អាជីវករលក់ទុរេនវៀតណាម ដែលត្រូវបានសម្ភាសដោយសារព័ត៌មាន VN Express បានឱ្យដឹងថា ការត្រួតពិនិត្យដ៏តឹងតែងរបស់គយចិន បានចំណាយពេលវេលាយូរ ហើយធ្វើឱ្យផ្លែឈើខូចគុណភាព នៅពេលដែលដឹកទៅដល់ទីផ្សារលក់បោះដុំនៅក្នុងប្រទេសចិន។
បញ្ហានេះ បានធ្វើឱ្យកសិករដាំផ្លែទុរេនរបស់វៀតណាម បានបង្ខំចិត្តលក់ទុរេនទម្លាក់តម្លៃប្រហែល ៣០% ពោលបច្ចុប្បន្នទុរេននៅវៀតណាម មានត្រឹមតម្លៃជាង ៥ពាន់រៀល ទៅជាង១ម៉ឺនរៀលប៉ុណ្ណោះនៅក្នុងមួយគីឡូក្រាម ដោយតម្លៃនេះ គឺមានត្រឹមតែ ១ភាគ៣ប៉ុណ្ណោះបើធៀបនឹងតម្លៃកាលពីឆ្នាំមុន។ ការត្រួតពិនិត្យរបស់អាជ្ញាធរចិន ក៏បានធ្វើឱ្យការនាំចេញទុរេនរបស់វៀតណាម នៅ២ខែដើមឆ្នាំនេះ ធ្លាក់ចុះ ៨៣% បើធៀបនឹងរយៈពេលដូចគ្នាកាលពីឆ្នាំមុន។
ការធ្លាក់ចុះនៃការនាំចេញ គឺមួយផ្នែកដោយសារអាជីវកម្មមានការប្រុងប្រយ័ត្ន និងលែងហ៊ាននាំចេញក្នុងទំហំធំ ដោយសារខ្លាចខាតបង់។ ចំណែកទីផ្សារទុរេនរបស់វៀតណាម នៅក្នុងប្រទេសចិន បានធ្លាក់ចុះពី ៦២% មកនៅត្រឹម ៣៧% ប៉ុណ្ណោះ ខណៈដែលទីផ្សារទុរេនប្រទេសថៃ នៅចិន បានកើនឡើងពី ៣៧% ទៅជាង ៦២%វិញ។ ផ្លែទុរេននាំចេញរបស់ប្រទេសថៃ ក៏រងនូវការត្រួតពិនិត្យយ៉ាងតឹងរឹង ពីអាជ្ញាធរចិន ដូចគ្នាដែរ ប៉ុន្ដែ រាជរដ្ឋាភិបាលថៃ បានដាក់ចេញនូវវិធានការណ៍ ដើម្បីធានាបាននូវការនាំចេញក្នុងបរិមាណខ្ពស់។
ទន្ទឹមនឹងការនាំចេញទុរេនរបស់វៀតណាម ទៅចិន ដាំក្បាលចុះខ្លាំង ការនាំចេញទុរេនរបស់ម៉ាឡេស៊ី ទៅចិន នាពេលនេះ កំពុងក្ដោបក្ដាប់ឱកាសទីផ្សារបានល្អ ដោយរំពឹងថា នឹងអាចកើនឡើងប្រមាណ ១៥% ទៅ ២០% នៅឆ្នាំនេះ ដោយសារតែតម្រូវការទុរេននៅចិន កើនឡើង បើទោះបីជាការដាំដុះទុរេននៅម៉ាឡេស៊ី កំពុងប្រឈមនឹងបញ្ហាអាកាសធាតុយ៉ាងណាក្ដី។ តម្លៃទុរេន នៅម៉ាឡេស៊ី ក៏ខ្ពស់គួរសមដែរ ពោលគឺ សម្រាប់ផ្លែទុរេនមួសាងឃីង Musang King គុណភាពខ្ពស់ អាចលក់បានដល់ទៅជិត ៣ម៉ឺនរៀល នៅក្នុងមួយគីឡូក្រាមតម្លៃលក់នៅចម្ការផ្ទាល់ ហើយតម្លៃនេះ ត្រូវបានគេព្យាករថា នឹងអាចកើនឡើងជាង២ដង នៅពេលរដូវជិតអស់ទុរេន។ កាលពីឆ្នាំមុន ចិនបាននាំចូលទុរេនពីម៉ាឡេស៊ី ក្នុងតម្លៃ ២១២ លានដុល្លារ។ ប្រទេសចិន បានពង្រឹងការត្រួតពិនិត្យយ៉ាងដិតដល់បំផុត លើទុរេននាំចូលពីវៀតណាម និងថៃ ទាក់ទងនឹងការតេស្ដរកមើលសារធាតុសំណល់លោហៈដែលមាននៅលើផ្លែទុរេន និងសារធាតុគីមីហាមឃាត់ម្យ៉ាង ដែលគេប្រើជាថ្នាំជ្រលក់ទុរេន ដើម្បីឱ្យឆាប់ទុំ ហើយវាត្រូវបានហាមឃាត់ដោយសារមានហានិភ័យខ្ពស់ ដែលអាចបង្កជំងឺមហារីកលើអ្នកទទួលទាន៕
អត្ថបទ ចាន់ ភារម្យ
