នៅក្នុងសេចក្ដីថ្លែងការរបស់ក្រុមហ៊ុនវៀតណាម Vingroup បានឲ្យដឹងថា ក្រុមហ៊ុនបានបង្កើតក្រុមហ៊ុនមួយដែលមានមូលដ្ឋាននៅសិង្ហបុរី ដើម្បីកាន់កាប់ចំណែកភាគហ៊ុននៅក្នុងប្រតិបត្តិការរបស់ក្រុមហ៊ុន VinFast ដែលជាបុត្រសម្ព័ន្ធរបស់ខ្លួន ក្នុងគោលបំណងជំរុញដល់ដំណើរការបោះផ្សាយលក់មូលបត្ររបស់ខ្លួននៅលើទីផ្សារភាគហ៊ុនអាមេរិក។
ក្រុមហ៊ុនផលិតរថយន្តអគ្គិសនីដ៏ក្មេងខ្ចីរបស់វៀតណាម VinFast ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន Vingroup ក៏ធ្លាប់បានលើកឡើងថា ខ្លួនកំពុងស្វែងរកការបោះផ្សាយលក់មូលបត្រជាសាធារណៈដំបូង ក្នុងតម្លៃយ៉ាងហោចណាស់ ៣ពាន់លានដុល្លារអាមេរិក ខណៈដែលក្រុមហ៊ុននេះ អាចមានតម្លៃសរុប ៦០ ពាន់លានដុល្លារ។
ទន្ទឹមនេះ ក្រុមហ៊ុន VinFast កំពុងទទួលយកហានិភ័យលើការវិនិយោគនៅក្នុងទីផ្សារសហរដ្ឋអាមេរិកផងដែរ ដោយក្រុមហ៊ុនគិតថា វាជាកន្លែងដ៏សាកសមសម្រាប់ការលក់រថយន្ត អគ្គិសនីរបស់ខ្លួន ដើម្បីទាក់ទាញអ្នកប្រើប្រាស់ ពីក្រុមហ៊ុន Tesla និង General Motorsជាដើម។ ក្រៅពីនេះ ក្រុមហ៊ុន Vingroup ក៏កំពុងកំណត់គោលដៅលក់រថយន្តអគ្គិសនីទូទាំងពិភពលោកឱ្យបានចំនួន ៤ម៉ឺន ២ពាន់ គ្រឿងនៅឆ្នាំក្រោយ ពោលគឺកើនឡើងពីផែនការដែលបានកំណត់កាលមុនមានតែ ១ម៉ឺន ៥ពាន់គ្រឿងប៉ុណ្ណោះ។
អត្ថបទទាក់ទង
បច្ចុប្បន្ននេះ ក្រុមហ៊ុន Vingroup ក៏កំពុងស្វែងរកមូលនិធិដើមទុន ១ ពាន់លានដុល្លារ ពីវិនិយោគិនសកលសម្រាប់ VinFast មុនពេលបោះផ្សាយលក់មូលបត្រនៅអាមេរិកផងដែរ។
សូមជម្រាប ក្រុមហ៊ុន Vingroup ជាក្រុមហ៊ុនរបស់មហាសេដ្ឋីលំដាប់កំពូលរបស់វៀតណាមគឺ លោក Pham Nhat Vuong ។ ទន្ទឹមនេះ ក្រុមហ៊ុនមួយនេះ ក៏បានក្លាយខ្លួនជាអ្នកបង្កើតរថយន្តអគ្គសនីដំបូងគេរបស់ប្រទេសតំបន់អាស៊ាន ដែលនឹងឈានជើងទៅប្រកួត ជាមួយនឹងរថយន្តអគ្គិសនីម៉ាកល្បីៗលំដាប់ពិភពលោកផងដែរ៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
