសាធារណៈនៅឆ្នាំ២០១៩នោះ ភាគច្រើនផលិតដែកសម្រាប់អគារ និងហេដ្ឋារចនាសម្ព័ន្ធ ហើយដើម្បីឆ្លើយតបនឹងតម្រូវការដែលចេះតែកើនឡើងនៅក្នុងវិស័យសំណង់។ ក្រុមហ៊ុននេះ គ្រោងនឹងបង្កើនសមត្ថភាពផលិតដែករបស់ខ្លួនជិត ៤០% គឺឡើងដល់ ៣ លានតោននៅដំណាច់ឆ្នាំក្រោយ នៅរោងចក្រតែមួយគត់របស់ខ្លួននៅទីក្រុង Cikarang ចម្ងាយប្រហែល ៤០ គីឡូម៉ែត្រនៅភាគខាងកើតនៃទីក្រុងហ្សាកាតា។
សូមរម្លឹកថា រដ្ឋាភិបាលឥណ្ឌូនេស៊ីគ្រោងនឹងផ្លាស់ប្តូរទីតាំងរដ្ឋធានីនៅឆ្នាំ២០២៤ ព្រោះរដ្ឋាភិបាលមានបំណងលើកកម្ពស់កំណើនសេដ្ឋកិច្ច។ ក្រុមមន្ត្រីក៏បានមើលឃើញការផ្លាស់ប្តូរនេះថា ជាការកាត់បន្ថយការកកស្ទះនៅក្នុងរដ្ឋធានីហ្សាកាតា ដែលជាតំបន់តែងតែលិចទឹក និងមានប្រជាជនប្រមាណ ១០ លាននាក់រស់នៅ និងរងការបំពុលបរិស្ថានយ៉ាងខ្លាំងផងដែរ។
ទីក្រុង Nusantara នេះត្រូវគេនឹកស្រមៃឃើញថាជា«ទីក្រុងសកលលោកពណ៌បៃតង និងឆ្លាតវៃស្រស់ស្អាតបំផុត» ដែលនឹងធ្វើការអភិវឌ្ឍជាដំណាក់កាលៗបន្តរហូតដល់ឆ្នាំ២០៤៥ ហើយប្រទេសឥណ្ឌូនេស៊ីកាលពីឆ្នាំមុនបានសន្យាថា នឹងសម្រេចបាន គោលដៅគ្មានការបំភាយឧស្ម័នទាំងស្រុងនៅត្រឹមឆ្នាំ២០៦០។
អត្ថបទគួរអាន
ការសាងសង់រដ្ឋធានីថ្មីនេះ ត្រូវបានគេប៉ាន់ប្រមាណថា នឹងត្រូវចំណាយទុនវិនិយោគប្រមាណ ៣៥ពាន់លានដុល្លារអាមេរិក ហើយរដ្ឋាភិបាលឥណ្ឌូនេស៊ី ក៏បានបើកទូលាយឲ្យប្រទេសនានា ក៏ដូចជាវិស័យឯកជន អាចចូលរួម ដើម្បីវិនិយោគ អភិវឌ្ឍន៍រដ្ឋធានីនេះផងដែរ ដោយកន្លងមក ប្រទេសអារ៉ាប់រួម ក៏បានសន្យានឹងចូលរួមវិនិយោគ២០ពាន់លានដុល្លារ លើការអភិវឌ្ឍរដ្ឋធានីថ្មីនេះដែរ។
សមាគមឧស្សាហកម្មដែកថែប និងដែកនៅឥណ្ឌូណេស៊ីបានប៉ាន់ប្រមាណថា តម្រូវការដែកថែបនៅក្នុងប្រទេសដែលមានសេដ្ឋកិច្ចដ៏ធំបំផុតនៅតំបន់អាស៊ីអាគ្នេយ៍មួយនេះ នឹងកើនឡើង ៧,៦% នៅក្នុងសារពើពន្ធ២០២២ ធៀបនឹងឆ្នាំមុន ហើយក្រុមហ៊ុន GRP រំពឹងថា ការអភិវឌ្ឍទីក្រុង Nusantara នេះនឹងមានឥទ្ធិពលយ៉ាងខ្លាំងក្លា។
ប្រសិនបើគិតនៅទូទាំងពិភពលោកវិញ គឺថាស្ថានភាពដែកមិនសូវជាមានសន្ទុះប៉ុន្មាននោះទេ ហើយបើតាមសមាគមដែកថែបពិភពលោកបានឱ្យដឹងថា ការផលិតដែក ក្នុងខែឧសភាបានធ្លាក់ចុះ ៣,៥% ធៀបនឹងខែដូចគ្នាកាលពីឆ្នាំមុនដែលជាការធ្លាក់ចុះជាប់គ្នារយៈពេល ១០ ។ ការធ្លាក់ចុះនេះគឺដោយសារការរាតត្បាតជំងឺខូវីដ១៩ ការខ្វះខាតបន្ទះឈីប និងការលុកលុយរបស់រុស្ស៊ីនៅអ៊ុយក្រែន។
ក្រុមហ៊ុន GRP បានធ្វើការលក់ផលិតផលដែករបស់ខ្លួនស្ទើរតែអស់នៅក្នុងប្រទេសដែលមានសេដ្ឋកិច្ចរីកចម្រើនដ៏ឆាប់រហ័យមួយនេះ ខណៈដែលប្រទេសនេះមានចំនួនប្រជាជនសរុបជាង ២៧០ លាននាក់ជាចំនួនមួយច្រើនជាងគេបំផុតទី៤នៅក្នុងពិភពលោក៕
អត្ថបទ៖ សុខ ជា
