ធនាគារសម្រាប់កិច្ចសហប្រតិបត្តិការអន្តរជាតិ(JBIC) គាំទ្រដោយរដ្ឋជប៉ុននឹងរួមចំណែកផ្ដល់ថវិកាប្រមាណ៤១៥លានដុល្លារ ដល់កិច្ចព្រមព្រៀងសហហិរញ្ញប្បទានជាមួយនឹងក្រុមហ៊ុនហិរញ្ញវត្ថុឯកជនដទៃទៀត ដែលមានទំហំសរុបជិត១ពាន់លានដុល្លារ សម្រាប់អភិវឌ្ឍន៍តំបន់ឧស្ម័នប្លុក B នៅឆ្នេរសមុទ្រភាគខាងត្បូងនៃប្រទេសវៀតណាម។
ហិរញ្ញប្បទាននេះនឹងត្រូវប្រើសម្រាប់ដំឡើងបំពង់បង្ហូរឧស្ម័ននៅក្នុងសមុទ្រទៅកាន់រោងចក្រថាមពលនៅលើដីគោក ហើយការចំណាយសរុបសម្រាប់គម្រោងទាំងអស់ដែលតភ្ជាប់ទៅកាន់ប្លុក B នេះត្រូវបានគេប៉ាន់ប្រមាណថា មានចំនួនលើសពី១០ពាន់លានដុល្លារទៅទៀត។
កញ្ចប់សហហិរញ្ញប្បទានរបស់ធនាគារ JBIC ត្រូវបានផ្ដល់ទៅឱ្យក្រុមហ៊ុនចំនួនបី ដែលទទួលបានការវិនិយោគពីក្រុមហ៊ុន មីតស៊ូអ៊ី អយ អ៊ិចផ្លរ៉េស៊ិន (Mitsui Oil Exploration) មានមូលដ្ឋាននៅទីក្រុងតូក្យូដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនពាណិជ្ជកម្មជប៉ុន មីតស៊ូអ៊ី អ៊ែនខូ (Mitsui & Co)។ ក្រុមហ៊ុន Mitsui Oil Exploration បានគ្រប់គ្រងផលប្រយោជន៍២៣% ក្នុងការអភិវឌ្ឍវិស័យឧស្ម័ន និង១៥% នៅក្នុងគម្រោងសាងសង់បំពង់បង្ហូរឧស្ម័ន។
ក្រុមហ៊ុនប្រេងនិងឧស្ម័នរបស់ប្រទេសវៀតណាម Petro Vietnam និងក្រុមហ៊ុនផលិតប្រេង និងឧស្ម័នរបស់ថៃ PTT Exploration and Production ក៏កំពុងចូលរួមក្នុងការអភិវឌ្ឍគម្រោងឧស្ម័ននៅប្លុក B នេះផងដែរ៕
អត្ថបទ៖ សុខ មង្គល
