លោក សូរ៉ូស អាយុ ៩១ ឆ្នាំ ជាមហាសេដ្ឋីប្រាក់ពាន់លានដុល្លាររបស់អាមេរិក ដែលជំនាញផ្នែកសេវាហិរញ្ញវត្ថុដ៏ល្បីល្បាញឈ្មោះមួយរូប បានចាត់ទុកសង្រ្គាមនៅអ៊ុយក្រែនថាជាផ្នែកមួយនៃការតស៊ូទូលំទូលាយរវាងសង្គមបើកចំហ និងសង្គមបិទបាំង ដូចជាប្រទេសចិននិងរុស្ស៊ីដែលកំពុងតែមានឥទ្ធពលកើនឡើងជាដើម។
មហាសេដ្ឋីដែលមានដើមកំណើតហុងគ្រី និងមានសញ្ជាតិអាមេរិកាំងរូបនេះ ត្រូវបានគេស្គាល់ថា គឺជាអ្នករិះគន់ខ្លាំងៗមែនទែន ទៅលើអតីតប្រធានាធិបតីអាមេរិកលោកដូណាល់ត្រាំ និង លោកប្រធានាធិបតីចិន ហ្ស៊ីជីនពីង។
លោក Soros បានប្រាប់វេទិកាសេដ្ឋកិច្ចពិភពលោកនៅទីក្រុងដាវ៉ូស ប្រទេសស្វីសថា "ការលុកលុយរបស់រុស្ស៊ីលើអ៊ុយក្រែននេះ អាចជាការចាប់ផ្តើមនៃសង្គ្រាមលោកលើកទី៣រួចទៅហើយ ហើយអរិយធម៌របស់បស្ចិមលោកប្រហែលជាមិនអាចរស់រានបានទៀតឡើយ"។ នេះបើយោងតាមអត្ថបទនៃសុន្ទរកថារបស់លោក សូរ៉ូស ដែលការិយាល័យរបស់លោកទើបបានចេញផ្សាយថ្មីៗនេះ។
មហសេដ្ឋីហិរញ្ញវត្ថុរូបនេះបានបន្ថែមថា មធ្យោបាយដ៏ល្អបំផុត និងប្រហែលជាមានតែមួយគត់ដើម្បីរក្សាអរិយធម៌របស់បស្ចិមលោកគឺមានតែកម្ចាត់លោក ពូទីន ឱ្យបានឆាប់តាមដែលអាចធ្វើទៅបានតែប៉ុណ្ណោះ ព្រោះនោះគឺជាបន្ទាត់បិទគូថ សម្រាប់កាបញ្ចប់សង្គ្រាម។
អត្ថបទគួរអាន
លោក Soros បាននិយាយទៀតថា លោក Putin បាននិយាយថា សង្គ្រាមនៅអ៊ុយក្រែនគឺជាប្រតិបត្តិការពិសេសដែលកំពុងដំណើរការតាមផែនការ និងសម្រេចបានតាមគោលបំណងទាំងអស់របស់វិមានក្រឹមឡាំង ប៉ុន្តែពេលនេះលោក ពូទីន ជឿថា ការលុកលុយនេះ គឺជាកំហុសមួយ ហើយឥឡូវនេះកំពុងត្រៀមចរចាសម្រាប់បទឈប់បាញ់គ្នាហើយ។
លោក សូរ៉ូស បានបន្ថែមទៀតថា ប៉ុន្ដែ បទឈប់បាញ់នោះ គឺមិនអាចសម្រេចបានទេព្រោះលោក ពូទីន ជាមនុស្សមិនអាចទុកចិត្តបានទៀតឡើយ ហើយនៅពេលលោក ពូទីន កាន់តែទន់ខ្សោយ គឺវាកាន់តែពីបាកប៉ាន់ស្មានពីការសម្រេចចិត្តរបស់គាត់។
លោក Soros បានសង្កត់ធ្ងន់ថា សហភាពអឺរ៉ុបត្រូវតែយល់ឱ្យច្បាស់ថា លោក ពូទីន អាចបិទឧស្ម័នធម្មជាតិរបស់រុស្ស៊ី ដែលបច្ចុប្បន្នបានផ្គត់ផ្គង់សម្រាប់តម្រូវការរបស់សហភាពអឺរ៉ុបប្រហែល ៤០% ហើយវាពិតជារឿងដ៏ឈឺចាប់មួយសម្រាប់ប្លុកនេះ។
ការឈ្លានពានរបស់រុស្ស៊ីនៅថ្ងៃទី២៤ ខែកុម្ភៈទៅលើអ៊ុយក្រែនបានសម្លាប់មនុស្សរាប់ពាន់នាក់និងធ្វើឱ្យមានជនភៀសសឹករាប់លាននាក់ ព្រមទាំងបង្កើនការភ័យខ្លាចចំពោះការប្រឈមមុខដាក់គ្នាដ៏ធ្ងន់ធ្ងរបំផុតរវាងរុស្ស៊ី និងសហរដ្ឋអាមេរិកចាប់តាំងពីវិបត្តិមីស៊ីលគុយបាឆ្នាំ១៩៦២មក។
លោក ពូទីន បាននិយាយថា សហរដ្ឋអាមេរិកកំពុងប្រើប្រាស់អ៊ុយក្រែនដើម្បីគំរាមកំហែងរុស្ស៊ីតាមរយៈការពង្រីកអង្គការណាតូ ដូច្នេះហើយទីក្រុងម៉ូស្គូត្រូវតែការពារប្រឆាំងនឹងការធ្វើទុក្ខបុកម្នេញចំពោះពលរដ្ឋដែលនិយាយភាសារុស្ស៊ី។ ប្រទេសអ៊ុយក្រែន និងសម្ព័ន្ធមិត្តបស្ចិមលោកបានច្រានចោលការចោទប្រកាន់ទាំងនេះ ដោយវាយបកវិញថា នេះគ្រាន់តែជាលេសគ្មានមូលដ្ឋានរបស់រុស្ស៊ីក្នុងចេតនាឈ្លានពានប្រទេសដែលមានអធិបតេយ្យមួយតែប៉ុណ្ណោះ។
នៅក្នុងបរិបទខាងលើនេះលោក សូរ៉ូស បានបញ្ជាក់ថា លោកមិនអាចទាយទុកជាមុនបានទេពីលទ្ធផលនៃសង្គ្រាមនេះ ប៉ុន្តែច្បាស់ណាស់ថា អ៊ុយក្រែនពិតជាមានឱកាសតទល់នឹងរុស្ស៊ី៕
អត្ថបទ៖ សុខ ជា
None
