កំណើន GDP របស់ថៃ ត្រូវបានព្យាករថា នឹងមានត្រឹមតែ ៣,២% ប៉ុណ្ណោះ នៅឆ្នាំ២០២១ ដោយការព្យាករនេះ គឺមានទាបជាការព្យាករកាលពីមុនរបស់ធនាគារកណ្ដាលថៃ ដែលថានឹងមានកំណើន៣,៦%។ ការទម្លាក់ការព្យាករកំណើនសេដ្ឋកិច្ចថៃ នៅឆ្នាំក្រោយនេះ ដោយសារតែមើលឃើញថា កត្តាផ្ទុះរាលដាលនៃមេរោគនៅបន្ដអូសន្លាយនៅបណ្ដាប្រទេសលើសកលោក រួមទាំងការផ្ទុះរាលដាលឆ្លងមេរោគកូវីដ១៩ ជាថ្មីទៀត នៅក្នុងប្រទេសថៃនាពេលថ្មីៗនេះ នឹងធ្វើឲ្យការងើបឡើងនៃវិស័យទេសចរណ៍ត្រូវពន្យារពេលកាន់តែយូរជាងមុន។
ធនាគារកណ្ដាលថៃ បានព្យាករថា ចំនួនទេសចរបរទេស មកកាន់ប្រទេសថៃ នៅឆ្នាំ២០២១ នឹងមានសរុបប្រមាណ ៥លាន៥សែននាក់ ធ្លាក់ចុះទាបជាងការព្យាករកាលពីមុនថាមាន ៩លាននាក់។
អត្ថបទទាក់ទង!
បើទោះបីជា មានដំណើរការអភិវឌ្ឍន៍វ៉ាក់សាំងកូវីដ-១៩ ក៏ដោយ ប៉ុន្ដែ ការទទួលបានវ៉ាក់សាំងត្រូវបានគេរំពឹងថានឹងមានកម្រិត។ ធនាគារកណ្ដាលថៃ បានព្យាករថា សម្រាប់ការចាក់វ៉ាក់សាំង សម្រាប់ប្រទេសមានសេដ្ឋកិច្ចជឿនលឿន គឺមានប្រមាណ ៣០%នៃចំនួនប្រជាជនសរុបប៉ុណ្ណោះ នៅក្នុងត្រីមាសទី ២ នៃឆ្នាំ២០២១ ខណៈដែលការចាក់វ៉ាក់សាំងនៅក្នុងប្រទេសសំខាន់មួយចំនួនទៀត ដែលជាប្រភពទេសចររបស់ថៃនោះ អាចនឹងមានការចាក់វ៉ាក់សាំងបានដល់ ៣០% នៃចំនួនប្រជាជនសរុប គឺត្រូវរង់ចាំដល់ត្រីមាសទី៣ឯណោះ។
មន្ត្រីជាន់ខ្ពស់ធនាគារកណ្ដាលថៃ បានលើកឡើងថា សម្រាប់ប្រទេសថៃ ការចាក់វ៉ាក់សាំងត្រូវបានព្យាករថា នឹងអាចចាក់ជូនប្រជាជនប្រមាណ ២០%នៃប្រជាជនសរុបនៅក្នុងត្រីមាសទី ៤នៅឆ្នាំ២០២១ ហើយប្រទេសភាគច្រើនទៀត រួមទាំងថៃផងដែរ អាចនឹងសម្រេចបានការចាក់វ៉ាក់សាំងជូនប្រជាជនដល់ ទៅ ៦០ ទៅ៧០ ភាគរយ នៅឆមាសទី២ នៃឆ្នាំ ២០២២។
ក្រោមសេណារីយ៉ូនេះ ប្រទេសថៃ រំពឹងនឹងបើកទ្វារទទួលអ្នកដំណើរបរទេសឡើងវិញ ចាប់ពីឆមាសទី ២នៃឆ្នាំ២០២១ ដោយចំនួនអ្នកដំណើរមកដល់រំពឹងនឹងកើនឡើងនៅត្រីមាសចុងក្រោយ។
សម្រាប់ឆ្នាំ២០២០ ធនាគារកណ្ដាលថៃ បានដំឡើងការព្យាករពីការធ្លាក់ចុះនៃកំណើនសេដ្ឋកិច្ចថៃ បន្តិចដោយបានព្យាករថា នឹងមាន -៦,៦% ខណៈដែលកាលពីមុនធ្លាប់ព្យាករថា ធ្លាក់ចុះដល់ -៧,៨%.។ ការកែការព្យាកររបស់ធនាគារកណ្ដាលថៃនេះ គឺដោយសារតែមើលឃើញពីសញ្ញាល្អប្រសើរ នៃការងើបឡើងនៃសេដ្ឋកិច្ចថៃ ក្នុងត្រីមាសទី៣ និងត្រីមាសទី៤ ពិសេសគឺការនាំចេញ និងការប្រើប្រាស់ទំនិញក្នុងស្រុក។
នៅឆ្នាំ២០២០នេះ ការនាំចេញទំនិញរបស់ថៃ ត្រូវបានព្យាករថា នឹងធ្លាក់ចុះ ៧,៤% ខណៈដែលការប្រើប្រាស់ឯកជន ត្រូវបានព្យាករថា នឹងរួចទំហំ ១,៤%។ ដោយឡែក សម្រាប់ការនាំចេញនៅឆ្នាំ២០២១វិញ ត្រូវបានក្រសួងពាណិជ្ជកម្មថៃ ព្យាករថា នឹងសម្រេចបានកំណើន៤%៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
