សារព័ត៌មាន Vietnam News បានរាយការណ៍ថា ទីផ្សាររថយន្តនៅប្រទេសវៀតណាម កំពុងប្រឈមមុខនឹងស្ថានភាពការផ្គត់ផ្គង់កើនឡើងខ្ពស់ តែតម្រូវការចុះទាប ដែលបញ្ហានេះ បានទាញទម្លាក់បរិមាណលក់ និងប្រាក់ចំណូលរបស់ក្រុមហ៊ុនផលិតរថយន្ត។ ដើម្បីស្រោចស្រង់ស្ថានការណ៍នេះ បណ្តាក្រុមហ៊ុនផលិត និងនាំចូលរថយន្តនានា បានងាកមកផ្តល់ជូននូវការបញ្ចុះតម្លៃ និងផ្តល់កញ្ចប់ទីផ្សារពិសេសផ្សេងៗ ដើម្បីទាក់ទាញអតិថិជន និងជំរុញតម្រូវការប្រើប្រាស់រថយន្តក្នុងស្រុក។
ការធ្លាក់ចុះបរិមាណលក់នេះ អាចបណ្តាលមកពីកត្តាជាច្រើន រួមទាំងការផុតកំណត់នៃកម្មវិធីលើកទឹកចិត្តរបស់រដ្ឋាភិបាល ដែលផ្តល់នូវការកាត់បន្ថយថ្លៃចុះឈ្មោះ៥០% ក៏ដូចជាថ្ងៃឈប់សម្រាកបុណ្យចូលឆ្នាំថ្មីៗនេះ។ មកដល់ពេលនេះ ក្រុមហ៊ុនផលិតរថយន្តកំពុងកាត់បន្ថយតម្លៃយ៉ាងសកម្មចាប់តាំងពីថ្ងៃបុណ្យចូលឆ្នាំថ្មី ដើម្បីទាក់ទាញអ្នកទិញ។ របាយការណ៍របស់ការិយាល័យស្ថិតិទូទៅរបស់រដ្ឋាភិបាលបានបង្ហាញពីការធ្លាក់ចុះយ៉ាងខ្លាំងនៃផលិតផល រថយន្តដែលផលិតក្នុងស្រុកនៅក្នុងខែកុម្ភៈ ឆ្នាំ២០២៤ បើធៀបនឹងខែមករា និងរយៈពេលដូចគ្នាកាលពីឆ្នាំមុន។
នៅក្នុងខែកុម្ភៈ ឆ្នាំ២០២៤ រថយន្តថ្មីសរុបចំនួនជិត២ម៉ឺន២ពាន់គ្រឿង ដែលផលិតក្នុងស្រុក និងនាំចូលត្រូវបានបញ្ចូលទៅក្នុងទីផ្សារ។ តួលេខនេះថយចុះជាង២៣% បើធៀបនឹងខែមករា និងការថយចុះជិត៣៩% បើធៀបនឹងខែកុម្ភៈ ឆ្នាំ២០២៣។ ចំនួនរថយន្តដែលផលិតនិងដំឡើងក្នុងស្រុកនៅក្នុងខែកុម្ភៈ ឆ្នាំ២០២៤ ត្រូវបានគេប៉ាន់ប្រមាណថា មានចំនួនជិត១ម៉ឺន៦ពាន់ គ្រឿងថយចុះជាង២៦% បើធៀបនឹងខែមករា ឆ្នាំ២០២៤ ហើយថយចុះជាង២៥% បើធៀបនឹងខែកុម្ភៈ ឆ្នាំ២០២៣។
ជារួមនៅក្នុងរយៈពេលពីរខែដំបូងនៃឆ្នាំ២០២៤ ចំនួនរថយន្តដែលផលិត និងដំឡើងក្នុងស្រុកត្រូវបានគេប៉ាន់ប្រមាណថា មានត្រឹមតែ៣ម៉ឺន៧ពាន់គ្រឿង ធ្លាក់ចុះជិត១០% បើធៀបនឹងរយៈពេលដូចគ្នាក្នុងឆ្នាំ២០២៣។ ជាមួយគ្នានេះ ចំនួនរថយន្តដែលបាននាំចូលសរុបក្នុងរយៈពេលពីរខែដំបូងក្នុងឆ្នាំ២០២៤ ត្រូវបានគេប៉ាន់ប្រមាណថា មានចំនួនជិត១ម៉ឺន៣ពាន់គ្រឿង ដែលមានតម្លៃ២៦២លានដុល្លារ ថយចុះជិត៥២%៕
ដោយៈ សរ សុជាតិ
