ការណ៍នេះ សមាគមបានអំពាវនាវឱ្យអ្នកចិញ្ចឹមមាន់ទាំងអស់គួរប្រមូលផ្តុំគ្នាសិក្សាពីតម្រូវការទីផ្សារឱ្យបានច្បាស់លាស់មុននឹងដាក់ចិញ្ចឹម ដើម្បីទប់ស្កាត់បញ្ហាចាល់ទីផ្សារដែលធ្វើមានការខាតបង់ធ្ងន់ធ្ងរ។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាបានគូសបញ្ជាក់ថា តម្លៃទីផ្សារសាច់សត្វជារួមនៅកម្ពុជាហាក់ពុំមានការប្រែប្រួលគួរឱ្យកត់សម្គាល់នោះទេ បើទោះបីរដូវកាលសែនក្បាលទឹកនៅឆ្នាំនេះខិតជិតចូលមកដល់ក៏ដោយ ពោលគឺជ្រូករស់បច្ចុប្បន្នអាចលក់បានក្នុងរង្វង់ប្រមាណ១១,០០០ រៀលក្នុងមួយគីឡូក្រាម។ ដោយឡែកទីផ្សារមាន់រស់ប្រភេទបីសាសន៍បានធ្លាក់ថ្លៃគួរឱ្យកត់សម្គាល់នៅ៣ទៅ៤ខែចុងក្រោយនេះ ដោយលក់បានក្នុងរង្វង់ជាង៥,០០០រៀលក្នុងមួយគីឡូក្រាមប៉ុណ្ណោះ ក្រោយការផ្គត់ផ្គង់មានច្រើនលើសពីតម្រូវការ។
បើតាមការអះអាងរបស់ប្រធានសមាគមរូបនេះ តម្លៃជ្រូករស់បច្ចុប្បន្នអាចផ្តល់ចំណូលឱ្យអ្នកចិញ្ចឹមទប់ទល់ការចំណាយបាន ប៉ុន្តែអ្នកចិញ្ចឹមមាន់អាចប្រឈមការខាតបង់។ តាមរយៈបញ្ហានេះលោក ស្រ៊ុន ពៅ បានណែនាំដល់អ្នកចិញ្ចឹមមាន់ទាំងអស់ត្រូវចេះប្រមូលផ្តុំសាមគ្គីគ្នាសិក្សាពីទីផ្សារមុននឹងដាក់ចិញ្ចឹម ដើម្បីចៀសវាងចិញ្ចឹមច្រើនលើសតម្រូវការទីផ្សារ ដែលធ្វើឱ្យមានការខាតបង់ និងប៉ះពាល់ដល់ចរន្តសេដ្ឋកិច្ច។
ជាមួយគ្នានេះលោក សុក សីហា ម្ចាស់កសិដ្ឋានចិញ្ចឹមមាន់សាច់មួយកន្លែង និងជាអនុប្រធានគណៈកម្មការផ្នែកបក្សី នៃសមាគមអ្នកចិញ្ចឹមសត្វកម្ពុជាបានឱ្យដឹងថា តម្លៃមាន់សាច់នៅកសិដ្ឋានអាចលក់បានត្រឹមតែ៤,៤០០រៀលក្នុងមួយគីឡូក្រាមប៉ុណ្ណោះ ខណៈកាលពីមុនអាចលក់បានចន្លោះពី៥,៣០០ទៅ ៥,៥០០រៀលក្នុងមួយគីឡូក្រាម។ ការធ្លាក់ចុះយ៉ាងគំហុកនេះ គឺដោយសារតម្រូវការមាន់សាច់លើទីផ្សារធ្លាក់ចុះ ដោយសារពលរដ្ឋងាកទៅបរិភោគមាន់ស្រែ។ បើតាមម្ចាស់កសិដ្ឋានរូបនេះ ប្រសិនបើកសិករនៅតែបង្កើនការចិញ្ចឹមច្រើនជាងនេះ ដោយមិនសិក្សាពីទីផ្សារទេនោះ ទីផ្សារសាច់មាន់នៅក្នុងស្រុកនឹងឈានទៅដល់កម្រិតហានិភ័យខ្ពស់ ដែលអាចធ្វើឱ្យតម្លៃធ្លាក់ចុះកាន់តែខ្លាំង។
តាមការវាយតម្លៃរបស់សមាគមអ្នកចិញ្ចឹមសត្វកម្ពុជា បច្ចុប្បន្នកម្ពុជាមានតម្រូវការសាច់ជ្រូកប្រចាំថ្ងៃប្រមាណជាង៩,០០០ក្បាលក្នុងមួយថ្ងៃ ខណៈមាន់រស់មិនក្រោម២០,០០០ក្បាលក្នុងមួយថ្ងៃនោះទេ៕
