ឧស្សាហកម្មកែច្នៃសាច់សត្វនៅវៀតណាម កំពុងរងការគំរាមកំហែងពីការហូរចូលសាច់សត្វមានតម្លៃថោកៗ

សារព័ត៌មាន Vietnam News បានរាយការណ៍ថា ទីផ្សារសាច់ក្នុងស្រុកកំពុងរងការគំរាមកំហែងពីការហូរចូលផលិតផលអាហារ និងសាច់សត្វមានតម្លៃថោកៗពីក្រៅប្រទេស ដែលសាច់សត្វកែច្នៃក្នុងស្រុកសល់ចាល់ពេញទីផ្សារ។ ស្ថិតក្នុងស្ថានភាពនេះ អ្នកជំនាញព្រមានថា និន្នាការនេះ​អាចបំផ្លាញផលិតកម្មសត្វនៅក្នុងស្រុក និងគំរាមកំហែងដល់និរន្តរភាពយូរអង្វែង នៃវិស័យចិញ្ចឹមសត្វរបស់ប្រទេស ប្រសិនបើគ្មានវិធានការជាយុទ្ធសាស្ត្រទេនោះ។

យោងតាមរបាយការណ៍របស់ក្រសួងកសិកម្ម និងបរិស្ថានវៀតណាម នៅក្នុងរយៈពេល៧ខែឆ្នាំ២០២៥ វៀតណាម បានចំណាយប្រាក់ជិត២,៦ពាន់លានដុល្លារលើការនាំចូលផលិតផលសាច់សត្វ កើនឡើងជិត២៣% បើធៀបនឹងរយៈពេលដូចគ្នាកាលពីឆ្នាំ២០២៤។ ក្នុងនោះគ្រាន់តែសាច់បង្កកនាំចូលមានទំហំជាង១ពាន់លានដុល្លារ ខណៈទឹកដោះគោ និងផលិតផលផលិតចេញពីទឹកដោះគោមានតម្លៃជាង៨៦០ លានដុល្លារ។

អាជ្ញាធរវៀតណាម បានអះអាងថា កត្តាដែលជំរុញឱ្យការនាំចូលផលិតផលសាច់សត្វ និងអាហារពីប្រទេសមានការកើនឡើងខ្ពស់ គឺដោយសារសាច់សត្វចិញ្ចឹក្នុងស្រុកមានតម្លៃថ្លៃជាងសាច់នាំចូល។ នៅផ្សារទំនើប និងហាងទំនិញជាច្រើននៅទីក្រុងហូជីមិញ សាច់ជ្រូកដែលនាំចូលពីប្រទេសប្រេស៊ីល មានតម្លៃទាបជាងសាច់ជ្រូកក្នុងស្រុកពី២០ ទៅ៣០%។ ក្រៅពីនោះបណ្តាញចែកចាយធំៗ ក៏កំពុងស្តុកទុកសាច់នាំចូលជាច្រើនប្រភេទផងដែរ ដោយសារផលិតផលក្លាសេមួយចំនួនមកពីអឺរ៉ុប កាណាដា និងអូស្ត្រាលី លក់ក្នុងតម្លៃត្រឹមតែពី៦០ទៅ៨០% នៃតម្លៃក្នុងស្រុក៕

ដោយៈ សរ សុជាតិ