ដោយឡែក នៅខេត្ត Okinawa និង Kagoshima ភាគនិរតីនៃប្រទេសជប៉ុនឯណោះវិញ បានបន្តដាច់ចរន្តអគ្គិសនីនៅព្រឹកថ្ងៃព្រហស្បតិ៍នេះ ដោយសារតែព្យុះទីហ្វុងមួយផ្សេងទៀតដែលមានឈ្មោះថា Khanun បាននាំមកនូវភ្លៀងធ្លាក់ និងខ្យល់បក់បោកឥតត្រាប្រណី។
ជាមួយគ្នានេះ តៃវ៉ាន់ត្រូវបានរាយការណ៍មកថានឹងបិទទីផ្សារ និងសាលារៀននៅតំបន់ភាគខាងជើងនៃកោះ រួមទាំងរដ្ឋធានីតៃប៉ិនៅថ្ងៃព្រហស្បតិ៍ ទី៣ សីហានេះផងដែរ មុនការមកដល់ព្យុះទីហ្វុងKhanun។ នេះបើតាមការចុះផ្សាយដោយសារព័ត៌មានអន្តរជាតិធំៗជាច្រើន។
ការិយាល័យឧតុនិយមទីក្រុងប៉េកាំងបាននិយាយកាលពីថ្ងៃពុធថា កម្រិតទឹកភ្លៀងបានកើនឡើងដល់ជាង ៧៤៤មីលីម៉ែត្រ គិតត្រឹមនៅចន្លោះថ្ងៃសៅរ៍សប្តាហ៍មុនរហូតមកដល់ថ្ងៃពុធសប្តាហ៍នេះ។ គិតត្រឹមថ្ងៃពុធនេះ មានមនុស្ស២១នាក់ ត្រូវបានបញ្ជាក់ថាបានបាត់បង់ជីវិតនៅក្នុងព្យុះភ្លៀងទីហ្វុង Doksuri ខណៈ២៦នាក់ផ្សេងទៀតបន្តបាត់ខ្លួន។
ទីក្រុងប៉េកាំង និងតំបន់ជុំវិញនៃខេត្ត Hebei ត្រូវបានរងគ្រោះដោយសារទឹកជំនន់ធ្ងន់ធ្ងរដោយសារកម្រិតទឹកភ្លៀងឡើងខ្ពស់ពេក។ ភ្លៀងទីហ្វុង Doksuri បានបំផ្លាញផ្លូវថ្នល់ និងដាច់ភ្លើង ទឹកផងដែរ ។ តំបន់ដែលងាយគ្រោះខ្លាំងជាងគេតំបន់ Zhuozhou ទីក្រុងតូចមួយនៅក្នុងខេត្ត Hebei ដែលមានព្រំប្រទល់ជាប់ភាគនិរតីនៃទីក្រុងប៉េកាំង។ យោងតាមអាជ្ញាធរក្នុងតំបន់ក្នុងខេត្ត Hebei បាននិយាយថា មនុស្សជិត៨៥ម៉ឺននាក់ ត្រូវបានផ្លាស់ប្តូរទីលំនៅទៅកាន់ទីទួលសុវត្តិភាពបណ្តោះអាសន្ន។
អត្ថបទគួរអាន
ទន្ទឹមគ្នានេះ នៅទីក្រុងធំៗពីរក្នុងប្រទេសជប៉ុនឯណោះវិញ មានមនុស្សប្រមាណជាង១៦ម៉ឺន៦ពាន់គ្រួសារកំពុងដាច់ចរន្តអគ្គិសនីប្រើប្រាស់នៅថ្ងៃព្រហស្បតិ៍នេះ ដោយសារតែឥទ្ធិពលព្យុះទីហ្វុងកម្រិតធ្ងន់មួយទៀតគឺ Khanun ដែលបានបង្កឱ្យមានខ្យល់បក់បោកខ្លាំង ជាមួយនឹងភ្លៀងឥតឈប់ឈរ។ យោងតាមទីភ្នាក់ងារឧតុនិយមជប៉ុន បានឱ្យដឹងថា ព្យុះនៅសមុទ្រចិនខាងកើត បានកំពុងធ្វើដំណើរទៅភាគពាយ័ព្យក្នុងល្បឿនយឺតនៃប្រទេសជប៉ុន ពោលគឺសំដៅទៅកោះ Okinawa និងទីក្រុង Kagoshima ជាមួយនឹងល្បឿនខ្យល់ប្រមាណ២២២គីឡូម៉ែត្រក្នុងមួយម៉ោង។
ប្រព័ន្ធផ្សព្វផ្សាយរដ្ឋជប៉ុន N H K បានរាយការណ៍ថា មនុស្សពីរនាក់បានស្លាប់នៅអូគីណាវ៉ា ខណៈមនុស្សសរុបចំនួន ៤១ នាក់នៅក្នុងខេត្ត Okinawa និង Kagoshima បានរងរបួស។ ចំណែក អាកាសយានដ្ឋាន Naha ដែលមានទីតាំងនៅក្នុងរដ្ឋធានី Okinawa និងជាច្រកទ្វារដ៏សំខាន់សម្រាប់គោលដៅទេសចរណ៍ដ៏ពេញនិយមនោះ បានដំណើរការឡើងវិញកាលពីថ្ងៃព្រហស្បតិ៍ បន្ទាប់ពីបានបិទអស់រយៈពេលពីរថ្ងៃ។ ក្រសួងដឹកជញ្ជូនជប៉ុនឱ្យដឹងថា ទោះយ៉ាងណា ជើងហោះហើរចំនួន ៣០៤ ត្រូវបានលុបចោលទាំងស្រុង។
បន្ថែមពីនេះ កោះតៃវ៉ាន់ឯណោះវិញត្រូវបានរាយការណ៍មកថា ព្យុះទីហ្វុង Khanun ដែលកំពុងវាយប្រហារប្រទេសជប៉ុននេះ ក៏កំពងឆ្ពោះទៅកាន់ឆ្នេរសមុទ្រភាគឦសានតៃវ៉ាន់យឺតៗ ជាមួយនឹងល្បឿនខ្យល់អតិបរមា ២០៩ គីឡូម៉ែត្រក្នុងមួយម៉ោង។ ទីក្រុងភាគខាងជើងរួមមាន New Taipei, Keelung, Yilan និងរដ្ឋធានី Taipei ផង នឹងបិទការធ្វើអាជីវកម្ម និងសាលារៀនជាបណ្តោះអាសន្ននៅថ្ងៃព្រហស្បតិ៍នេះ។ ទីផ្សារភាគហ៊ុន និងទីផ្សារប្តូរប្រាក់បរទេសរបស់តៃវ៉ាន់ក៏នឹងត្រូវបិទផងដែរ៕
