បើទោះបីជាមិនទាន់មានទីស្នាក់ការកណ្ដាលនៅក្នុងទីផ្សារសហរដ្ឋអាមេរិកក៏ដោយ ប៉ុន្ដែក្រុមហ៊ុន VinFast នឹងបើកឲ្យមានការបញ្ជាទិញរថយន្ដរបស់ខ្លួនជាមុន (Pre-order) ក្នុងទីផ្សារសហរដ្ឋអាមេរិកចាប់ពីពាក់កណ្ដាលឆ្នាំ២០២២តទៅ។ តាមផែនការ នៅពាក់កណ្ដាលឆ្នាំ២០២២ ក្រុមហ៊ុនវៀតណាមមួយនេះ នឹងសម្ពោធអគារតាំងបង្ហាញលក់រថយន្ដចំនួន ៦០ កន្លែងនៅទូទាំងសហរដ្ឋអាមេរិក ហើយក្រុមហ៊ុនក៏កំពុងតាមដានលទ្ធភាពក្នុងការសាងសង់រោងចក្រផលិតនៅអាមេរិកផងដែរ។
ក្រៅពីទីផ្សារអាមេរិក ក្រុមហ៊ុន VinFast ក៏មានមហិច្ឆតាធំក្នុងការលក់រថយន្តអគ្គសនីរបស់ខ្លួន នៅក្នុងទីផ្សារអឺរ៉ុបដូចគ្នា។ ម្យ៉ាងវិញទៀត ក្រុមហ៊ុននេះក៏នឹងជ្រើសរើសអ្នកជំនាញមកពីក្រុមហ៊ុនល្បីៗរួមមាន Tesla, BMW និងToyota ដើម្បីឱ្យមកបម្រើការសម្រាប់ពួកគេ ក្នុងការប្រកួតប្រជែងនឹងរថយន្តម៉ាកល្បីក្នុងពិភពលោក។
សូមជម្រាបថា ក្រុមហ៊ុនរថយន្តរបស់វៀតណាមនេះ ក៏នឹងចាប់ផ្តើមចែកចាយរថយន្តអគ្គិសនីដំបូងនៅក្នុងប្រទេសរបស់ខ្លួនចាប់ពីខែធ្នូនេះតទៅផងដែរ។
ក្រុមហ៊ុនបានកំណត់គោលដៅលក់រថយន្តអគ្គិសនីនៅទូទាំងពិភពលោកនៅឆ្នាំក្រោយនេះចំនួន ១ ម៉ឺន ៥ ពាន់ គ្រឿងប៉ុណ្ណោះ ពោលគឺធ្លាក់ចុះពីគោលដៅដែលបានកំណត់លើកមុនចំនួន ៥ម៉ឺន ៦ ពាន់គ្រឿង ដោយសារតែកង្វះខាតបន្ទះឈីបសកល។
សូមជម្រាបថា VinFast ជាក្រុមហ៊ុនផលិតរថយន្តអគ្គិសនីដែលជាបុត្រសម្ព័ន្ធរបស់ក្រុមហ៊ុនពហុអាជីវកម្ម Vingroup ដែលជារបស់មហាសេដ្ឋីលេខមួយរបស់វៀតណាមគឺលោក Pham Nhat Vuong។ ទន្ទឹមនេះ រថយន្តរបស់វៀតណាមបានក្លាយខ្លួនជាម៉ូឌែលរថយន្តដំបូងគេរបស់ប្រទេសតំបន់អាស៊ានដែលនឹងឈានជើងទៅប្រកួតជាមួយនឹងរថយន្តអគ្គិសនីម៉ាកល្បីៗលំដាប់ពិភពលោក៕
