ប្រទេសក្បែរខាងរបស់កម្ពុជា មួយនេះ បាននាំចូលទូរសព្ទ និងគ្រឿងបន្លាស់ក្នុងទំហំជាង៣ពាន់លានដុល្លារអាម៉េរិក ក្នុងត្រីមាសទី១ ដើមឆ្នាំ២០២៤ ដោយកើនឡើង២២,៤% បើធៀបនឹងឆ្នាំមុន ហើយអ្នកផ្គត់ផ្គង់កំពូលៗសម្រាប់ទីផ្សារវៀតណាម រួមមាន ចិន កូរ៉េខាងត្បូង និងហុងកុង។
ក្នុងនោះ ចិនដីគោក បានគ្របដណ្ដប់ច្រើនជាងគេរហូតដល់ទៅជាង២,៦ពាន់លានដុល្លារអាម៉េរិក ដែលកើនឡើងគួរឱ្យកត់សម្គាល់រហូតដល់២៥% បើធៀបនឹងរយៈពេលដូចគ្នាកាលពីឆ្នាំមុន ខណៈដែលកូរ៉េខាងត្បូង មានចំណែកគ្របដណ្ដប់ជាង១៣៤លានដុល្លារអាម៉េរិក ដោយធ្លាក់ចុះ២១% បើធៀបនឹងឆ្នាំមុន ចំណែកឯហុងកុង មានចំណែកគ្របដណ្ដប់ជាង២៥លានដុល្លារអាម៉េរិក ដោយកើនឡើង២៧៥%។
ទន្ទឹមនេះ អ្នកផ្គត់ផ្គង់ធំៗផ្សេងទៀតសម្រាប់ទីផ្សារវៀតណាម រួមមាន ប្រទេសឥណ្ឌា អង់គ្លេស តៃវ៉ាន់ សហរដ្ឋអាម៉េរិក និងជប៉ុន។
សូមបញ្ជាក់ថា ការលក់ទូរសព្ទស្មាតហ្វូននៅក្នុងប្រទេសវៀតណាម ពេញមួយឆ្នាំ២០២៤ នេះត្រូវបានព្យាករថា អាចនឹងឈានដល់ជាង២១លានគ្រឿង៕
ដោយ: តែម សុខុម
